.jpg)
ទិដ្ឋភាពបង្គោលភ្លើងនៅពេលថ្ងៃលិចនៅតាមមហាវិថីហាណូយ ក្នុងទីក្រុងភ្នំពេញកន្លងមក។ ហេង ជីវ័ន
ភ្នំពេញ: ក្រុមហ៊ុនចិន China Machine-Building International Corporation (CMIC) ដែលជាផ្នែកមួយរបស់ក្រុមហ៊ុន CNEG ជាបុត្រសម្ព័ន្ធរបស់ក្រុមហ៊ុន Sinomach បានចុះហត្ថលេខាលើកិច្ចព្រមព្រៀងសហប្រតិបត្តិការភាពជាដៃគូជាមួយក្រុមហ៊ុនកម្ពុជា SNTP ស្តីពីគម្រោងថាមពលអគ្គិសនីនៅកម្ពុជា។ នេះបើតាមសេចក្តីប្រកាសព័ត៌មានរបស់ក្រុមហ៊ុន។
លោក Lu Wenjun ប្រធានក្រុមហ៊ុន CNEG បានឲ្យដឹងថា ការចុះកិច្ចព្រមព្រៀងធ្វើឡើងកាលពីសប្តាហ៍មុននៅទីក្រុងប៉េកាំង ស្តីពីគ្រោងអនុស្ថានីយ និងបណ្តាញបញ្ជូនអគ្គិសនីនៅខេត្តព្រះសីហនុ។
លោកបានសន្យាថា ក្រុមហ៊ុននឹងបំពាក់បច្ចេកវិទ្យា និងរៀបចំឲ្យបានល្អបំផុតក្នុងគម្រោងនេះ ឲ្យដូចទៅនឹងគ្រោងមុនដែរ ដើម្បីធានាដំណើរការឲ្យរលូន។ លោកថ្លែងថា៖ «គម្រោងនេះនឹងជួយកាត់បន្ថយការខ្វះខាតថាមពលអគ្គិសនីក្នុងស្រុក និងជំរុញការអភិវឌ្ឍសេដ្ឋកិច្ចនៅកម្ពុជា»។
បើយោងតាមសេចក្តីប្រកាសព័ត៌មាន គម្រោងនេះនឹងរួមបញ្ជូនទាំងការសាងសង់អនុស្ថានីយប្រព័ន្ធបច្ចេកវិទ្យាថ្មីចំនួន ២ មានបណ្តាញបញ្ជូនប្រវែង ២៧ គីឡូម៉ែត្រ សម្រាប់ថាមពល ២៣០ គីឡូវ៉ុល និង ១១៥ គីឡូវ៉ុល។
ទោះបីយ៉ាងណា ក្រុមហ៊ុននេះមិនបានបង្ហាញពីព័ត៌មានលម្អិតនៃការចាប់ផ្តើមគ្រោង តម្លៃ និងទីកន្លែងជាក់លាក់នៃស្ថានីយនោះទេ។
លំហូរវិនិយោគិនចិនយ៉ាងគំហុកនៅខេត្តព្រះសីហនុនៅ ២ ទៅ ៣ ឆ្នាំចុងក្រោយនេះ បានជំរុញឲ្យតម្រូវការប្រើប្រាស់ថាមពលអគ្គិសនីច្រើន។
លោក វិចទ័រ ហ្សូនា អ្នកនាំពាក្យក្រសួងរ៉ែ និងថាមពល បានប្រាប់ភ្នំពេញប៉ុស្តិ៍ថា គ្រោងនេះនឹងជួយបំពេញតម្រូវការប្រើប្រាស់ថាមពលអគ្គិសនីនៅខេត្តព្រះសីហនុដែលកំពុងខ្វះខាត។ លោកបានថ្លែងថា៖ «គ្រោងនេះនឹងជួយបំពេញតាមតម្រូវការរបស់អ្នកវិនិយោគ សម្រាប់ការកំណើនសំណង់អគារ ដូចជាធនាគារ សណ្ឋានាគារ ជាដើម»។
បើតាម លោក ហ្សូនា គម្រោងនេះនឹងបញ្ជូនបណ្តាញថាមពលអគ្គិសនីពីរោងចក្រថាមពលធ្យូងថ្មនៅស្រុកស្ទឹងហាវ។
លោកបន្តថា៖ «អនុស្ថានីយនេះ នឹងបញ្ជូនបណ្តាញថាមពលអគ្គិសនីរោងចក្រថាមពលធ្យូងថ្ម សម្រាប់ផ្គត់ផ្គង់នៅក្នុងខេត្តទាំងមូល»។
លោក ឃាង ភារម្យ អ្នកនាំពាក្យសាលាខេត្តព្រះសីហនុ បានឲ្យដឹងថា គ្រោងនេះនឹងផ្តល់ផលប្រយោជន៍ដល់ប្រជាពលរដ្ឋចំនួន ២២ ម៉ឺននាក់ នៅក្នុងព្រះសីហនុ រួមទាំងអ្នកវិយោគចិនផងដែរ។ លោកថ្លែងថា៖ «បើការផ្គត់ផ្គង់ថាមពលអគ្គិសនីគ្រប់គ្រាន់តាមតម្រូវការ វានឹងអាចទាក់ទាញវិនិយោគិនកាន់តែច្រើនមកខេត្តយើង»។
បច្ចុប្បន្នមានរោងចក្រផលិតថាមពលអគ្គិសនីពីធ្យូងថ្ម ២ កំពុងដំណើរការនៅខេត្តព្រះសីហនុ គឺក្រុមហ៊ុន CIIDG និងក្រុមហ៊ុនម៉ាឡេស៊ី Leader Universal Holdings។
CIIDG បច្ចុប្បន្នសិក្សាលើគម្រោងទី២ របស់ខ្លួនដែលអាចផលិតថាមពលអគ្គិសនីបាន ៧០០ មេហ្គាវ៉ាត់ នៅក្នុងខេត្តព្រះសីហនុ ទោះបែបនេះក្តីការសាងសង់មិនទាន់ត្រូវបានកំណត់ពេលនោះទេ៕
