.jpg)
លោក លូ ម៉េង សហប្រធានក្រុមការងារវិស័យឯកជន និងជាប្រធានសហព័ន្ធទេសចរណ៍កម្ពុជា ថ្លែងក្នុងសន្និសីទកាសែត កាលពីម្សិលមិញ។ ហេង ជីវ័ន
ភ្នំពេញៈ ក្រុមហ៊ុនជាង ៣៥០ មកពី ៣០ ប្រទេសនៅក្នុងតំបន់នឹងប្រមូលផ្តុំគ្នានៅក្នុងពិព័រណ៍ CAMFOOD និង CAMHOTEL ប្រចាំឆ្នាំលើកទី ៦ នៅកម្ពុជានៅខែក្រោយ។ នេះបើតាមសេចក្ដីប្រកាសព័ត៌មានកាលពីម្សិលមិញ។
ព្រឹត្តិការណ៍រយៈពេល ៣ ថ្ងៃដែលនឹងធ្វើឡើងចាប់ពីថ្ងៃទី ១៩ ដល់ថ្ងៃទី ២១ ខែកញ្ញានៅកោះពេជ្រនេះត្រូវបានរៀបចំឡើងដោយក្រុមហ៊ុន AMB Tarsus Exhibition និងសហព័ន្ធទេសចរណ៍កម្ពុជា។
ព្រឹត្តិការណ៍នេះនឹងផ្ដល់ដល់ក្រុមហ៊ុនក្នុងស្រុកនូវឱកាសមួយដើម្បីរៀនសូត្រពីការអនុវត្តពាណិជ្ជកម្មបរទេស ព្រមទាំងបង្ហាញផលិតផលផ្ទាល់ខ្លួនរបស់ពួកគេផងដែរ។ នេះបើយោងតាមសេចក្ដីប្រកាសព័ត៌មាន។
លោក Andrew Siow នាយកក្រុមហ៊ុន AMB Tarsus Exhibitions បានថ្លែងថា ពិព័រណ៍នេះនឹងបង្ហាញពីវិស័យទាំងអស់នៃចង្វាក់ផ្គត់ផ្គង់អាហារ និងភេសជ្ជៈ រហូតដល់សេវាអាហារ បដិសណ្ឋារកិច្ច និងក្រុមហ៊ុនផ្ដល់សេវាបច្ចេកវិទ្យា។
លោកលើកឡើងថា៖ «ទាក់ទងនឹងអ្វីៗថ្មី អ្នកនឹងមើលឃើញនៅឆ្នាំនេះ ដំបូងគឺថាមានតំណាងប្រទេសកាន់តែច្រើន ហើយការរៀបចំកាន់តែធំនៃការផ្គត់ផ្គង់ជាពិសេស ការផ្គត់ផ្គង់កាហ្វេ និងឧបករណ៍ហាងកាហ្វេ»។
ក្រុមហ៊ុននានាមកពីប្រទេសចិន បារាំង អ៊ីតាលី កូរ៉េ ម៉ាឡេស៊ី កោះតៃវ៉ាន់ ថៃ សិង្ហបុរី និងអាមេរិកនឹងចូលរួមនៅក្នុងពិព័រណ៍នេះ។
លោក លូ ម៉េង សហប្រធានក្រុមការងារវិស័យឯកជន និងជាប្រធានសហព័ន្ធទេសចរណ៍កម្ពុជាបានឲ្យដឹងថា ឧស្សាហកម្មបដិសណ្ឋារកិច្ចដែលរួមមានសណ្ឋាគារ អាហារ និងភេសជ្ជៈនេះគឺជាអ្នកដើរតួនាទីដ៏សំខាន់ក្នុងការទាក់ទាញភ្ញៀវទេសចរ និងកំណើនសេដ្ឋកិច្ចដ៏សំខាន់សម្រាប់ប្រទេសនេះ។
លោកបានថ្លែងបញ្ជាក់ថា៖ «មុនពេលវិនិយោគិនសម្រេចចិត្តវិនិយោគនៅកម្ពុជា ជំហានដំបូងពួកគេត្រូវការធ្វើទស្សនកិច្ចដែលឧស្សាហកម្មបដិសណ្ឋារកិច្ចជាអ្នកដើរតួនាទីដ៏សំខាន់ក្នុងការបម្រើពួកគេ និងទាក់ទាញពួកគេ»។
លោកបានថ្លែងថា ពិព័រណ៍នេះជាឱកាសដ៏ធំមួយសម្រាប់ក្រុមហ៊ុនបដិសណ្ឋារកិច្ចក្នុងស្រុកក្នុងការរៀនសូត្រពីរបៀបក្រុមហ៊ុនបរទេសធ្វើទីផ្សារ និងយីហោផលិតផលរបស់ពួកគេ ព្រមទាំងបង្ហាញការអនុវត្តល្អបំផុតនៅក្នុងឧស្សាហកម្មនេះផងដែរ៕ LA
