.jpg)
ក្រុមហ៊ុនថៃ PTT បង្ហាញផែនការពង្រីកអាជីកម្មនៅជុំវិញពិភពលោក រួមទាំងកម្ពុជាដែរ ទោះបីជាការរីករាលដាលជំងឺកូវីដ ១៩។ រូបថត ភ្នំពេញ ប៉ុស្តិ៍
ភ្នំពេញៈ សហគមន៍អាជីវកម្មនៅកម្ពុជាបានស្វាគមន៍ការបង្ហាញផែនការពង្រីកអាជីវកម្មក្រុមហ៊ុនពហុផលិតផល PTT Oil និង Retail Business (PPTOR) របស់ប្រទេសថៃ នៅក្នុងប្រទេសកម្ពុជា ទោះបីជាការរីករាលដាលជំងឺកូវីដ ១៩ ដែលមិនទាន់ទប់ស្កាត់បានទាំងស្រុងក៏ដោយ។
ប្រព័ន្ធផ្សព្វផ្សាយព័ត៌មាន The Nation របស់ប្រទេសថៃ ដែលបានដកស្រង់សម្តីលោក Jiraphon Kawswat អគ្គនាយកស្ដីទីក្រុមហ៊ុន PPTOR ដែលលើកឡើងកាលពីសប្ដាហ៍មុនថា ក្រុមហ៊ុន PPTOR បានលៃទុកថវិកាចំនួន ៧៤,៦ ពាន់លានបាត (២,៥ ពាន់លានដុល្លារ) សម្រាប់ការពង្រីកអាជីវកម្មស្នូល ៣ របស់ខ្លួនសម្រាប់ឆ្នាំ ២០២១ ដល់ ២០២៥។
សម្រាប់អាជីវកម្មអន្តរជាតិរបស់ខ្លួន ក្រុមហ៊ុននេះនឹងផ្ដោតការយកចិត្តទុកដាក់លើការពង្រីកស្ថានីយចាក់ប្រេង និងសាខាកាហ្វេ Amazon នៅក្នុងប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) បូករួមនឹងប្រទេសហ្វីលីពីន។
ក្រុមហ៊ុននេះក៏នឹងបើកសាខាហាងកាហ្វេ Cafe Amazon បន្ថែមទៀតនៅក្នុងប្រទេសចិន ផងដែរ។ បច្ចុប្បន្នក្រុមហ៊ុន PTT មានស្ថានីយចាក់ប្រេង ៣២៩ ទីតាំង នៅទីផ្សារក្រៅប្រទេស។
លោក លឹម ហេង អនុប្រធានសភាពាណិជ្ជកម្មកម្ពុជាបានស្វាគមន៍ការសម្រេចចិត្តដោយក្រុមហ៊ុន PPTOR នៅប្រទេសទាំងនោះរួមទាំងកម្ពុជាផងដែលជាការពង្រីកអាជីវកម្មជាយុទ្ធសាស្ដ្រដែលអនុវត្តតាមសហគមន៍សេដ្ឋកិច្ចអាស៊ាន ខណៈក្រុមហ៊ុននេះមើលឃើញជាមុនពីវិបុលភាពរបស់តំបន់នេះ។
លោកថ្លែងថា៖ «ជាធម្មតា ពួកគេមើលឃើញឱកាសក្នុងការរីកចម្រើនអាជីវកម្មរបស់ពួកគេនៅក្នុងតំបន់ ព្រមទាំងនៅក្នុងប្រទេសរបស់យើង ខណៈយើងអាចមើលឃើញសាខារបស់ក្រុមហ៊ុន PTT ជាច្រើននៅក្នុងប្រទេសយើង។ អ្វីដែលពួកគេកំពុងធ្វើគឺស្របតាមគោលការណ៍របស់សហគមន៍អាស៊ាន ហើយយើងស្វាគមន៍ការពង្រីកអាជីវកម្មរបស់ពួកគេនៅក្នុងប្រទេសរបស់យើង»។
យោងតាមកាសែត The Nation សម្រាប់ថវិកាសរុបរបស់ក្រុមហ៊ុន PPTOR គឺមាន ៣៤,៦ ភាគរយ នឹងត្រូវវិនិយោគលើអាជីវកម្មប្រេងឥន្ធនៈ ២៨,៦ ភាគរយ លើអាជីវកម្មមិនមែនប្រេង និង ២១,៨ ភាគរយលើអាជីវកម្មអន្តរជាតិ។ ថវិកាដែលនៅសល់នឹងត្រូវចំណាយលើអាជីវកម្មផ្សេងទៀត និងលើការស្វែងរកឱកាសអាជីវកម្មថ្មីៗ។
ស្ថានទូតកម្ពុជាប្រចាំទីក្រុងបាងកកនឹងបង្កើតការិយាល័យតំណាងសម្រាប់ «ក្រុមប្រឹក្សាពាណិជ្ជកម្មកម្ពុជា (CBC)» នៅក្នុងទីក្រុងបាងកកក្នុងរយៈពេលប៉ុន្មានខែខាងមុខនេះ ដើម្បីបម្រើជាការិយាល័យច្រកចេញចូលតែមួយសម្រាប់ក្រុមហ៊ុន និងពាណិជ្ជកម្មរវាងប្រទេសកម្ពុជា និងថៃ។
លោក អ៊ូក សោភ័ណ ឯកអគ្គរាជទូតកម្ពុជាប្រចាំទីក្រុងបាងកកបានប្រាប់ ភ្នំពេញ ប៉ុស្ដិ៍ ពេលថ្មីៗនេះថា CBC នឹងបង្កើត «សសរស្ដម្ភនៃការតស៊ូមតិ» នៅក្នុងការិយាល័យនេះដែលនឹងខិតខំប្រឹងប្រែងដើម្បីលើកកម្ពស់ការសន្ទនារវាងក្រុមវិនិយោគិនថៃ និងសមភាគីកម្ពុជានៅក្នុងវិស័យរដ្ឋាភិបាល និងឯកជន។
ពាណិជ្ជកម្មទ្វេភាគីរវាងកម្ពុជា និងថៃមានតម្លៃ ៥,៥៦៩ ពាន់លានដុល្លារ ក្នុងរយៈពេល ៩ ខែដំបូងឆ្នាំ ២០២០ ធ្លាក់ចុះ ១៩ ភាគរយបើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យបានពីក្រសួងពាណិជ្ជកម្មថៃ។
ការនាំចេញរបស់កម្ពុជាទៅប្រទេសថៃ មានចំនួន ៩៥០ លានដុល្លារធ្លាក់ចុះ ៤៨ ភាគរយ ខណៈការនាំចូលមានតម្លៃ ៤,៦១១ ពាន់លានដុល្លារ ធ្លាក់ ៩ ភាគរយ។
ក្រសួងពាណិជ្ជកម្មថៃបានឱ្យដឹងថា ភាគច្រើននៃការនាំចេញរបស់កម្ពុជាទៅប្រទេសថៃរួមមានត្បូងមានតម្លៃ គ្រឿងអលង្ការផលិតផលកសិកម្ម និងអាលុយមីញ៉ូម រីឯការនាំចូលវិញភាគច្រើនជាប្រេងឥន្ធនៈ ម៉ូតូ រថយន្ត ត្បូងមានតម្លៃ និងគ្រឿងអលង្ការ៕LA
