ក្រុងស៊ីដនីៈ ក្រុមហ៊ុនទូរគមនាគមន៍ Telstra ដែលឈានមុខគេរបស់ប្រទេសអូស្ដ្រាលី កាលពីថ្ងៃពុធ បានប្រកាសផែនការកាត់បន្ថយការងារ ៨ ០០០ កន្លែង ស្មើនឹង ១ ភាគ ៤ នៃកម្លាំងពលកម្មរបស់ខ្លួន។
ការកាត់បន្ថយការងារនេះគឺជាផ្នែកមួយនៃយុទ្ធសាស្ដ្រថ្មីដ៏ខ្លាំងក្លាក្នុងការជម្នះជាមួយឧស្សាហកម្មដែលមានការប្រកួតប្រជែងកាន់តែខ្លាំងនេះ។
ការសម្រេចចិត្តរបស់ក្រុមហ៊ុននេះ ដែលជាក្រុមហ៊ុនមួយក្នុងចំណោមក្រុមហ៊ុនធំបំផុតក្នុងប្រទេសអូស្រ្តាលី គឺជាផ្នែកមួយនៃការផ្លាស់ប្តូរដ៏ធំមួយ ដែលកំណត់ទិសដៅកាត់បន្ថយការចំណាយបន្ថែម ១ ពាន់លានដុល្លារអូស្ដា្រលី (៧៥០ លានដុល្លារ) នៅត្រឹមឆ្នាំ ២០២២ ដែលលើសពីការប្រកាសកន្លងមកថាមានតែចំនួន ១,៥ ពាន់លានដុល្លារ។
ដើម្បីបង្កើតប្រតិបត្តិការកាន់តែរួមតូច ក្រុមហ៊ុននេះនឹងបំបែកផ្នែកចល័ត និងផ្នែកហេដ្ឋារចនាសម្ព័ន្ធរបស់ខ្លួនទៅជាអាជីវកម្មដោយឡែកផងដែរ។
លោក Andrew Penn ប្រធានប្រតិបត្តិក្រុមហ៊ុន Telstra បានថ្លែងថា៖ «យើងនឹងបង្កើតក្រុមហ៊ុន Telstra ថ្មីមួយ ដែលអាចបន្តនាំមុខទីផ្សារនេះ»។
លោកបន្តថា៖ «នៅពេលអនាគត កម្លាំងពលកម្មរបស់យើង នឹងក្លាយជាកម្លាំងពលកម្មមានមូលដ្ឋានលើចំណេះដឹង មានចំនួនកាន់តែតិច ជាមួយនឹងរចនាសម្ព័ន្ធមួយ និងរបៀបការងារ ដែលមានភាពរហ័សរហួនគ្រប់គ្រាន់ ក្នុងការដោះស្រាយជាមួយនឹងការផ្លាស់ប្តូរយ៉ាងរហ័ស។
លោកបន្តថា៖ «នេះមានន័យថា តួនាទីមួយចំនួន នឹងលែងត្រូវការទៀតហើយ មួយចំនួននឹងផ្លាស់ប្តូរ ហើយនឹងមានតួនាទីថ្មីត្រូវបានបង្កើតឡើងផងដែរ»។
ការកាត់បន្ថយនេះធ្វើឡើងមិនដល់រយៈពេលមួយខែ បន្ទាប់ពីក្រុមហ៊ុន Telstra បានឲ្យដឹងថា ប្រាក់ចំណេញឆ្នាំ ២០១៧-២០១៨ របស់ខ្លួននឹងមានកម្រិតទាបពី ១០,១ពាន់លាន ទៅ ១០,៦ ពាន់លានដុល្លារអូស្ដ្រាលី ដែលការប្រកួតប្រជែងកាន់តែខ្លាំងឡើង នៅក្នុងអ៊ីនធឺណិតចល័ត និងអ៊ិនធឺណិតលើតុ៕ AFP/LA