ភ្នំពេញៈ ក្រុមហ៊ុនចិនគ្រោងនឹងវិនិយោគលើការកែច្នៃ និងការដាំដុះកប្បាសនៅខេត្តកំពង់ស្ពឺសម្រាប់ផ្គត់ផ្គង់រោងចក្រសម្លៀកបំពាក់របស់កម្ពុជា និងការនាំចេញ។
លោក វី សំណាង អភិបាលខេត្តកំពង់ស្ពឺបានប្រាប់ភ្នំពេញប៉ុស្ដិ៍កាលពីថ្ងៃអាទិត្យថា លោកបានជួបក្រុមហ៊ុនចិនកាលពីថ្ងៃសុក្រនៅសាលាខេត្ត ដោយពួកគេបានបង្ហាញចំណាប់អារម្មណ៍ក្នុងការវិនិយោគលើឧស្សាហកម្មកប្បាសនៅកម្ពុជា។
លោកបានថ្លែងថា៖ «ពួកគេជាក្រុមហ៊ុនធំមួយមកពីប្រទេស ចិន បានធ្វើការសិក្សារួចហើយអំពីសក្ដានុពលនៅក្នុងខេត្តរបស់ខ្ញុំ ដោយសារតែពួកគេបានបញ្ចប់ការពិភាក្សារួចហើយជាមួយរដ្ឋបាលខេត្តអំពីផែនការរបស់ពួកគេ។ ពួកគេនឹងវិនិយោគរាប់លានដុល្លារលើផ្ទៃដីទំហំ ៣០ ០០០ ហិកតា នៅក្នុងខេត្តនេះ»។
លោកបានឲ្យដឹងថាជាមួយផែនការវិនិយោគ ក្រុមហ៊ុននេះនឹងអញ្ជើញក្រុមហ៊ុនចិនមួយចំនួនផ្សេងទៀតដើម្បីចូលរួម។ លោកបន្តថា៖ «វាជាគម្រោងដ៏ធំមួយនៃកសិឧស្សាហកម្មនៅក្នុងខេត្តរបស់ខ្ញុំ។ នៅពេលនេះយើងមិនមានដីកសិកម្មច្រើននោះទេ ដូច្នេះពេលក្រុមហ៊ុននេះមកវិនិយោគលើការដាំដុះលើផ្ទៃដីទំហំ ៣០ ០០០ ហិកតា មន្ទីរខេត្តអាចជួយសម្រួលពួកគេទិញដីដោយផ្ទាល់ម្ចាស់ដី»។
ទោះបីជាយ៉ាងណាលោកមិនអាចប្រាប់ឈ្មោះក្រុមហ៊ុន ពេលវេលា និងទុនវិនិយោគពិតប្រាកដបានទេ ដោយសារតែលោកមិនមានឯកសារនៅជាប់ខ្លួន។
បច្ចុប្បន្នសម្រាប់កសិឧស្សាហកម្មនៅខេត្តកំពង់ស្ពឺមានផ្ទៃដីប្រហែល ៤៥ ០០០ ហិកតា សម្រាប់ការដាំដុះអំពៅ និង ៤៥ ០០០ ហិកតាផ្សេងទៀតសម្រាប់ការដាំដុះស្វាយ។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មមិនអាចទាក់ទងសុំការអត្ថាធិប្បាយបានទេកាលពីថ្ងៃអាទិត្យ។
កាលពីខែកក្កដាឆ្នាំមុន ក្រុមហ៊ុនចិនមួយមានឈ្មោះហៅថា Jiangsu Lianfa Textile ក៏បានគ្រោងនឹងវិនិយោគលើឧស្សាហកម្មកែច្នៃ និងដាំដុះកប្បាសក្នុងខេត្តពោធិ៍សាត់ផងដែរ ដើម្បីកែច្នៃកំណាត់ និងការផ្គត់ផ្គង់ដល់រោងចក្រកាត់ដេររបស់កម្ពុជា។ ក្រុមហ៊ុននេះបានទទួលការធ្វើតេស្ដបឋមប្រកបដោយជោគជ័យរួចហើយនូវដំណាំនេះ និងកំពុងត្រៀមធ្វើតេស្ដលើកទី ២ លើផ្ទៃដីទំហំ ១៨០ ហិកតា នៅស្រុកបាកាន ខេត្តពោធិ៍សាត់។
ឧស្សាហកម្មកប្បាសរបស់ប្រទេសកម្ពុជាបានធ្លាក់ចុះក្នុងអំឡុងរបបខ្មែរក្រហម នៅពេលធនធានកសិកម្មស្ទើរតែទាំងអស់ត្រូវបានទុកសម្រាប់តែការផលិតស្រូវ។ នៅចន្លោះឆ្នាំ ១៩៦៥ និងឆ្នាំ ១៩៧៥ ឧស្សាហកម្មដែលបានបង្កើតឡើងដោយប្រទេសបារាំងផ្ទៃដីដំណាំនេះរាប់ពាន់ហិកតាត្រូវបានប្រមូលផលជារៀងរាល់ឆ្នាំ។ ដំណាំនេះត្រូវបានកសិករកម្ពុជាបោះបង់ចោលចាប់តាំងពីឆ្នាំ ១៩៨៥៕LA