.jpg)
ក្រុមហ៊ុនចិនចាប់អារម្មណ៍ប្រមូលទិញផ្លែឈើស្រស់ពីកម្ពុជា ដែលមានដូចជាផ្លែស្វាយ មៀន ខ្នុរ ធុរេន ដូងក្រអូប និងក្រូចថ្លុង។ ហេង ជីវ័ន
ភ្នំពេញ: រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ក្រុមហ៊ុនចិនមានចំណាប់អារម្មណ៍វិនិយោគលើការប្រមូលទិញផ្លែឈើស្រស់ពីកម្ពុជាសម្រាប់ការកែច្នៃ និងវេចខ្ចប់ដើម្បីនាំចេញទៅកាន់ទីផ្សារប្រទេសចិន។
លោក វេង សាខុន បានបញ្ជាក់បែបនេះក្រោយជំនួបជាមួយលោក Wang Bingham អគ្គនាយកក្រុមហ៊ុន ធៀន ធៀន ដោយពិភាក្សាពីគម្រោងវិនិយោគរបស់ក្រុមហ៊ុនលើវិស័យកសិកម្មកាលពីថ្ងៃចន្ទនៅក្រសួងកសិកម្ម។
លោក សាខុន បានឲ្យដឹងថា គម្រោងវិនិយោគរបស់ក្រុមហ៊ុនដើរស្របតាមផែនការអភិវឌ្ឍន៍វិស័យកសិកម្មរបស់ក្រសួងកសិកម្មក្នុងការជំរុញផលិតកម្មក្នុងស្រុកតាមរយៈការធ្វើទំនើបកម្មកសិកម្ម ការកែច្នៃ វេចខ្ចប់ និងនាំចេញដើម្បីជំរុញកំណើនសេដ្ឋកិច្ចជាតិ។
លោកថ្លែងថា៖ «ខ្ញុំស្វាគមន៍ និងគាំទ្រដល់ក្រុមហ៊ុនពាក់ព័ន្ធនឹងគម្រោងវិនិយោគប្រមូលទិញ កែច្នៃ វេចខ្ចប់ និងនាំចេញផ្លែឈើស្រស់ពីប្រទេសកម្ពុជាទៅកាន់ទីផ្សារប្រទេសចិន»។
លោក Wang Bingham អគ្គនាយកក្រុមហ៊ុន ធៀន ធៀន បានសិក្សារួចហើយពីគុណភាពនៃផលិតផលផ្លែស្វាយ មៀន ខ្នុរ ធុរេន ដូងក្រអូប និងក្រូចថ្លុងរបស់កម្ពុជា ដោយលោកជឿជាក់ថាផលិតផលទាំងនេះនឹងទទួលបានការគាំទ្រ និងមានទីផ្សារខ្ពស់នៅប្រទេសចិនក្នុងពេលនាំទៅដល់ទីផ្សារនោះ។ បើតាមលោក សាខុន។
លោករដ្ឋមន្ត្រីក៏បានស្នើឲ្យក្រុមហ៊ុនរៀបចំការចុះអនុស្សរណៈយោគយល់គ្នាជាមួយក្រសួង កសិកម្មដើម្បីឲ្យក្រសួងមានលទ្ធភាពជួយសម្របសម្រួលក្នុងការធ្វើផលិតកម្មតាមកិច្ចសន្យាជាមួយសហគមន៍ ពិសេស នីតិវិធីនៃការនាំចេញ។
លោក ហ៊ុន ឡាក់ នាយកក្រុមហ៊ុន Longmate Agriculture Co. ដែលវិនិយោគលើចម្ការចេកអំបូងលឿងទំហំ ១ ០០០ ហិកតា នៅក្នុងខេត្តកំពត ប្រាប់ភ្នំពេញប៉ុស្តិ៍កាលពីថ្ងៃអង្គារថា មុននឹងជួបពិភាក្សាជាមួយរដ្ឋមន្ត្រីក្រសួងកសិកម្ម តំណាងក្រុមហ៊ុននេះបានមកជួបលោកដើម្បីស្វែងយល់អំពីចង្វាក់ផលិតកម្មនៃក្រុមហ៊ុនលោក។
លោកនិយាយថា៖ «ខ្ញុំគិតថាក្រុមហ៊ុននេះនឹងជួយនាំយកកសិផលពីកម្ពុជាចូលទៅទីផ្សារប្រទេសចិន បើសិនកសិផលយើងមានស្តង់ដាសមស្រប គុណភាពល្អ និងតម្លៃល្អ»។
លោកបន្តថា តំណាងក្រុមហ៊ុននេះបានចាប់អារម្មណ៍លើផ្លែស្វាយ ខ្នុរ ធុរេន និងក្រូចថ្លុងរបស់កម្ពុជាក្នុងការនាំយកទៅលក់នៅទីផ្សារប្រទេសចិន។ លោកសង្ឃឹមថា ផ្លែឈើហូបផ្លែរបស់កម្ពុជាកាន់តែច្រើនឡើងនឹងអាចនាំចេញទៅកាន់ប្រទេសចិនតាមរយៈក្រុមហ៊ុនធំរបស់ចិន ខណៈកិច្ចព្រមព្រៀងពាណិជ្ជកម្មកម្ពុជា-ចិន នឹងសម្រេចបាននៅក្នុងឆ្នាំនេះ។
លោកនិយាយថា៖ «ខ្ញុំបានត្រៀមរៀបចំកសិដ្ឋានស្វាយ ហើយខ្ញុំនឹងចងក្រងសហគមន៍ស្វាយ ដើម្បីជួយលើបច្ចេកទេស និងផ្តល់ធាតុចូលឲ្យពួកគាត់។ យើងនឹងធ្វើកិច្ចសន្យាជាមួយគាត់ប្រមូលទិញផ្លែស្វាយស្រស់ពីពួកគាត់ យកមកវេចខ្ចប់នាំចេញទៅចិន»។
បច្ចុប្បន្នផ្លែស្វាយស្រស់ និងចេកអំបូងលឿងដាំដុះនៅកម្ពុជាបានទទួលសិទ្ធិក្នុងការនាំចេញដោយផ្ទាល់ទៅទីផ្សារចិន។
ទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទបង្ហាញថា ប្រទេសកម្ពុជាបាននាំចេញផលិតផលកសិកម្មសរុបជាង ២,៦៨ លានតោន ក្នុងរយៈពេល ៧ ខែ ឆ្នាំ ២០២០ ដោយមានផលិតផលកសិកម្មចំនួន ៦១ មុខទៅ ៥៩ ប្រទេស៕ LA
