.jpg)
ទិដ្ឋភាពនៅពីមុខតំបន់សេដ្ឋកិច្ចពិសេសភ្នំពេញ (PPSEZ)។ ហុង មិនា
ភ្នំពេញៈ ក្រុមហ៊ុនថ្មីចំនួន ២ របស់ចិនបានសម្រេចវិនិយោគក្នុងតំបន់សេដ្ឋកិច្ចពិសេសភ្នំពេញ (PPSEZ) លើផែ្នកបច្ចេកវិទ្យាអេឡិចត្រូនិក ទោះបីជាពេលនេះជំងឺកូវីដ ១៩ នៅតែបន្តរីករាលដាលក៏ដោយ។
PPSP គឺជាក្រុមហ៊ុននៅពីក្រោយតំបន់សេដ្ឋកិច្ចពិសេសភ្នំពេញ (PPSEZ) ដែលជាសួនឧស្សាហកម្មមានផ្ទៃដីទំហំ ៣៥៧ ហិកតា ស្ថិតនៅក្នុងខណ្ឌកំបូល ជាយទីក្រុងភ្នំពេញ។
សេចក្ដីប្រកាសព័ត៌មានសប្តាហ៍មុនបានឲ្យដឹងថា ជំងឺកូវីដ ១៩ បានបង្កជាក្តីបារម្ភដ៏ធំសម្រាប់រដ្ឋាភិបាល និងប្រជាជនជុំវិញពិភពលោក ប៉ុន្តែក្រុមហ៊ុននៅក្នុងតំបន់សេដ្ឋកិច្ចពិសេសភ្នំពេញបានបន្តដំណើរទៅមុខជាធម្មតា និងមានមួយចំនួនកំពុងពង្រីកបន្ថែមផងដែរ។
លិខិតខាងលើបានបន្តថា ការសម្លឹងមើលអំពីអត្ថប្រយោជន៍ដែលប្រទេសកម្ពុជាផ្ដល់ដល់ក្រុមវិនិយោគិន និងឱកាសប្រកបដោយសក្ដានុពលបានជំរុញឲ្យក្រុមហ៊ុនចិនចំនួន ២ ចូលមកវិនិយោគនៅក្នុង PPSEZ។
SEIKAWA (Cambodia) Technology Co., Ltd គឺជាក្រុមហ៊ុនផលិតគ្រឿងបន្លាស់ប្លាស្ទិកសម្រាប់ឧបករណ៍អគ្គិសនី និងអេឡិចត្រូនិកមកពីប្រទេសចិនបានវិនិយោគលើចង្វាក់ផ្គត់ផ្គង់មួយសម្រាប់ក្រុមហ៊ុនបច្ចេកវិទ្យាជាន់ខ្ពស់ដ៏ល្បីរបស់ប្រទេសជប៉ុននៅក្នុងប្រទេសកម្ពុជា។
ចំណែក WCFO (Cambodia) Co., Ltd គឺជាក្រុមហ៊ុនចិនមួយផ្សេងទៀត ដែលកំពុងផលិតឧបករណ៍ហ្វាយប៊ឺអុបទិក និងនាំចេញទៅទិសដៅប្រទេសជប៉ុន និងអាមេរិក។
ក្រុមហ៊ុនទាំង ២ បានសម្លឹងឃើញប្រទេសកម្ពុជាជាមូលដ្ឋានទិសដៅថ្មីមួយដោយសារភាពសម្បូរបែបនៃកម្លាំងពលកម្មវ័យក្មេងមានតម្លៃទាប និងមានភាពអនុគ្រោះច្រើនពីបណ្ដាប្រទេសអភិវឌ្ឍន៍ ជាពិសេសក្នុងស្ថានការជម្លោះពាណិជ្ជកម្មរវាងអាមេរិក និងប្រទេសចិន។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងកាលពីថ្ងៃអាទិត្យថា ការវិនិយោគរបស់ប្រទេសចិននៅពេលថ្មីៗនេះនៅកម្ពុជាកំពុងទទួលបានអត្ថប្រយោជន៍ពីរដ្ឋាភិបាលរបស់ប្រទេសចិននៃគម្រោងខ្សែក្រវាត់ ១ ផ្លូវ ១ ។ លោកបន្តថា កម្ពុជាក៏កំពុងទទួលអត្ថប្រយោជន៍ពីសង្គ្រាមពាណិជ្ជកម្មរវាងអាមេរិក និងចិនផងដែរ ជាពិសេសកិច្ចព្រមព្រៀងពាណិជ្ជកម្មសេរីកម្ពុជា ចិន នឹងត្រូវចុះហត្ថលេខាក្នុងពេលឆាប់ៗនេះ។
លោកបញ្ជាក់ថា៖ «ក្រុមហ៊ុនទាំង ២ នេះនឹងស្វែងរកឱកាសនេះ ដើម្បីវិនិយោគនៅប្រទេសយើង ដើម្បីផលិត និងនាំចេញទៅប្រទេសចិន អាមេរិក អឺរ៉ុប និងបណ្ដាប្រទេសអាស៊ានផងដែរ។ យើងរីករាយដែលមានក្រុមវិនិយោគិនជាច្រើនចូលមកវិនិយោគនៅក្នុងប្រទេសកម្ពុជា»។
លោក ហាក់ សេរី អ្នកគ្រប់គ្រងផ្នែកបម្រើសេវាអតិថិជននៅ PPSP បានប្រាប់ភ្នំពេញប៉ុស្ដិ៍កាលពីខែឧសភា ថា PPSP មានក្រុមហ៊ុនសរុប ១០៨ ដែលប្រតិបត្តិការនៅក្នុង PPSEZ។ លោកបន្តថា៖ «បច្ចុប្បន្នគម្រោងពេញអស់ហើយ។ យើងកំពុងគ្រោងនឹងពង្រីកទៅកាន់តំបន់ផ្សេងទៀត»។
PPSP បានរាយការណ៍ថា PPSEZ មានទំហំពាណិជ្ជកម្ម ១,១៣៩ ពាន់លានដុល្លារ កាលពីឆ្នាំមុន កើន ១៤ ភាគរយ ធៀបនឹងឆ្នាំ ២០១៨។
ទិន្នន័យក្រសួងសេដ្ឋកិច្ចបង្ហាញថា កម្ពុជាបាននាំចេញទំនិញតម្លៃ ២,៦៨ ពាន់លានដុល្លារ តាមរយៈតំបន់សេដ្ឋកិច្ចពិសេសកាលពីឆ្នាំមុន កើន ២៧ ភាគរយធៀបនឹងឆ្នាំ ២០១៨។
បច្ចុប្បន្នមានតំបន់សេដ្ឋកិច្ចពិសេសចំនួន ៥៤ ទីតាំង កំពុងដំណើរការនៅកម្ពុជា និងមានក្រុមហ៊ុន ៤៦៥ កំពុងប្រតិបត្តិការដោយបង្កើតការងារជាង ១០០ ០០០ កន្លែង៕ LA
