ភ្នំពេញៈ ក្រុមហ៊ុនចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានបានកើនដល់ជិត ៣០០ ហើយចាប់តាំងពីរដ្ឋាភិបាលសម្រេចដាក់ឲ្យដំណើរការជាផ្លូវការកាលពីពាក់កណ្តាលខែមិថុនាកន្លងមក។
ក្រសួង និងស្ថាប័នរដ្ឋយ៉ាងហោច ៦ ត្រូវបានដាក់បញ្ចូលទៅក្នុងប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដែលជាប្រព័ន្ធចុះបញ្ជីថ្មីបំផុតនឹងជួយបង្កើនបរិយាកាសវិនិយោគនៅកម្ពុជា។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញ-ប៉ុស្តិ៍កាលពីថ្ងៃអាទិត្យថា គិតត្រឹមថ្ងៃទី ២៩ ខែកក្កដា មានក្រុមហ៊ុនសរុប ២៨៧ បានចុះបញ្ជីតាមថ្នាលបច្ចេកវិទ្យាព័ត៌មានប្រកបដោយជោគជ័យ និង ៣២៣ ក្រុមហ៊ុនផ្សេងទៀតក្រសួងកំពុងពិនិត្យ។ ជាមធ្យមក្រុមហ៊ុនទាំងនេះចំណាយពេល ៨ ថ្ងៃ ដើម្បីចុះបញ្ជីអាជីវកម្ម។
លោកថ្លែងថា៖ «ក្រោមគំនិតផ្តួចផ្តើមរបស់ឯកឧត្តមរដ្ឋមន្ត្រី ប្រព័ន្ធនេះគឺជាកិច្ចការមួយដែលបានជួយសម្រួលយ៉ាងច្រើនដល់ការចុះបញ្ជីអាជីវកម្មតាមប្រព័ន្ធអនឡាញដែលស្របនឹងគោលនយោបាយអភិវឌ្ឍឧស្សាហកម្ម ៤.០ របស់រដ្ឋាភិបាលក្នុងការធ្វើទំនើបកម្មតាមប្រព័ន្ធបច្ចេកវិទ្យា»។
លោកបន្តថា ប្រព័ន្ធចុះបញ្ជីថ្មីនេះនឹងតម្រូវឲ្យក្រុមហ៊ុនបំពេញទម្រង់ចុះបញ្ជីអាជីវកម្មតែ ១ លើកគត់ដោយចំណាយពេលយ៉ាងយូរ ៨ ថ្ងៃ។ លោកថ្លែងថា៖ «នេះជាគោលដៅបង្កើតបរិស្ថានវិនិយោគឲ្យបានល្អប្រសើរដើម្បីទាក់ទាញការវិនិយោគឲ្យកាន់តែច្រើនចូលមកកម្ពុជា។ នេះជាកាតព្វកិច្ចរបស់ក្រសួងសេដ្ឋកិច្ចដែលចង់ឲ្យមានស្ថិរភាពម៉ាក្រូសេដ្ឋកិច្ច។ យើងក៏ចង់ឲ្យសេដ្ឋកិច្ចយើងរីកចម្រើន ដោយលក្ខខណ្ឌនៃការវិនិយោគល្អ ដូច្នេះយើងបានកាត់បន្ថយភាពស្មុគស្មាញជាច្រើន»។
លោកបញ្ជាក់ថា រាល់ទិន្នន័យរបស់ក្រុមហ៊ុនចុះបញ្ជីនឹងត្រូវបញ្ជូនដោយស្វ័យប្រវត្តិទៅក្រសួងសេដ្ឋកិច្ច ក្រសួងពាណិជ្ជកម្ម ក្រសួងការងារ ក្រសួងមហាផ្ទៃ ក្រុមប្រឹក្សាអភិវឌ្ឍន៍កម្ពុជា និងអគ្គនាយកដ្ឋានពន្ធដារ ដើម្បីពិនិត្យ និងអនុម័ត។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឲ្យដឹងកាលពីខែមុនថា ការចុះបញ្ជីតាមថ្នាលបច្ចេកវិទ្យាព័ត៌មាននឹងជួយកាត់បន្ថយថ្លៃចំណាយ និងចំណេញពេល។
លោកនិយាយថា៖ «នេះជាជោគជ័យមួយទៀតរបស់រដ្ឋាភិបាលហើយក្នុងនាមក្រសួងស្ថិតក្នុងចង្កោមអ្នកអនុវត្តន៍នៃប្រព័ន្ធចុះបញ្ជីនេះ យើងមានសេចក្តីរីករាយដែលប្រព័ន្ធនេះដំណើរការយ៉ាងរលូន។ យើងសូមអំពាវនាវឲ្យអាជីវករ និងវិនិយោគិន បើកក្រុមហ៊ុននៅកម្ពុជា មេត្តាប្រើប្រព័ន្ធនេះដើម្បីចុះបញ្ជីដែលលឿនរហ័ស និងសន្សំសំចៃថវិកា»៕