ភ្នំពេញៈ ក្រុមហ៊ុនចុះបញ្ជីចំនួន ៧ នៅផ្សារមូលបត្រកម្ពុជា (CSX) បានរាយការណ៍អំពីការទទួលរងនូវឥទ្ធិពលនៃវិបត្តិកូវីដ១៩មកលើប្រតិបត្តិការអាជីវកម្មរបស់ខ្លួនក្នុងឆមាសទី ១ នេះ។
ក្រុមហ៊ុនកំពង់ផែស្វយ័តក្រុងព្រះសីហនុ (PAS) បានរាយការណ៍ពីប្រាក់ចំណូលថាបានធ្លាក់ចុះ ៧,៤៤ ភាគរយ ដែលមានចំនួន ៦ ០៧៤ ៥៨៤ ០០០ រៀលនៅត្រីមាសទី ២ ឆ្នាំនេះ បើធៀបនឹងរយៈពេលដូចគ្នាកាលពីឆ្នាំ ២០១៩ ខណៈដែលប្រាក់ចំណេញសុទ្ធក្រោយពីបង់ពន្ធរួចបានកើនឡើង ៧ ២០១ ៥០៤ ០០០ រៀល ស្មើនឹង ៦៣២,៤៨ ភាគរយ។
លោក លូ គីមឈុន ជាប្រធាន និងអគ្គនាយកនៅក្នុងឯកសារផ្ញើទៅ CSX ត្រូវបានដកស្រង់សម្ដីថា៖ «នេះគឺជាលទ្ធផលនៃការធ្លាក់ចុះការដឹកជញ្ជូនទំនិញជាទូទៅ ដោយសារតែផលប៉ះពាល់ដោយសារតែការរីករាលដាលជំងឺកូវីដ ១៩ ទូទាំងពិភពលោកលើកំណើនសេដ្ឋកិច្ច»។
រដ្ឋាករទឹកស្វយ័តក្រុងភ្នំពេញ (PPWSA) ក៏បានរាយការណ៍ថា នៅត្រីមាសទី ២ ឆ្នាំ ២០២០ ប្រាក់ចំណូលបានកើនឡើង ១៧,៩ ពាន់លានរៀល ឬ ៣១,៤១ ភាគរយ ប្រាក់ចំណេញប្រតិបត្តិការបានកើនឡើង ៨,៣ ពាន់លានរៀល ឬ ៤៥,០១ ភាគរយ និងប្រាក់ចំណេញបានកើនឡើង ៦,៥ ពាន់លានរៀល ឬ ៧១,៤៤ ភាគរយធៀបត្រីមាសដូចគ្នា។
កំពង់ផែស្វយ័តក្រុងភ្នំពេញ (PPAP) បានរាយការណ៍ថា ក្នុងរយៈពេល ៦ ខែដំបូងឆ្នាំ ២០២០ ប្រាក់ចំណូលសរុបមានចំនួនជិត ១៣ លានដុល្លារសម្រេចបាន ៤៤,៦៥ ភាគរយនៃផែនការឆ្នាំ ២០២០ ហើយបើធៀបនឹងរយៈពេល ៦ ខែដំបូងឆ្នាំ ២០១៩ បានកើនឡើងចំនួនជាង $១ លាន ឬ ១១,៣០ ភាគរយ។
ទោះយ៉ាងណាប្រាក់ចំណេញសុទ្ធនៅរយៈពេល ៦ ខែដំបូងឆ្នាំ ២០២០ មានចំនួនតែជាង ៤,៥ លានដុល្លារសម្រេចបាន ៤០,៦៣ ភាគរយនៃផែនការឆ្នាំ ២០២០ បានធ្លាក់ចុះមកនៅត្រឹម ៨២៣ ៤៨៧ ដុល្លារ ឬ ១៤,៤៥ ភាគរយធៀបនឹង ៦ ខែដំបូងនៃឆ្នាំមុន។
លោក Yves Jacquot ប្រធានធនាគារ ABA Bank បានឲ្យដឹងនៅក្នុងឯកសារផ្ញើទៅ CSX ថាក្រុមហ៊ុនជាច្រើននៅកម្ពុជាបន្តជួបប្រទះផលប៉ះពាល់ដោយសារតែការថមថយល្បឿនសេដ្ឋកិច្ច ដោយសារតែការរីករាលដាលជំងឺកូវីដ១៩ទូទាំងពិភពលោក។ នៅត្រីមាសទី ២ ABA មាន កម្ចីអាជីវកម្មចំនួន ៦ ១១៤ មានតម្លៃ ៣២២,៥ លានដុល្លារអាមេរិក ហើយកម្ចីនេះអាចបង្កើនផលបត្រកម្ចីដុលចំនួន ៤,២ ភាគរយដល់ ៣,១ ពាន់លានដុល្លារធៀបនឹងរយៈពេលដូចគ្នាកាលពីត្រីមាសមុន។
លោកបានថ្លែងថា៖ «ធនាគារ ABA នឹងបន្តជួយអ្នកខ្ចីប្រាក់របស់ខ្លួន ដើម្បីជម្នះពេលវេលាដ៏ពិបាកតាមរយៈការរៀបចំឥណទានឡើងវិញរបស់ខ្លួន»។ លោកបន្តថា នៅត្រីមាសទី ២ ឆ្នាំ ២០២០ ធនាគារនេះបានរៀបចំឥណទានឡើងវិញចំនួន ៨ ៥០៩ មានតម្លៃ ៤៣៥,៧ លានដុល្លារអាមេរិក។
ក្រុមហ៊ុន LOLC (Cambodia) Plc ដែលបានចេញសញ្ញាបណ្ណសាជីវកម្មរយៈពេល ៦ ខែ ឆ្នាំ ២០២០ ក្រុមហ៊ុនមានប្រាក់ចំណូលលើអត្រាការប្រាក់សរុបចំនួន ៣០៥ ៩៥៧ លានរៀល កើនឡើងចំនួន ៩៤ ០៤៨ លានរៀល ស្មើនឹង ៤៤ ភាគរយបើធៀបនឹងរយៈពេលដូចគ្នាកាលពីឆ្នាំមុន និងប្រាក់ចំណេញសុទ្ធចំនួន ៨៥ ៧៣៥ លានរៀលកើនឡើង ២១ ភាគរយធៀបនឹងរយៈពេលដូចគ្នាកាលពីឆ្នាំមុន។
លោក Jong Weon Ha អនុប្រធាន CSX បានឲ្យដឹងថា ប្រតិបត្តិការរបស់ក្រុមហ៊ុនចុះបញ្ជីខុសគ្នាទៅតាមឧស្សាហកម្ម ដែលពួកគេកំពុងធ្វើ។ ទោះយ៉ាងណា ប្រតិបត្តិការជារួមកំពុងមានភាពវិជ្ជមានខ្លាំងបំផុតនៅក្នុងពេលរីករាលដាលជំងឺកូវីដ ១៩ នេះ។
លោកលើកឡើងថា៖ «ការរីករាលដាលជំងឺកូវីដ១៩ បានប៉ះពាល់ដល់អាជីវកម្មរបស់ក្រុមហ៊ុនចុះបញ្ជីនៅ CSX ទោះយ៉ាងណា យើងមិនគួរមានការបារម្ភពេកនោះទេដោយសារតែក្រុមហ៊ុនទាំងនោះកំពុងដំណើរការអាជីវកម្មបានល្អ ហើយផលប៉ះពាល់គ្រាន់តែមានការថមថយល្បឿននៃកំណើនតែប៉ុណ្ណោះ»៕LA