ភ្នំពេញ: ក្រសួងប្រៃសណីយ៍ និងទូរគមនាគមន៍បានជំរុញឲ្យប្រតិបត្តិករទូរគមនាគមន៍ក្នុងស្រុកចាក់បញ្ចូលសាច់ប្រាក់សម្រាប់បង្កើនការវិនិយោគលើហេដ្ឋារចនាសម្ព័ន្ធ ដើម្បីពង្រឹងគុណភាពសេវាទូរស័ព្ទចល័ត និងអ៊ីនធឺណិតដែលកំពុងមានតម្រូវការប្រើប្រាស់កើនឡើងយ៉ាងគំហុកក្នុងអំឡុងពេលមានការរីករាលដាលជំងឺកូវីដ ១៩។
សេចក្តីជូនដំណឹងរបស់ក្រសួងចេញផ្សាយថ្មីៗនេះបានឲ្យដឹងថា ក្រោយពីមានភាពរអាក់រអួលសេវាទូរស័ព្ទចល័តនៅតាមតំបន់មួយចំនួនក្រសួងបានចាត់ក្រុមការងាររបស់និយតករទូរគមនាគមន៍កម្ពុជា (TRC) ចុះពិនិត្យគុណភាពសេវាទូរស័ព្ទឡើងវិញដើម្បីជំរុញឲ្យប្រតិបត្តិករទូរស័ព្ទចល័តទាំងអស់ពង្រឹងគុណភាពសេវារបស់ខ្លួនឲ្យបានល្អតាមរយៈបំពាក់ឧបករណ៍ និងការសាងសង់បង្គោលអង់តែនបន្ថែម។
ក្រសួងអះអាងថា៖ «ប្រតិបត្តិករទូរគមនាគមន៍ចល័តទាំងអស់ត្រូវពង្រឹងគុណភាពសេវាទូរស័ព្ទរបស់ខ្លួននៅគ្រប់ទីកន្លែង ជាពិសេសនៅតាមតំបន់តាមទីប្រជុំជន និងតំបន់អភិវឌ្ឍន៍ថ្មីដោយបំពាក់ឧបករណ៍ផ្តល់សេវា ឬសាងសង់បង្គោលអង់តែនបន្ថែមទៀតជាកំហិត»។
ក្រសួងអះអាងថា រាល់ការផ្តល់សេវាទូរស័ព្ទចល័តដែលមិនមានគុណភាពគឺជាអំពើមិនសុចរិត ដូចមានចែងក្នុងច្បាប់ស្តីពីកិច្ចការពារអ្នកប្រើប្រាស់។
លោក អ៊ឹម វុត្ថា អ្នកនាំពាក្យនិយតករទូរគមនាគមន៍កម្ពុជា (TRC) ប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ការប្រើប្រាស់អ៊ីនធឺណិតសម្រាប់ទាញយក (download) កម្មវិធីផ្សេងៗមានការកើនឡើងរហូតដល់ ១០៤ ភាគរយក្នុងត្រីមាសទី ១ ឆ្នាំ ២០២០ ធៀបរយៈពេលដូចគ្នាកាលពីឆ្នាំមុន ខណៈការ upload កើនឡើង ៩២ ភាគរយក្នុងអំឡុងពេលនេះ។
លោកថ្លែងថា៖ «បញ្ហាជំងឺកូវីដ ១៩ បានធ្វើឲ្យមនុស្សធ្វើការងារតាមអនឡាញច្រើន ជាពិសេសសិស្សានុសិស្សរៀនតាមអនឡាញ ហើយការប្រកបរបររកស៊ីរបស់ប្រជាជនជាច្រើនបានងាកមករកស៊ីតាមអនឡាញក៏ច្រើនដែរ ដែលនាំឲ្យការប្រើប្រាស់អ៊ីនធឺណិតកើនឡើងយ៉ាងខ្លាំង»។
លោក Thomas Hundt អគ្គនាយកក្រុមហ៊ុន Smart Axiata បានឲ្យដឹងថា ក្រុមហ៊ុន Smart បានវិនិយោគចន្លោះពី ៧០ ទៅ ៨០ លានដុល្លារ ជារៀងរាល់ឆ្នាំទៅលើការចំណាយមូលធន (CAPEX) ដែលជាចម្បងសម្រាប់ការពង្រីកបណ្តាញ និងបច្ចេកវិទ្យាចល័តទំនើប។
លោកបន្តថានៅចុងឆ្នាំ ២០១៩ ក្រុមហ៊ុន Smart បានវិនិយោគដើមទុន និងចំណាយប្រតិបត្តិការសរុប ១,៦៦ ពាន់លានដុល្លារ ដើម្បីពង្រឹងភាពជាអ្នកដឹកនាំទិន្នន័យចល័តជាពិសេសពង្រីកបណ្តាញ 4.5G។
លោកថ្លែងថា៖ «យើងក៏បានប្តេជ្ញាចិត្តចំណាយ ២ ភាគរយ នៃចំណូលប្រចាំឆ្នាំសម្រាប់ពង្រីកសេវាកម្មទៅកាន់តំបន់ដាច់ស្រយាលរបស់ប្រទេសកម្ពុជា»។
បើយោងតាមលោក វុត្ថា បច្ចុប្បន្ន សេវាទូរស័ព្ទចល័ត និងអ៊ីនធឺណិតបណ្តាញ 4G របស់កម្ពុជាបានគ្របដណ្តប់លើផ្ទៃប្រទេសចំនួន ៥៣ ភាគរយ នៃអ្នកប្រើប្រាស់អ៊ីនធឺណិតជាង ១៥ លាននាក់ ខណៈកម្ពុជាមានបណ្តាញខ្សែកាបអុបទិកមេប្រវែងសរុបជាង ៤៤ ២៥១ គីឡូម៉ែត្រ ដែលវិនិយោគដោយក្រុមហ៊ុន CFOCN ក្រុមហ៊ុន Telecom Cambodia និងក្រុមហ៊ុន Viettel (Cambodia)។
លោកឲ្យដឹងថា៖ «សេវាគ្របដណ្តប់នេះភាគច្រើនប្រតិបត្តិករទូរគមនាគមន៍វិនិយោគតែនៅក្នុងតំបន់ពាណិជ្ជកម្មធំៗតែប៉ុណ្ណោះ»៕ LA