ក្រុងបាងកកៈ បើទោះជាការនាំចេញបន្តកើនឡើងកាលពីខែកុម្ភៈក្តី ក៏ក្តីបារម្ភពីសង្គ្រាមពាណិជ្ជកម្មរវាងអាមេរិក និងប្រទេសចិន និងកំណើនថ្លៃខ្ពស់របស់ប្រាក់បាត គំរាមកំហែងធ្វើឲ្យការនាំចេញទៅក្រៅប្រទេសធ្លាក់ចុះ។
លោកស្រី Ghanyapad Tantipipatpong ប្រធានក្រុមប្រឹក្សាក្រុមហ៊ុននាំចេញជាតិថៃ (TNSC) បានថ្លែងថាក្រុមហ៊ុននាំចេញមួយចំនួននៅតែព្រួយបារម្ភអំពីគោលនយោបាយរបស់សហរដ្ឋអាមេរិកដែលមានលក្ខណៈគាំពារនិយម និងវិធានការវាយបកវិញពីប្រទេសដែលបានរងផលប៉ះពាល់មួយចំនួនជាពិសេសប្រទេសចិន។
លោកស្រីបានថ្លែងថា៖ «បើស្ថានភាពជម្លោះរវាងអាមេរិក និងចិនឈានដល់សង្គ្រាមពាណិជ្ជកម្មនោះ សេដ្ឋកិច្ចពិភពលោក និងខ្សែចង្វាក់ផ្គត់ផ្គង់ពិភពលោកនឹងរងផលប៉ះពាល់»។
លោកស្រី Ghanyapad បានបន្ថែមថា៖ «ការនាំចេញផលិតផលកសិកម្ម និងស្បៀងអាហារនឹងត្រូវរងផលប៉ះពាល់ខ្លាំងបំផុត បើប្រាក់បាតបន្តឡើងថ្លៃ»។ លោកបន្តថាផលប៉ះពាល់នេះអាចធ្វើឲ្យកំណើននាំចេញធ្លាក់ចុះមកនៅត្រឹម ៥ ភាគរយក្នុងឆ្នាំនេះធៀបនឹងកំណើនដែលបានព្យាករនាពេលកន្លងមក ៦ ភាគរយ។
ក្រសួងពាណិជ្ជកម្មថៃបានរាយការណ៍កាលពីថ្ងៃទី ២១ ខែមីនាថាការនាំចេញបានកើនឡើង ១២ ខែជាប់គ្នាគិតត្រឹមខែកុម្ភៈដោយបាននាំមកចំណូល ២០,៤ ពាន់លានដុល្លារភាគច្រើនត្រូវបានជំរុញដោយការស្ទុះងើបឡើងវិញនៃសេដ្ឋកិច្ច និងកំណើនតម្រូវការពីប្រទេសជាដៃគូពាណិជ្ជកម្មធំៗ។ កំណើនការនាំចេញត្រូវបានជំរុញដោយរថយន្ត និងគ្រឿងបន្លាស់រថយន្ត កុំព្យូទ័រ និងគ្រឿងផ្គុំ ផលិតផលកៅស៊ូ និងទំនិញមួយចំនួនទៀត៕ BP