ក្រុងឡុងដ៍ៈ វត្តមានរយៈពេល ១៧៨ ឆ្នាំ របស់ក្រុមហ៊ុន Thomas Cook កាលពីថ្ងៃអាទិត្យកំពុងស្ថិតក្នុងស្ថានភាពគ្រោះថ្នាក់យ៉ាងខ្លាំង បន្ទាប់ពីក្រុមហ៊ុនទេសចរណ៍ដ៏ល្បីរបស់ចក្រភពអង់គ្លេសមួយនេះបានជម្នះក្នុងការស្វែងរកការវិនិយោគឯកជនបន្ថែមទៀត ហើយនៅពេលនេះកំពុងពឹងផ្អែកលើជំនួយសង្គ្រោះរបស់រដ្ឋាភិបាលដែលមិនទំនងជានឹងទទួលបាន។
ប្រតិបត្តិករទេសចរណ៍មួយនេះបានឲ្យដឹងកាលពីថ្ងៃសុក្រថា ខ្លួនត្រូវការ ២០០ លានផោន (២៥០ លានដុល្លារ) បន្ថែមទៅលើកិច្ចព្រមព្រៀងជំនួយសង្គ្រោះមានទំហំ ៩០០ លានផោន ដែលបានទទួលកាលពីខែមុន បើមិនដូច្នេះទេប្រឈមនឹងការកើតមានបញ្ហារដ្ឋបាលដែលអាចបណ្ដាលឲ្យអ្នកធ្វើដំណើរកម្សាន្ដរាប់ពាន់នាក់ត្រូវជាប់គាំង និងតម្រូវឲ្យការធ្វើមាតុភូមិនិវត្តន៍ដ៏ច្រើនបំផុតមិនធ្លាប់មានរបស់ចក្រភពអង់គ្លេសគិតចាប់តាំងពីសង្គ្រាមលោកលើកទី ២ មក។
ប្រភពជិតស្និទ្ធ និងការចរចានេះបានប្រាប់ទីភ្នាក់ងារព័ត៌មាន AFP កាលពីថ្ងៃសៅរ៍ថា ក្រុមហ៊ុននេះបានបរាជ័យក្នុងការស្វែងរកប្រាក់ ២០០ លានផោន ពីក្រុមវិនិយោគិនឯកជន ហើយនឹងក្ស័យធន លុះត្រាដែលរដ្ឋាភិបាលធ្វើអន្តរាគមន៍។
ប៉ុន្តែកាសែត Times របស់អង់គ្លេសបានរាយការណ៍កាលពីថ្ងៃសៅរ៍ថា ក្រុមរដ្ឋមន្ដ្រីអង់គ្លេសមិនទំនងជានឹងចូលអន្តរាគមន៍នោះទេ ដោយសារការបារម្ភអំពីការអាចបន្តរស់បានរយៈពេលវែងរបស់ក្រុមហ៊ុននេះដែលនឹងទុកឲ្យក្រុមហ៊ុននេះក្ស័យធន និងបង្កឲ្យមានការជាប់គាំងអ្នកដំណើរកម្សាន្តជនជាតិអង់គ្លេសរហូតដល់ ១៥០ ០០០ នាក់ នៅបរទេស។
លោករដ្ឋមន្ដ្រី Brandon Lewis ឲ្យដឹងនៅថ្ងៃអាទិត្យថា វានឹង «មិនសមរម្យ» សម្រាប់រូបលោកក្នុងការធ្វើអត្ថាធិប្បាយអំពីការចរចានេះ ប៉ុន្តែលោកសង្ឃឹមថា ពួកគេនឹងសម្រេចបានលទ្ធផលចរចាដោយវិជ្ជមាន៕ LA