.jpg)
ក្រុមហ៊ុន Fujitsu General Ltd នឹងពង្រីកផលិតកម្មរបស់ខ្លួនតាមរយៈការទិញរោងចក្រមួយនៅជិតទីក្រុងបាងកក។ fujitsu-general.com
ក្រុងតូក្យូៈ ក្រុមហ៊ុន Fujitsu General Ltd ដែលជាក្រុមហ៊ុនផលិតម៉ាស៊ីនត្រជាក់របស់ជប៉ុន នឹងពង្រីកផលិតកម្មរបស់ខ្លួនតាមរយៈការទិញរោងចក្រមួយនៅជិតទីក្រុងបាងកកដែលជាកម្មសិទ្ធិរបស់ក្រុមហ៊ុនផលិតគ្រឿងបន្លាស់រថយន្ត និងម៉ាស៊ីនត្រជាក់របស់ប្រទេស ថៃ។ នេះបើយោងតាមសេចក្តីរាយការណ៍របស់កាសែតបាងកកប៉ុស្តិ៍។
ក្រុមហ៊ុន Fujitsu General (Thailand) Co ដែលក្រុមហ៊ុនបុត្រសម្ព័ន្ធកម្មសិទ្ធិទាំងស្រុងរបស់ក្រុមហ៊ុនជប៉ុន Fujitsu General Ltd នឹងចំណាយប្រាក់ចំនួន ៦០៦ លានបាត (ប្រហែល ១៩ លានដុល្លារ) សម្រាប់ការទិញរោងចក្រនេះ។ នេះបើយោងតាមឯកសារដែលដាក់ជូនផ្សារមូលបត្រដែលធ្វើឡើងដោយក្រុមហ៊ុន Fujitsu General (Thailand) នៅសប្តាហ៍មុន។
លោក Takeshi Tobari អ្នកនាំពាក្យក្រុមហ៊ុន Fujitsu General បានប្រាប់កាសែតជប៉ុន NNA កាលពីថ្ងៃចន្ទថា ការទិញនេះគឺជា «ផ្នែកមួយនៃផែនការវិនិយោគរបស់យើងដើម្បីឆ្លើយតបទៅនឹងកំណើនតម្រូវការម៉ាស៊ីនត្រជាក់ក្នុងពិភពលោក ជាពិសេសនៅក្នុងទីផ្សារអាស៊ី» ប៉ុន្តែលោកបានបដិសេធមិនធ្វើអត្ថាធិប្បាយអំពីពេលវេលានៃការទិញរោងចក្រ និងផលិតផលដែលនឹងត្រូវផលិតនៅក្នុងរោងចក្រនេះ។
ក្រុមហ៊ុនបុត្រសម្ព័ន្ធក្នុងប្រទេស ថៃ របស់ក្រុមហ៊ុន Fujitsu General មានគោលបំណងបង្កើនសមត្ថភាពផលិតកម្មរបស់ខ្លួនដល់ ១,៥ លានយូនីតក្នុងមួយឆ្នាំគិតត្រឹមខែមីនា ឆ្នាំ ២០២១ ដែលកើនឡើងចំនួន ៥០ ភាគរយពីកម្រិតបច្ចុប្បន្ន។
ក្រុមហ៊ុននេះមានរោងចក្រមួយនៅសួនឧស្សាហកម្ម Laem Chabang Industrial Estate ក្នុងខេត្តឈុនបុរី ស្ថិតនៅភាគអាគ្នេយ៍ទីក្រុងបាងកក ដែលរោងចក្រ SNC មានទំហំ ២៧ ០០០ ម៉ែត្រការ៉េស្ថិតនៅ ទីនោះផងដែរ។
ក្រុមហ៊ុន Fujitsu General (Thailand) ដែលបានចាប់ផ្តើមប្រតិបត្តិការក្នុងឆ្នាំ ១៩៩២ បាននាំចេញម៉ាស៊ីនត្រជាក់ទៅអឺរ៉ុបព្រមទាំងទៅកាន់ប្រទេសផ្សេងទៀតក្នុងតំបន់អាស៊ី។ នេះបើយោងតាមលោក Tobari។
ក្នុងឆ្នាំ ២០១៦ រោងចក្រនេះបានវិនិយោគប្រាក់ចំនួន ២ ពាន់លានយ៉េន (១៨ លានដុល្លារ) ដើម្បីសាងសង់មជ្ឈមណ្ឌលស្រាវជ្រាវ និងអភិវឌ្ឍន៍សម្រាប់ម៉ាស៊ីនត្រជាក់បច្ចេកវិទ្យាខ្ពស់នៅជិតរោងចក្ររបស់ខ្លួនក្នុងសួនឧស្សាហកម្មនេះ។
ក្រុមហ៊ុនដែលមានមូលដ្ឋាននៅទីក្រុងតូក្យូនេះ ប្រតិបត្តិការរោងចក្រម៉ាស៊ីនត្រជាក់ចំនួន ២ នៅក្រៅប្រទេស ដែលរោងចក្រទាំង ២ នេះ មានទីតាំងស្ថិតនៅប្រទេស ចិន៕ PS
