ភ្នំពេញៈ ក្រុមហ៊ុន Meal Temple Group ជាកម្មវិធី ដឹកជញ្ជូនអាហារដំបូងគេនៅកម្ពុជាបានប្រកាសថា ក្រុមហ៊ុនបានទិញភាគហ៊ុនសេវាដឹកជញ្ជូនអាហារឈានមុខគេនៅក្នុងប្រទេស ឡាវ MyDelivery.la ដែលជាផ្នែកមួយរបស់ក្រុមហ៊ុន Kiwi Group។ នេះបើយោងតាមសេចក្ដីប្រកាសព័ត៌មាន។
សេចក្ដីប្រកាសព័ត៌មានឲ្យដឹងថា ក្រុមហ៊ុន Meal Temple Group បានប្រើប្រាស់មូលនិធិនៅរបស់ខ្លួនដែលរកបានពីរៃអង្គាសពីក្រុមវិនិយោគិនអន្តរជាតិ កាលពីចុងឆ្នាំ ២០១៨ ដើម្បីរៀបចំការទិញភាគហ៊ុនក្រុមហ៊ុននេះ។
ជាមួយនឹងការដឹកជញ្ជូនប្រចាំថ្ងៃជាង ៣០០ ដងពីភោជនីយដ្ឋានជាង ២០០ នៅទីក្រុងវៀងចន្ទន៍ ក្រុមហ៊ុន Meal Temple Group នឹងបន្តប្រតិបត្តិការរបស់ MyDelivery.la ដែលមានស្រាប់ និងបន្ថែមកាន់តែច្រើនលើតម្រូវការដឹកជញ្ជូន និងសេវាឡូជីស្ទិក ដូចជាការដឹកជញ្ជូនអាហារជាដើម។
លោក Maxime Rosburger អគ្គនាយក និងស្ថាបនិកក្រុមហ៊ុន Meal Temple Group បានឲ្យដឹងនៅក្នុងសេចក្ដីប្រកាសព័ត៌មាននេះថា ៖ «យើងពិតជារីករាយជាមួយនឹងការទិញភាគហ៊ុនលើកដំបូងនេះ ដែលជាសសរស្ដម្ភមួយក្នុងចំណោមសសរស្ដម្ភជាច្រើននៃយុទ្ធសាស្ដ្ររបស់យើងក្នុងការគ្របដណ្ដប់ទីផ្សារជួរមុខរបស់អាស៊ី និងពង្រីកការបង្កើតជំនាញរបស់យើង និងបច្ចេកវិទ្យាក្នុងតំបន់»។
លោកបន្តថា MyDelivery.la នឹងបន្តប្រតិបត្តិការស្ថិតក្រោមឈ្មោះផ្ទាល់របស់ខ្លួន។
ក្រុមហ៊ុន Meal Temple Group យល់ព្រមលើភាពជាដៃគូផ្ដាច់មុខជាមួយក្រុមហ៊ុន Kiwi Group និង Kiwi Pay ជាក្រុមហ៊ុនបច្ចេកវិទ្យាហិរញ្ញវត្ថុបង្កើតថ្មីរបស់ខ្លួនដើម្បីប្រើប្រាស់សេវារបស់ពួកគេដើម្បីដោះស្រាយការទូទាត់ប្រកបដោយសុវត្ថិភាពតាមអនឡាញ។ នេះបើតាមសេចក្ដីប្រកាសព័ត៌មាន។
លោក Gregory Schmidt អគ្គនាយក និងជាស្ថាបនិកក្រុមហ៊ុន Kiwi Group និងក្រុមហ៊ុន Kiwi Pay បានឲ្យដឹងថា ក្រុមហ៊ុននេះនៅពេលនេះកំពុងផ្ដោតលើផលិតផលបច្ចេកវិទ្យាហិរញ្ញវត្ថុនៅក្នុងប្រទេស ឡាវ។
លោកថ្លែងថា៖ «នេះគឺជាភាពជាដៃគូយុទ្ធសាស្ដ្រពិតប្រាកដមួយ ដើម្បីនាំយកក្រុមអ្នកជំនាញនៅក្នុងវិស័យនីមួយៗសម្រាប់សក្ដានុពលពាណិជ្ជកម្មដែលមិនទាន់ប្រើប្រាស់ក្នុងប្រទេស ឡាវ»។
ក្រុមហ៊ុន Meal Temple ត្រូវបានបង្កើតឡើងនៅកម្ពុជាកាលពីឆ្នាំ ២០១៣ ដោយសហគ្រិនជនជាតិបារាំងវ័យក្មេង ៣ នាក់ និងជាសេវានាំមុខនៅក្នុងការដឹកជញ្ជូនអាហារនៅកម្ពុជា។
បច្ចុប្បន្នសេវាបែបនេះបាននឹងកំពុងក្លាយជាអាជីវកម្ម ដឹកជញ្ជូននៅក្នុងវិស័យអាហារ ដែលរីកចម្រើនរហ័សរបស់ប្រទេស កម្ពុជា។
ដោយបានបង្កើតឡើងកាលពីឆ្នាំ ២០១៦ Nham24 សេវាដឹកជញ្ជូនអាហារផ្សេងទៀត ដែលបច្ចុប្បន្នប្រតិបត្តិការនៅភ្នំពេញ និងសៀមរាប និងសហការជាមួយភោជនីយដ្ឋានជាង ៥៥០។ សេវាដឹកជញ្ជូនអាហារទី៣ នៅក្នុងឧស្សាហកម្មនេះ គឺ Muuve Delivery ដែលទើបនឹងចាប់ផ្ដើមដំណើរការរយៈពេល ៤ ខែកន្លងមកនេះ៕LA