ភ្នំពេញៈ ក្រុមហ៊ុនចែកចាយផលិតផលអេឡិចត្រូនិករបស់ជប៉ុន RenetJapanGrou កំពុងចរចាទិញភាគហ៊ុនរបស់គ្រឹះស្ថានមីក្រូហិរញ្ញវត្ថុក្នុងស្រុកតូចមួយក្នុងទឹកប្រាក់ប្រមាណជាង ៩ លានដុល្លារ។ នេះបើតាមសេចក្តីរាយការណ៍របស់សារព័ត៌មានសេដ្ឋកិច្ចដ៏ល្បីមួយរបស់ជប៉ុន Nikkei Asian Review។
Nikkei Asian Review បានរាយការណ៍ថា RenetJapanGroup ដែលជាក្រុមហ៊ុនចែកចាយផលិតផលអេឡិចត្រូនិកដែលប្រើរួច (ជជុះ) នឹងទិញភាគហ៊ុន ៩០ ភាគរយពីគ្រឹះស្ថានមីក្រូហិរញ្ញវត្ថុ ចម្រើនទឹកប្រាក់ ៩,២១ លានដុល្លារដែលកិច្ចព្រមព្រៀងនឹងធ្វើឡើងនៅខែសីហាខាងមុខ។
កិច្ចព្រមព្រៀងទិញភាគហ៊ុននេះជាផ្នែកមួយជួយក្រុមហ៊ុន RenetJapanGroup ដែលកំពុងពង្រីកប្រតិបត្តិការនៅក្នុងតំបន់អាស៊ាន ដោយឈរលើគោលការណ៍អភិវឌ្ឍន៍ប្រកបដោយនិរន្តរភាពតាមរយៈការពង្រីកធានារ៉ាប់រងពីការប្រែប្រួលអាកាសធាតុ និងការផ្តល់ហិរញ្ញប្បទានដល់គម្រោងថាមពលដើរដោយសូឡា។
យោងតាម Nikkei Asian Review គ្រឹះស្ថានមីក្រូហិរញ្ញវត្ថុចម្រើនមានទីតាំងប្រតិបត្តិការសរុប ២១ ទីតាំងភាគច្រើននៅតាមទីប្រជុំជន និងមានទ្រព្យសកម្មសរុប ១២,១ លានដុល្លារ ហើយភាគច្រើនផ្តល់កម្ចីសម្រាប់ប្រជាជនដែលមានចំណូលទាប។
នៅក្នុងរយៈពេលចុងក្រោយនេះមានក្រុមហ៊ុនហិរញ្ញវត្ថុជប៉ុនជាច្រើនបានទិញភាគហ៊ុននៅក្នុងគ្រឹះស្ថានហិរញ្ញវត្ថុនៅកម្ពុជា ខណៈកំណើនវិនិយោគរបស់ជប៉ុននៅកម្ពុជាត្រូវបានគេមើលឃើញថាកើនឡើងផងដែរ៕