.jpg)
កសិករស្រោចបន្លែរបស់ខ្លួននាពេលកន្លងមក។ ហុង មិនា
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានចុះហត្ថលេខាលើអនុស្សរណៈនៃការយោគយល់ (MoU) ជាមួយក្រុមហ៊ុន Yamato Green Co., Ltd របស់ជប៉ុនកាលពីថ្ងៃពុធក្នុងការអភិវឌ្ឍបន្លែសុវត្ថិភាពសម្រាប់ទីផ្សារក្នុងស្រុក និងការនាំចេញទៅក្រៅប្រទេស។
ក្រោយការចុះ MoU នេះក្រុមហ៊ុនជប៉ុន ១០ នឹងមកជួយអភិវឌ្ឍគ្រប់ជ្រុងជ្រោយលើខ្សែចង្វាក់ផលិតកម្មបន្លែទៅតាមជំនាញនីមួយៗ។ នេះបើតាមការអះអាងរបស់ភាគីជប៉ុន។
ការចុះ MoU នេះត្រូវបានធ្វើឡើងក្រោមអធិបតីភាពដោយលោករដ្ឋមន្ត្រី វេង សាខុន និងលោក Masahiro Mikami ឯកអគ្គរាជទូតជប៉ុននៅទីស្តីការក្រសួង ដើម្បីពង្រឹងទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំង ២ តាមរយ:ការចូលរួមអភិវឌ្ឍវិស័យកសិកម្មកម្ពុជា បច្ចេកទេសកសិកម្ម បច្ចេកវិទ្យាកសិកម្ម និង ការវិនិយោគក្នុងវិស័យកសិកម្មជាដើម។
លោក វេង សាខុន បានថ្លែងថា ព្រឹតិ្តការណ៍នេះបានឆ្លុះបញ្ចាំងឲ្យឃើញយ៉ាងច្បាស់ពីឆន្ទ:របស់រាជរដ្ឋាភិបាលជប៉ុនក្នុងការគាំទ្រ និងជួយឧបត្ថម្ភទាំងធនធានថវិកា និងបច្ចេកទេសដើម្បីចូលរួមអភិវឌ្ឍផលិតកម្មបន្លែកម្ពុជាឲ្យមានការរីកចម្រើនសមស្របតាមសេចក្តីត្រូវការទីផ្សារបន្លែ និងការចាប់យកកាលានុវត្តភាព។
លោកថា៖ «ឯកសារ MoU ដែលបានចុះហត្ថលេខានាថ្ងៃនេះមានលក្ខណ:គ្រប់គ្រាន់ក្នុងការបំពេញតម្រូវការឲ្យគ្នាទៅវិញទៅមកយ៉ាងប្រទាក់ក្រឡាក្នុងខ្សែចង្វាក់ផលិតកម្មបន្លែ»។
លោក Nabeshima Katsuhito ស្ថាបនិក និងជានាយកក្រុមហ៊ុនបានថ្លែងថា ក្នុងនាមឲ្យនាយកក្រុមហ៊ុន និងដៃគូពាក់ព័ន្ធក្នុងគម្រោងបានសម្តែងនូវឆន្ទ:យ៉ាងមុតមាំថា លោកនឹងខិតខំប្រឹងប្រែងប្រើប្រាស់សក្តានុពលដោយនាំយកបច្ចេកវិទ្យាចុងក្រោយនៃវិស័យផលិតកម្មបន្លែទាំងអំឡុងពេលដាំដុះ និងប្រមូលផលរហូតដល់លើតុ សម្រាប់អ្នកបរិភោគ មកអនុវត្តនៅកម្ពុជា។
លោកថា៖ «ក្រុមហ៊ុនជប៉ុនចំនួន ១០ នឹងមកចូលរួមអភិវឌ្ឍគ្រប់ជ្រុងជ្រោយលើខ្សែចង្វាក់ផលិតកម្មបន្លែនេះទៅតាមជំនាញនីមួយៗ ហើយពិតណាស់កសិករផលិតគឺជាដៃគូមិនអាចខ្វះបានក្នុងការឈានទៅសម្រេចជោគជ័យតាមផែនការនេះ»។
កម្ពុជាបាននាំចេញបន្លែប្រមាណ ៣៩ តោន ក្នុងរយៈពេល ៣ ខែដើមឆ្នាំនេះ ទៅកាន់ទីផ្សារសហភាពអឺរ៉ុបដោយមានទីផ្សារបារាំង សាធារណរដ្ឋឆែក និងស្វ៊ីសទទួលទិញ៕
