.jpg)
ក្រុមហ៊ុនផលិតរថយន្តអគ្គិសនី TESLA របស់អាមេរិកដែលកំពុងសាងសង់ការិយាល័យតាំងបង្ហាញនៅខណ្ឌ ពោធិ៍សែនជ័យ រាជធានីភ្នំពេញ។ ហេង ជីវ័ន
ភ្នំពេញ៖ រដ្ឋាភិបាលកម្ពុជានឹងធ្វើការពិន័យជាប្រាក់ចាប់ពី ២ សែនរៀល ដល់ ១០ លានរៀលចំពោះជនទាំងឡាយណាដែលប្រព្រឹត្តអំពើល្មើសទៅនឹងច្បាប់នានាស្តីពីពាណិជ្ជកម្ម ពាណិជ្ជកម្មតាមប្រព័ន្ធអេឡិចត្រូនិក ដែលបណ្តាអាជីវកម្មទាំងនោះមិនបានអនុលោមតាម។
យោងតាមប្រកាសអន្តរក្រសួង ស្តីពីការពិន័យជាប្រាក់ដែលស្ថិតក្រោមសមត្ថកិច្ចរបស់ក្រសួងពាណិជ្ជកម្មដែលត្រូវបានចុះហត្ថលេខាដោយលោក អូន ព័ន្ធមុន្នីរ័ត្ន រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ និងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីថ្ងៃទី ១២ និងត្រូវបានចេញជាសាធារណៈកាលពីថ្ងៃទី២៥ ខែឧសភា បានឲ្យដឹងថា ការពិន័យជាប្រាក់ដែលស្ថិតក្រោមសមត្ថកិច្ចរបស់ក្រសួងពាណិជ្ជកម្ម ត្រូវបានអនុវត្តចំពោះជនទាំងឡាយណាដែលប្រព្រឹត្តអំពើល្មើសទៅនឹងច្បាប់ស្តីពីវិធានពាណិជ្ជកម្ម និង បញ្ជីពាណិជ្ជកម្ម ច្បាប់ស្តីពីម៉ាក ពាណិជ្ជនាម និងអំពើនៃការប្រកួតប្រជែងមិនស្មោះត្រង់ ច្បាប់ស្តីពីសហគ្រាសពាណិជ្ជកម្ម និង ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ព្រមទាំងលិខិតបទដ្ឋានគតិយុត្តពាក់ព័ន្ធជាធរមាន។
សម្រាប់ការផាកពិន័យត្រូវបានកំណត់ជា ៧ ប្រភេទដែលនឹងត្រូវពិន័យជាប្រាក់ខុសគ្នាទៅតាមកម្រិតនៃបទល្មើសនីមួយៗមានដូចជា៖ ការមិនបានចុះបញ្ជីកែប្រែ ការផ្លាស់ប្តូរផ្សេងៗ នៅក្រសួងពាណិជ្ជកម្ម ១ លានរៀល; ការមិនតម្កល់ទុកប្រតិវេទន៍ប្រចាំឆ្នាំ ២ លានរៀល; ការផ្តល់ព័ត៌មានមិនពិត និងការក្លែងបន្លំឯកសារតម្រូវ សម្រាប់ការចុះបញ្ជី ១ លានរៀល; ការធ្វើប្រតិបត្តិការពាណិជ្ជ កម្មតាមប្រព័ន្ធអេឡិចត្រូនិកដោយគ្មានការអនុញ្ញាត ១០ លានរៀល; ការផ្តល់ព័ត៌មានមិនពិតលើរបាយការណ៍ កំណត់ហេតុ ឬ ឯកសារផ្សេងទៀតរបស់ ក្រុមហ៊ុន ដែលត្រូវផ្ញើមកតម្កល់ទុកនៅក្រសួង ពាណិជ្ជកម្ម ២ លានរៀល; ការមិនបានបញ្ជូនច្បាប់ចម្លង របាយការណ៍ហិរញ្ញវត្ថុមកតម្កល់នៅក្រសួង ពាណិជ្ជកម្ម ២ លានរៀល; និង ការស្នើសុំចុះបញ្ជីម៉ាកសាជាថ្មី ហួសរយៈពេលកំណត់លើសពី ៦ខែ ២ សែនរៀល។
ប្រកាសដដែលអះអាងថា៖ ក្រសួងពាណិជ្ជកម្មត្រូវរៀបចំគម្រោងចំណូលពីការពិន័យទៅតាមប្រភេទបទល្មើសនីមួយៗ នៃប្រកាសអន្តរក្រសួងនេះ ដើម្បីដាក់បញ្ចូលទៅក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ»។
កាលពីថ្ងៃទី ២៤ ឧសភា ក្រសួងពាណិជ្ជកម្មបានជំរុញឲ្យក្រុមហ៊ុនផលិតរថយន្តអគ្គិសនី TESLA របស់អាមេរិកដែលកំពុងសាងសង់ការិយាល័យតាំងបង្ហាញនៅខណ្ឌ ពោធិ៍សែនជ័យ រាជធានីភ្នំពេញ ទៅចុះបញ្ជីពាណិជ្ជកម្ម និង ម៉ាករថយន្តនៅក្រសួង។
ការជំរុញនេះត្រូវបានធ្វើឡើងបន្ទាប់ពីលោក លី គង់ អនុប្រធានមន្ទីរពាណិជ្ជកម្ម រាជធានីភ្នំពេញ និងក្រុមការងារបានសហការជាមួយនឹងរដ្ឋបាលខណ្ឌពោធិ៍សែនជ័យ កាលពីថ្ងៃទី ២៤ ឧសភា បានចុះត្រួតពិនិត្យលើទីតាំងក្រុមហ៊ុនដែលមានស្លាកយីហោ TESLA នៅតាមបណ្ដោយមហាវិថីសហព័ន្ធរុស្ស៊ី សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
លោក លី គង់ ឲ្យដឹងថា ការចុះត្រួតពិនិត្យនេះក្នុងគោលបំណង ដើម្បីណែនាំឲ្យក្រុមហ៊ុនដែលមានទីតាំងខាងលើធ្វើការចុះបញ្ជីពាណិជ្ជកម្ម និងម៉ាករថយន្តរបស់ក្រុមហ៊ុន TESLA នៅក្រសួងពាណិជ្ជកម្ម ហើយស្នើសុំការអនុញ្ញាតលើកស្លាកយីហោនៅរដ្ឋបាលរាជធានីភ្នំពេញ។
លោកប្រាប់ភ្នំពេញ ប៉ុស្តិ៍ថា៖«យើងគ្រាន់តែចុះទៅមើលគាត់ឲ្យធ្វើតាមច្បាប់ ប៉ុន្តែវាមិនទាន់មានលទ្ធផលទេ ចាំមើលចុះទៅមួយលើកពីរលើកទៀត ព្រោះមិនទាន់បានជួបថៅកែផង គេកំពុងជួសជួល»។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ប្រាប់ ភ្នំពេញ ប៉ុស្តិ៍ កាលពីខែមេសា ឆ្នាំនេះថា ក្រសួងពុំទាន់បានទទួលការស្នើសុំណាមួយពីក្រុមហ៊ុនផលិតរថយន្តអគ្គិសនី TESLA របស់អាមេរិកបោះទីតាំងនៅប្រទេសកម្ពុជានៅឡើយទេ។
ទិន្នន័យក្រសួងពាណិជ្ជកម្មបង្ហាញថា ចំនួនក្រុមហ៊ុននិងសហគ្រាសចុះបញ្ជីពាណិជ្ជកម្មថ្មីនៅក្រសួងពាណិជ្ជកម្ម ក្នុងឆ្នាំ ២០២០ មានចំនួន ៧ ៨៦០ ធ្លាក់ចុះ ៤០,៧២ ភាគរយធៀបនឹងឆ្នាំ ២០១៩ ដែលមានចំនួន ១៣ ២៥៩។
ទិន្នន័យនេះឲ្យដឹងទៀតថា ក្នុងចំណោមនោះ ការចុះបញ្ជីក្រុមហ៊ុនពាណិជ្ជកម្មមាន ៥ ៦៧៧ ក្រុមហ៊ុនធ្លាក់ចុះ ៣៩,២៤ ភាគរយ ធៀបនឹងឆ្នាំ ២០១៩ មានចំនួន ៩ ៣៤៤។ ចំណែកការចុះបញ្ជីពាណិជ្ជកម្មដល់សហគ្រាសឯកបុគ្គលថ្មីមាន ២ ១៨៣ ធ្លាក់ ៤៤,២៤ ភាគរយពីចំនួន ៣ ៩១៥។
ជាមួយគ្នានេះដែរ មានក្រុមហ៊ុនសហគ្រាសចំនួន ៥០០ ត្រូវបានស្នើសុំលុបឈ្មោះចេញពីបញ្ជីពាណិជ្ជកម្មដែលចំនួននេះកើនឡើង ១៨៧ ភាគរយពី ១៧៤ កាលពីឆ្នាំ ២០១៩៕
វីដេអូ៖
