.jpg)
ផ្លែស្វាយដែលដាំនៅក្នុងចម្ការរបស់ក្រុមហ៊ុនម៉ុង ឫទ្ធីនាពេលកន្លងមក។ ហេង ជីវ័ន
ភ្នំពេញ: ក្រុមហ៊ុនក្នុងស្រុកមានគម្រោងនាំចេញស្វាយស្រស់ទៅកាន់ទីផ្សារសហភាពអឺរ៉ុប និងកាណាដា ខណៈកំពុងស្វែងរករោងចក្រវេចខ្ចប់ និងសម្លាប់មេរោគលើផ្លែស្វាយ ដែលស្របតាមស្តង់ដាអនាម័យអឺរ៉ុប និងកាណាដា។ នេះបើតាមអ្នកចាត់ការទូទៅរបស់ក្រុមហ៊ុន។
លោក ចាន់ ពេជ្រ អ្នកចាត់ការទូទៅរបស់ក្រុមហ៊ុន Signatures of Asia, Cambodian Rice Mill & Exporter ដែលជាក្រុមហ៊ុននាំចេញអង្ករក្នុងស្រុកបានប្រាប់ភ្នំពេញប៉ុស្តិ៍ថា ក្រុមហ៊ុនរបស់លោកមានផែនការនាំចេញស្វាយស្រស់ដោយផ្ទាល់ទៅអឺរ៉ុប និងកាណាដានៅឆ្នាំនេះ។
លោកបានថ្លែងថា៖ «អតិថិជនមួយចំនួនដែលបានទិញអង្ករពីក្រុមហ៊ុនខ្ញុំកំពុងស្វែងរកការបញ្ជាទិញស្វាយស្រស់ពីកម្ពុជា។ ពួកគេប្រាប់ខ្ញុំថា ស្វាយរបស់យើងមានឱជារសជាតិឆ្ងាញ់ ហើយពួកគេចង់នាំចូលយកទៅលក់ក្នុងហាងរបស់ពួកគេ»។
លោកបន្តថា ក្នុងជំហានដំបូងក្រុមហ៊ុនលោកមានផែនការនឹងនាំចេញស្វាយស្រស់ដោយផ្ទាល់ចំនួន ៣,៥ តោនក្នុង ១ សប្តាហ៍ ទៅកាន់ទីផ្សារប្រទេសទាំង ២ នេះ។ លោកបញ្ជាក់ថា៖ «សព្វថ្ងៃ ក្រុមហ៊ុនរបស់ខ្ញុំកំពុងស្វែងរករោងចក្រវេចខ្ចប់ និងសម្លាប់មេរោគលើផ្លែស្វាយដែលស្របតាមស្តង់ដាអនាម័យរបស់អឺរ៉ុប និងកាណាដា ហើយក្រុមហ៊ុនក៏កំពុងស្វែងរកអ្នកផ្គត់ផ្គង់ផ្លែស្វាយក្នុងស្រុកផងដែរ»។
បច្ចុប្បន្នប្រទេសកូរ៉េខាងត្បូង និងប្រទេសចិនជាទីផ្សារធំជាងគេរបស់កម្ពុជាសម្រាប់ស្វាយស្រស់។
កម្ពុជាបាននាំចេញស្វាយស្រស់ចំនួន ១៦ ៨៦៨ តោន ទៅទីផ្សារប្រទេស ថៃ វៀតណាម បារាំង រុស្ស៊ី កូរ៉េខាងត្បូង និងហុងកុង សម្រាប់ខែមករា និងកុម្ភៈ។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
របាយការណ៍នេះបង្ហាញថា កម្ពុជាត្រូវការស្វាយប្រមាណ ៣០០ តោន ក្នុង ១ ថ្ងៃ ចូលក្នុងរោងចក្រសម្រាប់កែច្នៃនាំចេញ។
អ្នកស្រី ម៉ៅ គន្ធា អ្នកគ្រប់គ្រងផ្នែកលក់របស់ Kirirom Food Product (KFP) Co., Ltd ដែលជាក្រុមហ៊ុនកែច្នៃស្វាយបានប្រាប់ភ្នំពេញប៉ុស្តិ៍ថា ក្រុមហ៊ុនរបស់អ្នកស្រីបាននាំចេញតំណាប់ស្វាយទៅកាន់ទីផ្សារ ចិន អឺរ៉ុប អូស្ត្រាលី និងប្រទេសថៃជាដើម។
អ្នកស្រីថ្លែងថា៖ «សព្វថ្ងៃ ស្វាយស្រស់មានតម្លៃក្នុងរង្វង់ ៨០០ រៀលក្នុង ១ គីឡូក្រាម។ ក្រុមហ៊ុនខ្ញុំត្រូវការស្វាយជាមធ្យម ៥០ តោនក្នុង ១ ថ្ងៃសម្រាប់កែច្នៃ»។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្មកាលពីខែធ្នូបានអំពាវនាវឲ្យវិស័យឯកជនវិនិយោគបង្កើតរោងចក្រសម្អាត ដើម្បីបំពេញតម្រូវការស្តង់ដានាំចេញស្វាយស្រស់ទៅកាន់ទីផ្សារអន្តរជាតិ។
លោកថ្លែងថា៖ «ខ្ញុំសូមអំពាវនាវឲ្យក្រុមហ៊ុនឯកជននានាធ្វើការវិនិយោគលើហេដ្ឋារចនាសម្ព័ន្ធ ការវេចខ្ចប់ទៅតាមស្តង់ដាអនាម័យ និងបង្កើតរោងចក្រសម្លាប់មេរោគឲ្យបានច្រើន ដើម្បីធ្វើឲ្យកម្ពុជាយើងបាននាំចេញផ្លែស្វាយទៅទីផ្សារអន្តរជាតិ យើងប៉ាន់ប្រមាណនៅឆ្នាំ ២០២៣ យើងនឹងនាំចេញស្វាយឲ្យបាន ៦០ ម៉ឺនតោនក្នុង ១ ឆ្នាំ»។
កាលពីឆ្នាំមុនកម្ពុជាបាននាំចេញស្វាយស្រស់ចំនួន ៥៨ ១៦២ តោន ទៅកាន់ទីផ្សារប្រទេស វៀតណាម ថៃ សិង្ហបុរី បារាំង រុស្ស៊ី និងហុងកុង។
ផ្ទៃដីដាំដុះស្វាយនៅកម្ពុជាមានចំនួនជាង ១០ ម៉ឺនហិកតា ហើយខេត្តដែលដាំស្វាយច្រើន និងមានគុណភាពឱជារសឆ្ងាញ់ជាងគេគឺ កំពង់ស្ពឺ បន្ទាប់មកខេត្តបាត់ដំបង កំពត និងខេត្តបន្ទាយមានជ័យ ដែលភាគច្រើនដាំស្វាយកែវរមៀត៕LA
