ភ្នំពេញៈ ក្រុមហ៊ុនជិត ៥០ បានចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដោយជោគជ័យចាប់តាំងពីដាក់ឲ្យដំណើរការជាផ្លូវការកាលពីពាក់កណ្តាលខែមិថុនា។
ក្រសួង និងស្ថាប័នរដ្ឋយ៉ាងហោច ៦ ត្រូវបានដាក់បញ្ជូលទៅក្នុងប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដែលជាប្រព័ន្ធចុះបញ្ជីថ្មីបំផុត នឹងជួយលើកកម្ពស់ការចុះបញ្ជី និងកាត់បន្ថយអំពើពុករលួយ។
លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអន្តរក្រសួងរៀបចំការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានបានឲ្យដឹងថា ក្រុមហ៊ុនចំនួន ៤៧ បានចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដោយជោគជ័យគិតត្រឹមសប្តាហ៍ទី ២ ក្នុងខែកក្កដានេះ។ លោកថ្លែងថា៖ «ការចុះបញ្ជីនេះគ្មានអ្វីស្មុគស្មាញទេ។ នេះជាឱកាសកំណែទម្រង់របស់រាជរដ្ឋាភិបាល»។
លោកបន្តថា ប្រព័ន្ធចុះបញ្ជីថ្មីនេះនឹងតម្រូវឲ្យក្រុមហ៊ុនបំពេញទម្រង់ចុះបញ្ជីអាជីវកម្មតែ ១ លើកគត់ដោយចំណាយពេលយ៉ាងយូរត្រឹម ៨ ថ្ងៃ។ លោកបន្តថា រាល់ទិន្នន័យរបស់ក្រុមហ៊ុនចុះបញ្ជីអាជីវកម្មនឹងបញ្ជូនដោយស្វ័យប្រវត្តិទៅក្រសួងសេដ្ឋកិច្ច ក្រសួងពាណិជ្ជកម្ម ក្រសួងការងារ ក្រសួងមហាផ្ទៃ ក្រុមប្រឹក្សាអភិវឌ្ឍន៍កម្ពុជា និងអគ្គនាយកដ្ឋានពន្ធដារ ដើម្បីត្រួតពិនិត្យ និងអនុម័ត។
លោកថ្លែងថា៖ «ពីមុនការចុះបញ្ជីក្រុមហ៊ុនមួយត្រូវឆ្លង ៣ ទៅ ៤ ស្ថាប័ន ប៉ុន្តែឥឡូវគ្រាន់តែចូលក្នុងវេបសាយមួយដោយគ្រាន់តែបំពេញរាល់ឯកសារទៅតាមការណែនាំក្នុងរយៈពេលយ៉ាងយូរ ៨ ថ្ងៃគឺរួចរាល់»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឲ្យដឹងថា ការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាននឹងជួយកាត់បន្ថយថ្លៃចំណាយ និងចំណេញពេលវេលា។ លោកបន្តថា នេះជាការកែទម្រង់ស៊ីជម្រៅរបស់រដ្ឋាភិបាលក្នុងការទាក់ទាញវិនិយោគិនមកបណ្តាក់ទុននៅកម្ពុជា។
លោកថ្លែងថា៖ «នេះជាជោគជ័យមួយទៀតរបស់រដ្ឋាភិបាល ហើយក្នុងនាមក្រសួងមួយស្ថិតក្នុងចង្កោមអ្នកអនុវត្តន៍នៃប្រព័ន្ធចុះបញ្ជីនេះ យើងមានសេចក្តីរីករាយដែលប្រព័ន្ធនេះដំណើរការយ៉ាងរលូន។ យើងសូមអំពាវនាវឲ្យអាជីវករ និងវិនិយោគិន ដែលបើកក្រុមហ៊ុនរកស៊ីនៅកម្ពុជា មេត្តាប្រើប្រាស់ប្រព័ន្ធនេះដើម្បីចុះបញ្ជីដែលលឿនរហ័ស និងសន្សំសំចៃថវិកាទៀតផង»៕ LA