ភ្នំពេញៈ ឆាយណា យូនីខម ជាប្រតិបត្តិករទូរគមនាគមន៍ឈានមុខគេរបស់ប្រទេស ចិន និងជាក្រុមហ៊ុនចុះបញ្ជីនៅផ្សារហ៊ុនហុងកុងបានពង្រីកវត្តមានរបស់ខ្លួនមកកម្ពុជាដើម្បីបង្កើតផ្លូវទូរគមនាគមន៍អ៊ុបទិក តំបន់ជាច្រើននៅក្នុងគំនិតផ្តួចផ្ដើមខ្សែក្រវាត់មួយ ផ្លូវមួយ។
ក្រុមហ៊ុននេះបានបើកក្រុមហ៊ុនបុត្រសម្ព័ន្ធរបស់ខ្លួន China Unicom (Cambodia) កាលពីថ្ងៃទី ៣០ ខែវិច្ឆិកា ហើយក៏ជាប្រតិបត្តិករទូរគមនាគមន៍ចុងក្រោយគេបង្អស់ចូលក្នុងឧស្សាហកម្មទូរគមនាគមន៍ដ៏ចង្អៀតរបស់ប្រទេសកម្ពុជា។
លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានប្រកាសស្វាគមន៍ចំពោះបណ្ដាវិនិយោគិនចិនដែលមានបំណងចង់មកវិនិយោគនៅគ្រប់វិស័យនៅកម្ពុជា។ ក្នុងនោះលោករដ្ឋមន្ដ្រីបានប្រកាសស្វាគមន៍ចំពោះក្រុមហ៊ុន ឆាយណា យូនីខម របស់ចិនដែលបើកសម្ពោធជាផ្លូវការនៅក្នុងប្រទេសកម្ពុជាផងដែរ។
មកទល់បច្ចុប្បន្ននេះ ក្រុមហ៊ុន ឆាយណា យូនីខម បានបង្កើតសាខានៅតាមបណ្តាប្រទេស និងតំបន់ដែលស្ថិតនៅក្នុងគម្រោង «ផ្លូវមួយខ្សែក្រវាត់មួយ» ចំនួន ១៣ សាខាហើយ។ លោកថ្លែងថា៖ «ការវិនិយោគ និងការសាងសង់ ហេដ្ឋារចនាសម្ព័ន្ធទូរគមនាគមន៍ដោយក្រុមហ៊ុន ឆាយណា យូនីខម នៅក្នុងប្រទេសដែលស្ថិតតាមគម្រោង «ផ្លូវមួយខ្សែក្រវាត់មួយ» បាននាំមកនូវសមិទ្ធផលយ៉ាងសំខាន់មកលើការអភិវឌ្ឍវិស័យ ទូរគមនាគមន៍ក្នុងតំបន់អាស៊ីអាគ្នេយ៍»។
លោកបន្តថា៖ «យើងជឿជាក់ថា សហប្រតិបត្តិការរវាងធុរកិច្ចកម្ពុជា និងចិននឹងបន្តយ៉ាងជ្រាលជ្រៅ នាពេលអនាគតដោយនាំមកនូវសេវាកម្ម បណ្តាញ និងទូរគមនាគមន៍ ដែលផ្អែកលើ cloud-based ដែលមានគុណភាពខ្ពស់មកកាន់កម្ពុជា»។
លោកស្រី Meng ShuSen ប្រធានក្រុមហ៊ុន China Unicom Global បានឲ្យដឹងថា ការបង្កើតក្រុមហ៊ុនកម្ពុជាជាស្ពានមួយសម្រាប់ផ្តល់ព័ត៌មាន និងទំនាក់ទំនងទៅវិញទៅមករវាងកម្ពុជា និងចិន។
លោកស្រីថ្លែងថា៖ «ក្រុមហ៊ុនក៏សង្ឃឹមថា ការផ្តួចផ្តើមរបស់ក្រុមហ៊ុនមិនត្រឹមតែផ្តល់សេវាកម្មទូរគមនាគមន៍ដែលគុណភាពនោះឡើយ ប៉ុន្តែការផ្តួចផ្តើមនេះក៏នឹងជួយសហគ្រាសនៅកម្ពុជាក្នុងការវិនិយោគទៅក្នុងប្រទេសចិនផងដែរ។ ដូច្នេះនឹងបង្កើតបានជាសហប្រតិបត្តិការដែលរឹងមាំ និងមានអត្ថប្រយោជន៍ដែលជាការបន្ថែមអត្ថន័យទៅលើគម្រោងផ្លូវមួយខ្សែក្រវាត់មួយផងដែរ»។
ស្ថិតិបានពីនិយតករទូរគមនាគមន៍កម្ពុជាបានបង្ហាញថា ស៊ីមកាត ២០,៨ លានត្រូវបានចុះបញ្ជីក្នុងអំឡុងឆមាសទី ១ ឆ្នាំ ២០១៩ កើនឡើង ៩,៤ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ការតភ្ជាប់អ៊ីនធឺណិតទាំងអ៊ីនធឺណិតចល័ត និងអ៊ីនធឺណិតលើតុកើនឡើង ៣១,៦ ភាគរយ កើនដល់ ១៥,៨ លាន ក្នុងអំឡុងនេះធៀបនឹង ១២ លាន ក្នុងរយៈពេលដូចគ្នាពីឆ្នាំមុន។ នេះបើតាមរបាយការណ៍៕LA
វីដេអូ៖