ភ្នំពេញ: ក្រុមហ៊ុនរុករកប្រេងដែលគ្រប់គ្រងដោយវិនិយោគិនចិនកាលពីចុងឆ្នាំ ២០១៩ បានទទួលអាជ្ញាប័ណ្ណរយៈពេល ៣ ឆ្នាំ ដើម្បីសិក្សាស្វែងរកប្រេងកាតនៅក្នុងប្លុក D ក្នុងឈូងសមុទ្រថៃនៃដែនសមុទ្រកម្ពុជា។ នេះបើយោងតាមមន្ត្រីជាន់ខ្ពស់នៃអគ្គនាយកដ្ឋានប្រេងកាត។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ក្រសួងបានចុះកិច្ចព្រមព្រៀងស្តីពីការសិក្សាស្វែងរកប្រេងកាតជាមួយក្រុមហ៊ុន Cambodian Resources Energy Development Co., Ltd កាលពីចុងខែធ្នូ ឆ្នាំ ២០១៩។
លោកបន្តថា ក្រុមហ៊ុននឹងចាប់ផ្តើមសិក្សាស្វែងរកប្រេងកាតក្នុងប្លុក D ក្នុងដែនសមុទ្រកម្ពុជានៅឆ្នាំនេះ។
លោកថ្លែងថា៖ «ពួកគាត់នឹងចាប់សិក្សានៅឆ្នាំនេះទៅលើទិន្នន័យពីឯកសារផ្សេងៗដើម្បីធ្វើការវាយតម្លៃជំហានដំបូង ហើយជំហានបន្តបន្ទាប់ទៀតពួកគេអាចនឹងធ្វើការសិក្សាស្វែងរកប្រេងកាតនៅប្លុក D ក្នុងដែនសមុទ្រ»។ លោកបានបន្តថា៖ «ប្រសិនបើគាត់រកឃើញថា មានសក្តានុពលប្រេងដែលផ្តល់សក្តានុពលសេដ្ឋកិច្ច ពួកគេនឹងឈានទៅធ្វើការអភិវឌ្ឍ ដើម្បីផលិតប្រេង។ ខ្ញុំគិតថា វានឹងត្រូវការពេលយូរឆ្នាំទៀត»។
លោកបញ្ជាក់ថា ក្រសួងកំពុងខិតខំប្រឹងប្រែងក្នុងការទាក់ទាញអ្នកវិនិយោគមកវិនិយោគលើវិស័យរ៉ែ និងថាមពលនៅកម្ពុជា។ លោកបានបន្ថែមថា ៖ «ការផ្តល់កិច្ចព្រមព្រៀងប្រេងកាតនេះក្នុងគោលបំណងជំរុញឲ្យមានសកម្មភាពសិក្សាស្រាវជ្រាវស្វែងរក ដើម្បីឈានទៅរកឲ្យឃើញពីសក្តានុពលធនធានប្រេងកាតបន្ថែមទៀត។ ប្រសិនបើគាត់រកឃើញពីសក្តានុពលប្រេងវាជាការជោគជ័យរបស់ពួកយើង។ ការងាររបស់យើងធ្វើយ៉ាងណាជំរុញឲ្យមានក្រុមហ៊ុនមកច្រើនមកបណ្តាក់ទុនវិនិយោគ ដើម្បីសិក្សាស្វែងរកធនធានប្រេងកាតដែលកំពុងមានសក្តានុពលនេះ»។
តំបន់ប្រេងប្លុក D មានផ្ទៃក្រឡា ៥ ៥០០ គីឡូម៉ែត្រក្រឡានៅក្នុងឈូងសមុទ្រថៃដែលក្រសួងធ្លាប់បានផ្តល់អាជ្ញាប័ណ្ណដល់ក្រុមហ៊ុនក្នុងស្រុក CPHL Cambodia។ ប៉ុន្តែត្រូវបានរដ្ឋាភិបាលដកយកអាជ្ញាប័ណ្ណមកវិញកាលពីខែមីនា ឆ្នាំ ២០១៦ ដោយសារក្រុមហ៊ុននេះមិនគោរពតាមកិច្ចព្រមព្រៀង។
បើតាមលោក ជៀប សួរ កម្ពុជាបែងចែកតំបន់រុករកប្រេងកាតចំនួន ៦ ប្លុកនៅដែនសមុទ្រ និង ១៩ ប្លុកនៅដែនគោក។ លោកអះអាងថា ក្រសួងក៏កំពុងធ្វើការចរចាកិច្ចព្រមព្រៀងជាមួយក្រុមហ៊ុនកាណាដា EnerCam Co ដើម្បីសិក្សាស្វែងរកប្រេងនៅក្នុងប្លុក VIII ផងដែរ។ លោកថ្លែងថា៖ «ខ្ញុំរំពឹងថានឹងសម្រេចបានកិច្ចព្រមព្រៀងអាជ្ញាប័ណ្ណសិក្សាស្វែងរកប្រេងនៅប្លុកនេះជាមួយក្រុមហ៊ុនឆាប់ៗនេះដែលបច្ចុប្បន្ន យើងកំពុងធ្វើការពន្លឿនការងាររបស់យើងរួមគ្នា»។
ក្រុមហ៊ុន KrisEnergy ដែលមានមូលដ្ឋាននៅសិង្ហបុរីគឺបច្ចុប្បន្នកំពុងធ្វើការអភិវឌ្ឍគម្រោងប្រេងអប្សរាក្នុងប្លុក A ក្នុងដែនសមុទ្រកម្ពុជាដែលក្រុមហ៊ុនមានគោលដៅផលិតតំណក់ប្រេងលើកដំបូងនៅពាក់កណ្តាលឆ្នាំ ២០២០ នេះ។ ក្រុមហ៊ុនរំពឹងថានឹងទទួលបានប្រេង ៧ ៥០០ បារ៉ែលក្នុង ១ ថ្ងៃ៕LA