.jpg)
ភ្នំពេញ: រដ្ឋាភិបាលនឹងផ្តល់អាជ្ញាប័ណ្ណឲ្យក្រុមហ៊ុនចំនួន ៣ បន្ថែមទៀត ក្នុងចំណោមក្រុមហ៊ុនចំនួន ៥ ដែលបានដាក់ពាក្យស្នើសុំអាជ្ញាប័ណ្ណសិក្សាស្វែងរករ៉ែលោហធាតុនៅកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងរ៉ែ និងថាមពលកាលពីថ្ងៃសុក្រ។
សេចក្តីប្រកាសព័ត៌មានបានឲ្យដឹងថា ក្រមហ៊ុន Continental Copper (Cambodia) Co., Ltd ក្រុមហ៊ុន Renaissance Minerals (Cambodia) Limited និងក្រុមហ៊ុន Late Cheng Mining Development Co., Ltd ត្រូវបានជ្រើសរើសជាក្រុមហ៊ុនមានលក្ខណសម្បត្តិគ្រប់គ្រាន់ ដើម្បីបន្តអនុវត្តនីតិវិធីក្នុងការទទួលបានអាជ្ញាប័ណ្ណស្វែងរកធនធានរ៉ែនៅកម្ពុជា។
សេចក្តីប្រកាសព័ត៌មានបន្តថា ប្រសិនបើក្រុមហ៊ុន Continental Copper ទទួលបានអាជ្ញាប័ណ្ណនឹងធ្វើការសិក្សាស្វែងរករ៉ែនៅតំបន់អូរខ្វាវខាងលិច ស្ថិតក្នុងឃុំខ្វាវ ឃុំតាសៀម និងឃុំស្វាយលើ ខេត្តសៀមរាបដែលមានទំហំ ២០០ គីឡូម៉ែត្រក្រឡា និង ២០០ គីឡូម៉ែត្រក្រឡាទៀតនៅក្នុងឃុំខ្វាវ ខេត្តសៀមរាបដែលជាប់ព្រំប្រទល់នឹងឃុំស្រែយ៉ាង ស្រុករណសិរ្ស ខេត្តព្រះវិហារ។
ក្រុមហ៊ុន Renaissance Minerals (Cambodia) Limited នឹងធ្វើការសិក្សាស្វែងរករ៉ែលោហធាតុនៅតំបន់ចំនួន ២ គឺ ក្នុងតំបន់អូរខ្ទង់លើផ្ទៃដី ១៩៥,២ គីឡូម៉ែត្រក្រឡា និង ១៩៥,៨ នៅព្រែកខ្លុង ស្រុកកែវសីមា ខេត្តមណ្ឌលគិរី។
ចំណែកក្រុមហ៊ុន Late Cheng Mining Development Co., Ltd នឹងធ្វើការសិក្សាស្វែងរករ៉ែលោហៈនៅតំបន់ឃុំសុចិត្រ ស្រុកសណ្តាន់ ខេត្តកំពង់ធំ ដែលមានទំហំ ១៥១ គីឡូម៉ែត្រក្រឡា។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ក្រុមហ៊ុនទាំងនេះទទួលបានជយលាភី ដើម្បីបន្តនីតិវិធីស្នើសុំអាជ្ញាប័ណ្ណសិក្សាស្វែងរករ៉ែលោហធាតុ រួមមាន រ៉ែទង់ដែង រ៉ែមាស រ៉ែដែក ជាដើម។
លោកថ្លែងថា៖ «យើងបានកំណត់គោលដៅបើកឲ្យមានការសិក្សាធនធានរ៉ែ សម្រាប់តំបន់ដែលមានរចនាសម្ព័ន្ធភូមិសាស្ត្រល្អ និងមានសក្តានុពលធនធានរ៉ែ»។
កាលពីដើមខែមីនាក្រសួងរ៉ែ និងថាមពលក៏បានប្រកាសថា ក្រុមហ៊ុន H.T Kuang Ye Cambodia Development Co., Ltd និង ក្រុមហ៊ុន Cambodia K88 Industry Co.,Ltd ត្រូវបានជ្រើសរើសជាក្រុមហ៊ុនដែលមានលក្ខណសម្បត្តិគ្រប់គ្រាន់ និងមានសិទ្ធិអាទិភាព ដើម្បីបន្តអនុវត្តនីតិវិធីក្នុងការទទួលបានអាជ្ញាប័ណ្ណស្វែងរកធនធានរ៉ែនៅកម្ពុជាផងដែរ។
បើយោងតាមលោក មុនីរ៉ាត់ បច្ចុប្បន្នក្រសួងបានផ្តល់អាជ្ញាប័ណ្ណសិក្សាស្វែងរករ៉ែលោហៈចំនួន ៣៩ នៅទូទាំងប្រទេស។
កាលពីសប្តាហ៍មុនក្រសួងរ៉ែ និងថាមពលបានប្រកាសបើកតំបន់សម្បទានរុករករ៉ែថ្មីបន្ថែមទៀតសម្រាប់ក្រុមហ៊ុនដាក់ពាក្យស្នើសុំអាជ្ញាប័ណ្ណដែលមានទំហំសរុប ៧៩៤ គីឡូម៉ែត្រក្រឡានៅក្នុងខេត្តឧត្តរមានជ័យ ខេត្តព្រះវិហារ និងមណ្ឌលគិរី។
បច្ចុប្បន្នក្រុមហ៊ុន Emerald Resources NL ដែលជាក្រុមហ៊ុនចុះបញ្ជីនៅផ្សារហ៊ុនប្រទេស អូស្ត្រាលី កំពុងធ្វើការអភិវឌ្ឍគម្រោងរ៉ែមាសនៅអូរខ្វាវក្នុងខេត្តមណ្ឌលគិរី។ ក្រុមហ៊ុននេះរំពឹងថានឹងទាញយកទិន្នផលមាសលើកដំបូងនៅឆ្នាំ ២០២០ នេះ៕
