ភ្នំពេញៈ ក្រុមហ៊ុន Guangbo Group របស់ចិនបានបង្ហាញផែនការវិនិយោគលើផលិតផលសម្ភារការិយាល័យ និងកីឡា នៅកម្ពុជា។
ការបង្ហាញពីផែនការនេះធ្វើឡើងក្នុងជំនួបរវាងប្រធានរបស់ក្រុមហ៊ុននេះបានជួបជាមួយរដ្ឋមន្ដ្រីក្រសួងពាណិជ្ជកម្មកម្ពុជាកាលពីដើមសប្ដាហ៍នេះ។
សេចក្ដីប្រកាសព័ត៌មានរបស់ក្រសួងពាណិជ្ជកម្មបានឲ្យដឹងថា លោក Wang Liping ប្រធានក្រុមហ៊ុន Guang Bo Group បានជួបជាមួយលោក ប៉ាន សូរស័កិ្ដ រដ្ឋមន្ដ្រីក្រសួងពាណិជ្ជកម្មកម្ពុជា កាលពីថ្ងៃអង្គារ ដើម្បីចេញផ្សាយផែនការគម្រោងនេះ និងស្វែងរកព័ត៌មានវិនិយោគទាក់ទងនឹងផែនការសាងសង់រោងចក្រសម្រាប់ការផលិតសម្ភារការិយាល័យផ្នែកអប់រំ និងកីឡានៅក្នុងប្រទេស កម្ពុជា។
លោក Wang Liping បានថ្លែងថា៖ «យើងសន្យាថា នឹងពង្រីកការវិនិយោគដល់ប្រទេស កម្ពុជា ក្នុងការជំរុញទំនាក់ទំនងពាណិជ្ជកម្មរបស់ប្រទេសទាំងពីរស្ថិតក្រោមខ្សែក្រវាត់ និងផ្លូវ ដើម្បីបង្កើតការងារ និងប្រាក់ចំណូលសម្រាប់ប្រជាជនកម្ពុជា»។
លោក Wang មិនបានពន្យល់លម្អិតបន្ថែមលើពេលវេលាសម្រាប់ការអភិវឌ្ឍគម្រោងនេះទេ។ ក្រុមហ៊ុន Guangbo Group វិនិយោគលើផលិតផលជាច្រើនទាក់ទងនឹងផលិតផលសម្ភារការិយាល័យ ផលិតផលក្រដាសព្រីន និងផលិតផលប្លាស្ទិក នៅក្នុងប្រទេស ចិន និងលក់វានៅទីផ្សារក្នុងស្រុក និងបរទេសផងដែរ។
កាលពីខែមុន ក្រុមហ៊ុន Guangbo Group បានសម្ពោធការផលិតថ្មីមួយនៅក្នុងប្រទេស វៀតណាម ដែលជារោងចក្រនៅក្រៅប្រទេសលើកដំបូងរបស់ខ្លួន។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុន។
លោក ប៉ាន សូរស័ក្ដិ បានបង្ហាញការគាំទ្ររបស់លោក សម្រាប់គម្រោងវិនិយោគនេះ ដោយលើកឡើងថា ប្រទេស កម្ពុជា មានសក្ដានុពលវិនិយោគដ៏ធំ និងស្ថិតក្នុងទីតាំងភូមិសាស្ដ្រល្អមួយ។ លោកបន្ថែមថា កម្ពុជាមានគោលនយោបាយល្អមួយសម្រាប់តំបន់សេដ្ឋកិច្ចពិសេស (SEZ) និងការលើកទឹកចិត្តផ្សេងទៀតពីរដ្ឋាភិបាលដល់ក្រុមវិនិយោគិនបរទេស។
លោកថ្លែងថា៖ «ប្រទេស កម្ពុជា មាន SEZ ចំនួន ១៩ កំពុងប្រតិបត្តិការ ដើម្បីផ្ដល់ដល់ក្រុមវិនិយោគិនប្រតិបត្តិការរយៈពេល ៩ ឆ្នាំ ដោយលើកលែងពន្ធលើប្រាក់ចំណូល»។
លោកបន្ថែមថា វិនិយោគិនបរទេសអាចគ្រប់គ្រងអាជីវកម្ម ១០០ ភាគរយ និងអាចនាំចេញទៅទីផ្សារនៅក្នុងតំបន់អាស៊ាន ទីផ្សារអាមេរិក និងអឺរ៉ុបជាមួយនឹងផែនការអនុគ្រោះពន្ធពាណិជ្ជកម្មផងដែរ៕LA