ភ្នំពេញៈ ចំនួនក្រុមហ៊ុន និងសហគ្រាសចុះបញ្ជីពាណិជ្ជកម្មថ្មីនៅក្រសួងពាណិជ្ជកម្មក្នុងឆ្នាំ ២០២០ មានចំនួន ៧ ៨៦០ ធ្លាក់ចុះ ៤០,៧២ ភាគរយធៀបនឹងឆ្នាំ ២០១៩ ដែលមានចំនួន ១៣ ២៥៩។
ទិន្នន័យក្រសួងពាណិជ្ជកម្មបង្ហាញថា ក្នុងចំណោមនោះ ការចុះបញ្ជីក្រុមហ៊ុនពាណិជ្ជកម្មមាន ៥ ៦៧៧ ក្រុមហ៊ុនធ្លាក់ចុះ ៣៩,២៤ ភាគរយ ធៀបនឹងឆ្នាំ ២០១៩ មានចំនួន ៩ ៣៤៤។ ចំណែកការចុះបញ្ជីពាណិជ្ជកម្មដល់សហគ្រាសឯកបុគ្គលថ្មីមាន ២ ១៨៣ ធ្លាក់ ៤៤,២៤ ភាគរយពីចំនួន ៣ ៩១៥។
ជាមួយគ្នានេះដែរ មានក្រុមហ៊ុនសហគ្រាសចំនួន ៥០០ ត្រូវបានស្នើសុំលុបឈ្មោះចេញពីបញ្ជីពាណិជ្ជកម្មដែលចំនួននេះកើនឡើង ១៨៧ ភាគរយពី ១៧៤ កាលពីឆ្នាំ ២០១៩។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានឱ្យដឹងក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ ២០២០ កាលពីថ្ងៃទី ១ ខែមេសានេះថា ក្រសួងប្តេជ្ញាខិតខំធ្វើពិពិធកម្មទីផ្សារ និងទាក់ទាញវិនិយោគថ្មីៗបន្ថែមតាមរយៈការចរចាបង្កើតតំបន់ពាណិជ្ជកម្មសេរីទ្វេភាគី និងពហុភាគី។ លោកបន្តថា ជាមួយគ្នានេះក្រសួងក៏នឹងពង្រឹងវិស័យកម្មសិទ្ធិបញ្ញា និងកិច្ចការពារអ្នកប្រើប្រាស់ ការលើកកម្ពស់សេវាសាធារណៈ និងសម្រួលការធ្វើធុរកិច្ចបន្ថែមទៀតផងដែរ។
លោកឱ្យដឹងថា៖ «ក្រសួងកំពុងខិតខំពង្រឹងសមត្ថភាព និងប្រសិទ្ធភាពការងាររបស់មន្ត្រីថែមទៀត ដើម្បីចូលរួមប្រកួតប្រជែងក្នុងក្របខ័ណ្ឌតំបន់ និងពិភពលោកតាមរយៈការពង្រឹងធនធានមនុស្ស ការធ្វើកំណែទម្រង់រចនាសម្ព័ន្ធរដ្ឋបាល និងគ្រប់គ្រង ការអភិវឌ្ឍស្ថាប័នរួមទាំងកសាងច្បាប់ និងលិខិតបទដ្ឋានគតិយុត្តពាក់ព័ន្ធវិស័យពាណិជ្ជកម្ម»។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (បណ្ឌិត្យសភាកម្ពុជា) សង្កេតឃើញថា ការបន្តរីករាលដាលជំងឺកូវីដ១៩ ជាសកលនេះបាននិងកំពុងក្លាយជាឧបសគ្គសម្រាប់វិនិយោគនៅកម្ពុជា។ វិបត្តិសុខភាពនេះបាននាំឱ្យធ្លាក់ចុះនៃចំនួនក្រុមហ៊ុន និងសហគ្រាសមកចុះបញ្ជីពាណិជ្ជកម្មនៅក្រសួងពាណិជ្ជកម្មកាលពីឆ្នាំមុន។
លោកប្រាប់ថា៖ «ក្នុងសម័យកូវីដ ១៩ គឺមិនមានបុគ្គលណាចង់វិនិយោគទេ ព្រោះការដាក់ទុនពេលនេះមិនខុសអ្វីនឹងយកលុយទៅបោះចោលទេ។ ការទិញ-លក់ ក៏ដូចជាប្រតិបត្តិការផលិតកម្មរបស់ខ្លួនក៏មិនសូវដើរដែរ។ ពួកគេសុខចិត្តសម្ងំសិន ទុកលុយសិន ដើម្បីរង់ចាំធ្វើការវិនិយោគនៅពេលណាដែលស្ថានភាពជំងឺកូវីដ ១៩ ចុះថមថយទៅវិញ»៕ LA