ភ្នំពេញៈ ក្រុមហ៊ុនឥដ្ឋ ក្បឿង និងផលិតផលសេរ៉ាមិចមួយចំនួននៅប្រទេស ចិន គ្រោងនឹងវិនិយោគលើឧស្សាហកម្មនេះនៅកម្ពុជា ដើម្បីចាប់យកការរីកចម្រើនខ្លាំងនៅពេលបច្ចុប្បន្ននៃវិស័យសំណង់ និងអចលនទ្រព្យនៅកម្ពុជា។ នេះបើយោងតាមប្រធានសមាគមឧស្សាហកម្មឥដ្ឋ និងក្បឿងរបស់ប្រទេស ចិន។
អ្នកស្រី Xu Yanming ប្រធានសមាគមឥដ្ឋ និងក្បឿងដែលបានដឹកនាំក្រុមហ៊ុនមួយក្រុមមកទស្សនកិច្ចនៅកម្ពុជា បានលើកឡើងពីផែនការវិនិយោគនេះក្នុងអំឡុងកិច្ចប្រជុំជាមួយលោក ចម ប្រសិទ្ធ រដ្ឋមន្ដ្រីក្រសួងឧស្សាហកម្ម និងសិប្បកម្មនៅក្នុងក្រសួងកាលពីល្ងាចថ្ងៃព្រហស្បតិ៍។
អ្នកស្រីបានឲ្យដឹងថា មានក្រុមហ៊ុនចិនជាច្រើនដែលមានបទពិសោធខ្លាំងលើឧស្សាហកម្មឥដ្ឋ ក្បឿង និងផលិតផលសេរ៉ាមិចមើលឃើញសក្ដានុពលរបស់ឧស្សាហកម្មនេះនៅកម្ពុជា ខណៈវិស័យសំណង់របស់ប្រទេសនេះកំពុងរីកចម្រើន។ ក្រុមហ៊ុនទាំងនេះកំពុងស្វែងរកការគាំទ្រពីរដ្ឋាភិបាលកម្ពុជា និងស្ថាប័ន និងក្រសួងពាក់ព័ន្ធផ្សេងទៀតសម្រាប់ការវិនិយោគរបស់ពួកគេនៅកម្ពុជា។
អ្នកស្រីថ្លែងថា៖ «ក្រុមហ៊ុនចិនមានចំណាប់អារម្មណ៍ខ្លាំងលើការវិនិយោគនៅកម្ពុជា ខណៈសមាគមឥដ្ឋ និងក្បឿងចិនមានផលិតផលឥដ្ឋ និងក្បឿងល្បីល្បាញច្រើនរបស់ចិន ដែលកំពុងផលិតសម្រាប់ការនាំចេញទៅប្រទេសជាច្រើនជុំវិញពិភពលោក។ ដូច្នេះកម្ពុជានឹងក្លាយជាកន្លែងដ៏ល្អមួយសម្រាប់ពួកគេក្នុងការបង្កើតរោងចក្រផលិតនៅទីនេះ»។
ទន្ទឹមនឹងនេះលោក ចម ប្រសិទ្ធ រដ្ឋមន្ដ្រីក្រសួងឧស្សាហកម្ម និងសិប្បកម្មបានឲ្យដឹងថាច្បាប់ស្តីពីការវិនិយោគដែលមានភាពអំណោយផលរបស់កម្ពុជា និងការអភិវឌ្ឍយ៉ាងរហ័សនៃវិស័យសំណង់នឹងមានសក្ដានុពល និងឱកាសដ៏ធំធេងសម្រាប់ក្រុមហ៊ុនទាំងនោះក្នុងការវិនិយោគលើការផលិតសម្ភារណាមួយដើម្បីផ្គត់ផ្គង់ដល់វិស័យនេះ។
លោក ចម ប្រសិទ្ធ បានឲ្យដឹងបន្ថែមទៀតថា ទោះបីជាបច្ចុប្បន្នប្រទេសកម្ពុជាមានក្រុមហ៊ុន និងរោងចក្រជាច្រើនកំពុងផលិតឥដ្ឋ ក្បឿង និងផលិតផលសេរ៉ាមិចច្រើន ដើម្បីផ្គត់ផ្គង់ទីផ្សារក្នុងស្រុកក៏ដោយ ក៏ប្រទេសនេះនៅតែនាំចូលយ៉ាងច្រើនជាងរៀងរាល់ឆ្នាំដើម្បីឆ្លើយតបនឹងការកើនឡើងយ៉ាងរហ័សនៃតម្រូវការក្នុងស្រុក។
លោកថ្លែងថា៖ «ប្រសិនបើសមាជិកសមាគមចង់វិនិយោគនៅកម្ពុជា ដើម្បីផលិតផលិតផលមានគុណភាពខ្ពស់នោះនឹងជារឿងល្អ ហើយនឹងជួយកាត់បន្ថយការនាំចូល»។
លោករដ្ឋមន្ត្រីបានលើកទឹកចិត្តដល់ក្រុមហ៊ុនដែលចង់វិនិយោគនៅក្នុងឧស្សាហកម្មនេះឲ្យដាក់ពាក្យសុំការវិនិយោគនៅក្រុមប្រឹក្សាអភិវឌ្ឍន៍កម្ពុជា ដើម្បីមើលថាតើអ្វីដែលពួកគេនឹងទទួលបានការលើកទឹកចិត្តផ្នែកពន្ធ។
រដ្ឋាភិបាលកម្ពុជាបានអនុម័តការវិនិយោគមូលធនប្រហែល ៩,៣ ពាន់លានដុល្លារនៅក្នុងវិស័យសំណង់ក្នុងឆ្នាំ ២០១៩ ដែលកើនឡើងខ្លាំងជិត ៨០ ភាគរយ ធៀបនឹងឆ្នាំ ២០១៨ ដោយភាគច្រើននៃកំណើននេះបានមកពីការសាងសង់នៅខេត្តព្រះសីហនុ។ នេះបើយោងតាមក្រសួងរៀបចំ ដែនដី នគរូបនីយកម្ម និងសំណង់ (MLMUC)៕ LA