ភ្នំពេញ: ក្រុមហ៊ុនចិនចំនួន ២ គ្រោងនឹងធ្វើការវិនិយោគលើរោងចក្រដំឡើងរថយន្ត និងរោងចក្រកែច្នៃផលិតជីសរីរាង្គនៅកម្ពុជា។ នេះបើតាមតំណាងគណៈប្រតិភូមកពីខេត្តសាងតុងប្រទេស ចិន ដែលបានមកស្វែងរកឱកាសវិនិយោគនៅកម្ពុជាកាលពីសប្តាហ៍មុន។
យោងតាមទំព័រហ្វេសប៊ុកផ្លូវការរបស់ក្រសួងពាណិជ្ជកម្ម គណៈប្រតិភូមកពីខេត្តសាងតុងប្រទេស ចិន ដែលដឹកនាំដោយលោក វ៉ាង ស៊ូជាន (WANG SHUJIAN) សមាជិកគណៈកម្មាធិការអចិន្រៃ្តយ៍នៃគណៈកម្មាធិការបក្សខេត្ត និងជាអភិបាលរងខេត្តសានតុងបានជួបជាមួយលោក ប៉ាន សូរស័ក្តិ កាលពីថ្ងៃព្រហស្បតិ៍ដើម្បីពិភាក្សាពីការស្វែងរកឱកាសវិនិយោគនៅកម្ពុជា។
នៅក្នុងជំនួបនោះលោក វ៉ាង ស៊ូជាន បានដឹកនាំគណៈប្រតិភូតំណាងក្រុមហ៊ុនមកពីខេត្តសានតុងចំនួន ២០ ដើម្បីពិភាក្សាពីធុរកិច្ច និងការវិនិយោគនៅកម្ពុជា។ លោកបានឲ្យដឹងថា មានក្រុមហ៊ុនចិនចំនួន ២ បានបង្ហាញចំណាប់ក្នុងការវិនិយោគលើរោងចក្រដំឡើងរថយន្តនៅកម្ពុជាគឺក្រុមហ៊ុន Fu Lai Chun Group ខណៈក្រុមហ៊ុនមួយទៀតគឺក្រុមហ៊ុន Guomei Linqor Group គ្រោងនឹងធ្វើការវិនិយោគលើការកែច្នៃជីសរីរាង្គ។ លោកថ្លែងថា៖ «ខ្ញុំនឹងបន្តផ្សព្វផ្សាយ និងទាក់ទាញវិនិយោគមកពីខេត្តសានតុងមកវិនិយោគនៅកម្ពុជាឲ្យច្រើនបន្ថែមទៀត»។
ជាមួយគ្នានេះដែរលោក ប៉ាន សូរស័ក្តិ បានស្នើឲ្យលោក វ៉ាង ស៊ូជាន ជួយកៀរគរវិនិយោគិនចិនមកវិនិយោគបន្ថែមទៀតលើវិស័យផ្សេងៗផងដែរ ដូចជា កែច្នៃផលិតផលកសិកម្មសម្រាប់នាំចេញ ។ លោកថ្លែងថា៖ «កម្ពុជាមានសក្តានុពលខ្ពស់លើវិស័យកសិកម្ម ដូចជា ស្វាយ ចេក មៀន ដំឡូងមី និងស្រូវដែលកម្ពុជាកំពុងខ្វះរោងចក្រកែច្នៃ និងវេចខ្ចប់»។
មិនអាចទាក់ទងមន្ត្រីក្រសួងពាណិជ្ជកម្មដើម្បីបញ្ជាក់ពីព័ត៌មានលម្អិតទាក់ទងនឹងទំហំវិនិយោគ និងកាលបរិច្ឆេទនៃការមកវិនិយោគពិតប្រាកដរបស់ក្រុមហ៊ុនទាំងនោះបានទេកាលពីថ្ងៃម្សិលមិញ។
បើតាមក្រសួងពាណិជ្ជកម្មកម្ពុជា ទំហំពាណិជ្ជកម្មទ្វេភាគីរវាងកម្ពុជា និងចិនកាលពីឆ្នាំ ២០១៨ សម្រេចបាន ៦ ០៤០ លានដុល្លារកើនឡើង ១៣,៨ ភាគរយ បើប្រៀបធៀបនឹងឆ្នាំ ២០១៧។ ប្រទេសទាំង ២ ប្តេជ្ញាជំរុញទំហំពាណិជ្ជកម្មទ្វេភាគីឲ្យបានដល់ ៦ ០០០ លានដុល្លារនៅឆ្នាំ ២០២០។
កាលពីឆ្នាំ ២០១១ រោងចក្រដំឡើងរថយន្ត Hyundai នៅខេត្តកោះកុងត្រូវបានបើកដំណើរក្រោមការវិនិយោគរួមគ្នារវាងក្រុមហ៊ុន KH Motors និងក្រុមហ៊ុន លីយ៉ុងផាត់ (ខេមបូឌា)៕ LA