ភ្នំពេញ: ក្រុមហ៊ុន Hainan Starlight Chemical Co.,Ltd មកពីប្រទេសចិនចាប់អារម្មណ៍ក្នុងការវិនិយោគលើការបង្កើតរោងចក្រចម្រាញ់ប្រេងកាតនៅកម្ពុជា ស្របពេលដែលក្រុមហ៊ុនប្រេងរបស់សិង្ហបុរី KrisEnergy ក៏មានផែនការក្នុងការទាញយកដំណក់ប្រេងដំបូងក្នុងចុងឆ្នាំនេះផងដែរ។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលបានថ្លែងប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា ក្រុមហ៊ុន Hainan Starlight Chemical Co.,Ltd បានមកជួបពិភាក្សាជាមួយលោក ស៊ុយ សែម រដ្ឋមន្ត្រីក្រសួងរ៉ែ និងថាមពលអំពីសក្តានុពលនៃគម្រោងវិនិយោគលើវិស័យប្រេង និងឧស្ម័ននៅទីស្តីការក្រសួងកាលពីថ្ងៃពុធ។
លោកបានថ្លែងយ៉ាងដូច្នេះថា៖ «ក្រុមហ៊ុននេះបានបង្ហាញអំពីចំណាប់អារម្មណ៍ក្នុងការបង្កើតរោងចក្រចម្រាញ់ប្រេងកាតនៅប្រទេសកម្ពុជា។ ក្រសួងរ៉ែ និងថាមពលសូមស្វាគមន៍សម្រាប់ការស្វែងរកឱកាសនៃវិនិយោគ និងការអភិវឌ្ឍវិស័យប្រេងកាតនេះឱ្យកាន់តែរីកចម្រើនបន្ថែមទៀត។ យើងបានស្នើឱ្យក្រុមហ៊ុនធ្វើការដាក់ពាក្យស្នើសុំធ្វើការវិនិយោគដែលត្រូវគោរពតាមច្បាប់ និងបទប្បញ្ញត្តិនានាដែលបានកំណត់ដើម្បីធ្វើការសិក្សាអំពីលទ្ធភាពវិនិយោគនេះ»។
លោកថា ក្រសួងមិនទាន់ដឹងច្បាស់ថាតើក្រុមហ៊ុនមានចំណាប់អារម្មណ៍ធ្វើការវិនិយោគក្នុងខេត្តណា ឬនៅក្នុងប្លុកប្រេងកាតណាមួយនៅឡើយនោះទេ ដោយសារក្រុមហ៊ុនទាមទារពេលវេលាលើការសិក្សាអំពីវិស័យនេះជាមុនសិន។ លោកថា បច្ចុប្បន្ននៅដែនសមុទ្រនៅសល់ប្លុកដែលទំនេរចំនួន ៤ និងនៅដែនគោកនៅសល់ប្លុកសម្រាប់សិក្សាស្រាវជ្រាវរកប្រេង ១៨ ប្លុកទៀត។
បច្ចុប្បន្នកម្ពុជាក៏មានការវិនិយោគរួមគ្នារវាងក្រុមហ៊ុនក្នុងស្រុក Cambodian Petrochemical Company (CPC) និងក្រុមហ៊ុនចិន Sinomach China Perfect Machinery Industry Corp ទៅលើរោងចក្រចម្រាញ់ប្រេងនេះដែលគ្រោងនឹងត្រូវបានសាងសង់នៅលើផ្ទៃដី ៨០ ហិកតានៃទឹកដីខេត្តព្រះសីហនុជាប់នឹងខេត្តកំពតដែលអាចចម្រាញ់ប្រេងបាន ៥ លានតោន ក្នុង ១ ឆ្នាំ។
រោងចក្រនេះត្រូវបានចាប់ផ្តើមសាងសង់នៅពាក់កណ្តាលឆ្នាំ ២០១៧ ដែលមានទំហំ ៣៦៥ ម៉ែត្រការ៉េក្នុងដំណាក់កាលទី ១ បន្ទាប់ពីត្រូវបានពន្យារពេលជាច្រើនលើកដោយសារតែបញ្ហាផ្ទៃក្នុង។
ក្រុមហ៊ុនបានឱ្យដឹងថា ក្នុងដំណាក់កាលពីទី ១ នៃគម្រោងទាំងមូល ២ ដំណាក់កាលនឹងត្រូវចំណាយថវិកា ៦២០ លានដុល្លារដែលអាចចម្រាញ់ប្រេងបានប្រហែល ២ លានតោន ក្នុង ១ ឆ្នាំ។ ផលិតប្រេងដែលចម្រាញ់ចេញពីរោងចក្រនេះសម្រាប់ផ្គត់ផ្គង់តែក្នុងទីផ្សារក្នុងស្រុកប៉ុណ្ណោះ។
បើយោងតាមលោក ជៀប សួរ បច្ចុប្បន្នបានផ្អាកការសាងសង់របស់ខ្លួនជាបណ្តោះអាសន្នដោយសារតែបញ្ហាផ្ទៃក្នុងនៃដៃគូសហការ។
លោកថា មកទល់ពេលនេះក្រុមហ៊ុនមិនទាន់ផ្តល់ព័ត៌មាននៃការចាប់ផ្តើមដំណើការសាងសង់ឡើងវិញនៅឡើយទេ។
កាលពីចុងខែសីហាកន្លងមកនេះក្រុមហ៊ុន KrisEnergy ដែលកំពុងអភិវឌ្ឍអណ្ដូងប្រេងអប្សរាក្នុងសមុទ្រនៅក្នុងប្លុក A កម្ពុជា បានឲ្យដឹងថា ការកសាងផ្លាតហ្វមក្បាលអណ្ដូងផលិតកម្ម សម្រាប់ការអភិវឌ្ឍអណ្ដូងប្រេងកាតអប្សរា កំពុងត្រូវបានដឹកជញ្ជូន ផ្លាតហ្វមក្បាលអណ្ដូងផលិតកម្មមក និងបានដំឡើងលើដែនទឹកនៃប្រទេសកម្ពុជា ដែលជាជំហានវិជ្ជមានមួយឆ្ពោះទៅទិសដៅរបស់ក្រុមហ៊ុននៃការទាញយកប្រេងនៅឆ្នាំនេះ។
ក្រុមហ៊ុននេះបន្តឱ្យដឹងទៀតថា ការកសាងផ្លាតហ្វមខ្នាតតូចសម្រាប់ការអភិវឌ្ឍអណ្ដូងប្រេងកាតដំបូងគេបង្អស់របស់ប្រទេសកម្ពុជាបានចាប់ផ្ដើមកាលពីដើមខែធ្នូ ឆ្នាំ ២០១៩ នៅឯរោងចក្ររបស់ក្រុមហ៊ុន NOV’s PT Profab1 ដែលស្ថិតនៅកោះបាតាម ប្រទេសឥណ្ឌូនេស៊ី។ ការលើកដាក់ និងការដឹកចេញផ្លាតហ្វមខ្នាតតូចនេះបានចប់សព្វគ្រប់នៅថ្ងៃទី ២៥ ខែ សីហា ឆ្នាំ ២០២០ កន្លងមកនេះ។ ប្រេងនៅតំបន់អប្សរានេះត្រូវបានរំពឹងថា នឹងឈានដល់អត្រាផលិតកម្មខ្ពស់បំផុត ៧ ៥០០ បារ៉ែល ក្នុង ១ ថ្ងៃ៕