សៀមរាប: តំណាងក្រុមហ៊ុន Mizuda Waste Management Co., Ltd មកពីប្រទេសចិនបានបង្ហាញលទ្ធផលសិក្សាស្រាវជ្រាវលើគម្រោងសាងសង់រោងចក្រផលិតថាមពលអគ្គិសនីដើរដោយការដុតសំរាមដល់ថ្នាក់ដឹកនាំខេត្តសៀមរាប ខណៈមន្ត្រីខេត្តនេះបានអះអាងពីការគាំទ្រចំពោះផែនការវិនិយោគនាពេលអនាគត។
ក្នុងជំនួបកាលពីថ្ងៃអង្គារលោក Zhang Xiaozhong តំណាងក្រុមហ៊ុនចិន Mizuda Waste Management Co., Ltd ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Mizuda Group ដែលមានការិយាល័យកណ្តាលនៅទីក្រុង Huzhou ខេត្ត Zhejiang បានបង្ហាញថា រោងចក្រថាមពលអគ្គិសនីដែលក្រុមហ៊ុនខ្លួនគ្រោងវិនិយោគនោះនឹងមានតម្រូវការសំរាមប្រមាណ ២១ ម៉ឺនតោន ក្នុង ១ ឆ្នាំ សម្រាប់ដុតបំប្លែងជាថាមពលអគ្គិសនីដែលអាចបង្កើតថាមពលបាន ១២ មេហ្កាវ៉ាត់ ឬប្រហែល ១០ ភាគរយនៃតម្រូវការអគ្គិសនីសរុបនៅក្នុងខេត្តសៀមរាប។
ការសិក្សាបានរកឃើញថា ក្រុងសៀមរាបនឹងមានសំរាមប្រមាណ ៦០០ តោនក្នុង ១ ថ្ងៃនៅឆ្នាំ ២០២២ ដែលប្រហាក់ប្រហែលនឹងក្រុមហ៊ុនត្រូវការ និងឆ្នាំ ២០៣៥ បរិមាណសំរាមនឹងកើនដល់ ១ ០០០ តោនក្នុង ១ ថ្ងៃ។
លោក Zhang ត្រូវបានដកស្រង់សម្តីផ្សព្វផ្សាយដោយមន្ត្រីសាលាខេត្តសៀមរាបដោយនិយាយថា៖ «ភាគីទាំង ២ បានទទួលស្គាល់អំពីបច្ចេកទេស និងអត្ថប្រយោជន៍នៃប្រតិបត្តិការរបស់រោងចក្រដុតសំរាមមួយនេះ ដែលវាមានគុណភាពសម្អាតបរិស្ថានល្អ ហើយផ្តល់អគ្គិសនីប្រើប្រាស់ថែមទៀត»។
មន្ត្រីសាលាខេត្តសៀមរាបជាច្រើនមិនអាចសុំព័ត៌មានលម្អិតបន្ថែមបានទេកាលពីថ្ងៃម្សិលមិញអំពីទំហំទុនវិនិយោគ ទីតាំង និងកាលបរិច្ឆេទវិនិយោគ។
ប៉ុន្តែក្នុងជំនួបជាមួយលោក Zhang លោក ទៀ សីហា អភិបាលខេត្តសៀមរាប បានបង្ហាញជំហរគាំទ្រចំពោះគម្រោងនេះ ដោយអះអាងពីប្រសិទ្ធភាពនៃកិច្ចការពារបរិស្ថាន។
លោកបានលើកឡើងថា អាជ្ញាធរខេត្តនឹងសិក្សាបន្ថែមទៀតពីការប្រមូលសំរាម ការកំណត់តម្លៃលក់ថាមពលអគ្គិសនី ការកំណត់ទីតាំងសាងសង់រោងចក្រជាដើម។
លោកថា៖ «គម្រោងវិនិយោគរបស់ក្រុមហ៊ុនចិននេះនឹងក្លាយជាឧបករណ៍រក្សាការពារបរិស្ថាន ដំបូងគេនៅកម្ពុជា»។
លោក វិចទ័រ ហ្សូនា អ្នកនាំពាក្យក្រសួងរ៉ែ និងថាមពលប្រាប់ភ្នំពេញប៉ុស្តិ៍កន្លងមកថា ទោះបីការវិនិយោគលើរោងចក្រផលិតថាមពលពីការដុតសំរាមមានតម្លៃផលិតខ្ពស់ រដ្ឋាភិបាលនៅតែជំរុញឲ្យមានការវិនិយោគលើគម្រោងនេះ ព្រោះកម្ពុជានឹងប្រឈមកង្វះខាតកន្លែងចាក់សំរាមក្នុងពេលអនាគត។
លោកថ្លែងថា៖ «កន្លងមកក៏មានក្រុមហ៊ុនជាច្រើនធ្លាប់បានសិក្សាពីលទ្ធភាពក្នុងការវិនិយោគលើរោងចក្រផលិតអគ្គិសនីពីការដុតសំរាមនេះដែរ ប៉ុន្តែវាត្រូវបានគេទុកចោលជាបន្តបន្ទាប់ ដោយសារតែតម្លៃផលិតកម្មខ្ពស់ធៀបនឹងប្រភពថាមពលផ្សេងទៀតដែលធ្វើឲ្យរដ្ឋពិបាកក្នុងការទិញយកមកដាក់បញ្ចូលទៅក្នុងបណ្តាញជាតិ»៕ LA