ភ្នំពេញៈ ក្រុមហ៊ុនផលិតថាមពលកកើតឡើងវិញចំនួន ២ របស់ជប៉ុនគឺក្រុមហ៊ុន Aura Green Energy Co និងក្រុមហ៊ុន WWB Corp បានរួមគ្នាដើម្បីសាងសង់រោងចក្រផលិតថាមពលកូនកាត់ដែលរួមមានជីវម៉ាស់ និងថាមពលសូឡានៅកម្ពុជាក្នុងឆ្នាំ ២០២១។
ទីភ្នាក់ងារព័ត៌មានជប៉ុន NNA បានឲ្យដឹងកាលពីថ្ងៃចន្ទថា ស្ដ្រីអ្នកនាំពាក្យក្រុមហ៊ុន Aura Green Energy បានប្រាប់ថា ក្រុមហ៊ុន Aura Green Energy និងក្រុមហ៊ុនផ្គត់ផ្គង់ប្រព័ន្ធបន្ទះសូឡា WWB Corp វិនិយោគរួមដើម្បីសាងសង់រោងចក្រផលិតថាមពលដែលប្រើប្រាស់អង្កាមជាប្រេងឥន្ធនៈនៅក្នុងរោងចក្រកិនស្រូវនៅជិតរាជធានីភ្នំពេញរួមជាមួយបន្ទះសូឡា។
កាសែតនេះបានឲ្យដឹងទៀតថា គម្រោងនេះមានតម្លៃ ៤០០ លានយ៉េន (៣,៧ លានដុល្លារ) ជាមួយនឹងសមត្ថភាពទិន្នផលសរុប ១ ៥០០ គីឡូវ៉ាត់។
កាសែតបន្តថារោងចក្រនេះនឹងផ្គត់ផ្គង់ថាមពលទៅរោងម៉ាស៊ីនកិនស្រូវរបស់ក្រុមហ៊ុន Angkor Kasekam Roongroeung ដែលជាក្រុមហ៊ុនផលិតអង្ករក្នុងស្រុកដ៏សំខាន់មួយនៅក្នុងខេត្តកណ្ដាលជាមួយនឹងផែនការលក់ផលិតផលលើសពីតម្រូវការទៅឲ្យក្រុមហ៊ុនថាមពលក្នុងស្រុក។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានឲ្យដឹងកាលពីថ្ងៃអង្គារថា ស្ថិរភាពអគ្គិសនីមានតួនាទីដ៏សំខាន់នៅក្នុងវិស័យស្រូវអង្ករក្នុងគោលបំណងបង្កើនចង្វាក់ផលិត និងកាត់បន្ថយការចំណាយរបស់ពួកគេ។
ទោះយ៉ាងណាលោកបញ្ជាក់ថា ការវិនិយោគលើថាមពលសូឡាដែលមិនតភ្ជាប់ទៅនឹងបណ្តាញអគ្គិសនីជាតិមិនត្រូវបានរដ្ឋាភិបាលកម្ពុជាលើកទឹកចិត្តទេ ព្រោះតម្លៃដើមខ្ពស់ជាងការទិញអគ្គិសនីពីរដ្ឋ។
លោកថ្លែងថា៖ «បើរោងចក្រថាមពលសូឡាមានសមត្ថភាពផលិតអគ្គិសនីគ្រប់គ្រាន់ ពួកគេប្រើសម្រាប់រោងម៉ាស៊ីនកិនស្រូវរបស់គេវានឹងល្អបំផុត»។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលក្រសួងរ៉ែ និងថាមពលបានឲ្យដឹងថា វិស័យឯកជនគួរតែប្រើថាមពលដែលទិញពីអគ្គិសនីកម្ពុជា (EDC) ដែលមានការតភ្ជាប់បណ្តាញជាតិត្រឹមត្រូវ និងមានតម្លៃទាប។ លោកថ្លែងថា៖ «បើមានការផ្គត់ផ្គង់ត្រឹមត្រូវ និងមានអគ្គិសនីប្រកបដោយស្ថិរភាពប្រើប្រាស់វាទៅគឺមិនចាំបាច់វិនិយោគទេ»។
ស្ដ្រីអ្នកនាំពាក្យក្រុមហ៊ុន Aura ថា ក្រុមហ៊ុន WWB នឹងផ្គត់ផ្គង់បន្ទះសូឡា ដែលផលិតនៅក្នុងប្រទេសវៀតណាមសម្រាប់រោងចក្រនៅកម្ពុជា។
កាសែត NNA បានឲ្យដឹងទៀតថា គម្រោងនេះមួយផ្នែកត្រូវបានឧបត្ថម្ភធនដោយរដ្ឋាភិបាលជប៉ុនប្រហែល ១១០ លានយ៉េនស្ថិតក្រោមយន្តការឥណទានរួមដែលជាផែនការកាត់បន្ថយឧស្ម័នផ្ទះកញ្ចក់ និងកាត់បន្ថយការបំភាយឧស្ម័នកាបូនឌីអុកស៊ីត៕ LA