.jpg)
សកម្មភាពកម្មករកំពុងលើកការុងអង្ករនៅហាងលក់អង្ករ ១ កន្លែងក្នុងទីក្រុងភ្នំពេញ។ អង្ករកម្ពុជាកំពុងរងសម្ពាធក្នុងការនាំចូលទៅទីផ្សារអឺរ៉ុប។ ហេង ជីវ័ន
ភ្នំពេញៈ ក្រុមហ៊ុននាំចេញអង្ករកម្ពុជាអាចបន្តការនាំចេញអង្ករទៅទីផ្សារអឺរ៉ុបដោយរួចពន្ធបន្តទៀត តាមរយៈការលក់អង្ករពាក់កណ្តាលសម្រេចទៅឲ្យក្រុមហ៊ុនរោងម៉ាស៊ីននៅអឺរ៉ុបជំនួសវិញ ដោយសារថា អង្ករពាក់កណ្តាលសម្រេចពីកម្ពុជានៅអាចនាំចូលទៅអឺរ៉ុបក្នុងអត្រាពន្ធសូន្យ។ នេះបើយោងតាមការលើកឡើងពីអ្នកជំនាញក្នុងឧស្សាហកម្មស្រូវ-អង្ករ ១ រូប។
សហភាពអឺរ៉ុប (EU) បានសម្រេចយកពន្ធលើអង្ករនាំចូលពីប្រទេស កម្ពុជា និងមីយ៉ាន់ម៉ា ដែលមានប្រសិទ្ធភាពអនុវត្តចាប់ពីថ្ងៃសុក្រ ទី ១៨ សប្តាហ៍មុនតាមសំណើតវ៉ារបស់ប្រទេស អ៊ីតាល។ មុនពេលតម្រូវឲ្យកម្ពុជាបង់ពន្ធ ភាគច្រើននៃអង្ករនាំចេញពីកម្ពុជាជាផលិតផលសម្រេច សម្រាប់ដាក់លក់នៅលើទីផ្សារលក់រាយ និងសម្រាប់អ្នកប្រើប្រាស់ចុងក្រោយនៅអឺរ៉ុប។
លោក សុង សារ៉ន ស្ថាបនិក និងជាប្រធានក្រុមហ៊ុននាំចេញអង្ករ អេមរូ រ៉ាយស៍ ដែលជាអ្នកនាំចេញអង្ករធំមួយនៅកម្ពុជា បានលើកឡើងនៅក្នុងគេហទំព័រហ្វេសប៊ុករបស់លោកថា វិធានរបស់សហភាពអឺរ៉ុបទាក់ទងនឹងការដាក់ពន្ធអង្ករកម្ពុជា និងមីយ៉ាន់ម៉ា គឺនៅតែទុកអត្រាពន្ធសូន្យដដែលប្រសិនបើកម្ពុជាលក់អង្ករពាក់កណ្តាលសម្រេចទៅឲ្យក្រុមហ៊ុនរោងម៉ាស៊ីន ឬ រោងចក្រកែច្នៃនៅអឺរ៉ុប។ លោកបានបញ្ជាក់ថា គោលដៅរបស់សហភាពអឺរ៉ុប គឺដើម្បីទប់ស្កាត់ការដួលរលំនៃក្រុមហ៊ុនកែច្នៃអង្ករនៅប្រទេសផលិតស្រូវនៅអឺរ៉ុបដែលមានដូចជា អ៊ីតាលី និង អេស្ប៉ាញជាដើម។
លោកបន្តថា៖ «យើងកំពុងផ្ញើសំណាកអង្ករពាក់កណ្តាលសម្រេច និងប្រភេទអង្ករសម្រេច ផ្សេងទៀតដែលនៅមានអត្រាពន្ធសូន្យ [សហភាពអឺរុបដាក់ផលិតផលអង្ករកម្ពុជាតែ ៤ មុខប៉ុណ្ណោះឲ្យជាប់ពន្ធ] ឲ្យគាត់ពិនិត្យ»។
លោកបន្តថា៖ «ខ្ញុំមានជំនឿថា យ៉ាងយូរចុងខែកុម្ភៈយើងចេញអង្ករទៅ EU ធម្មតាដោយមិនជាប់ពន្ធ»។
យ៉ាងណាក៏ដោយ លោក សារ៉ន បញ្ជាក់ថា បរិមាណនាំចេញអង្ករទៅទីផ្សារសហភាពអឺរ៉ុបនឹងថយចុះក្នុងឆ្នាំ ២០១៩ ដល់ឆ្នាំ ២០២១ ដោយសារអ្នកប្រើប្រាស់អាចទិញអង្ករសម្រេចដែលនាំចូលពីប្រទេសផ្សេងវិញ។
លោកបន្តថា កម្ពុជាក៏អាចព្យាយាមបង្កើនការនាំចេញតាមប្រព័ន្ធ Tariff Rate Quota (TRQ) ដែលជាប្រព័ន្ធមួយតម្រូវឲ្យក្រុមហ៊ុននៅអឺរ៉ុប បញ្ជាទិញពីកម្ពុជា ដើម្បីរួចពន្ធ។ ប៉ុន្តែការអនុវត្តតាមប្រព័ន្ធនេះនៅមានចំនួនតិចតួចប៉ុណ្ណោះ។
ទាំងលោក សារ៉ន និងតំណាងសហព័ន្ធស្រូវ អង្ករកម្ពុជា មិនអាចទាក់ទងដើម្បីសុំការអត្ថាធិប្បាយបន្ថែមអំពីវិធានការថ្មីៗដែលអាចសម្រេចឡើងដើម្បីឆ្លើយតបនឹងការដាក់ពន្ធរបស់សហភាពអឺរ៉ុបបាននៅឡើយទេកាលពីម្សិលមិញ។
ទិន្នន័យរដ្ឋាភិបាលកម្ពុជាបានបង្ហាញថា ប្រទេស កម្ពុជា បាននាំចេញអង្ករសរុប ៦២៦ ២២៥ តោនកាលពីឆ្នាំ ២០១៨ ក្នុងចំណោមនោះសហភាពអឺរ៉ុបបានស្រូបយកប្រហែល ៤៣ ភាគរយនៃការនាំចេញសរុបដែលមានចំនួន ២៦៩ ១២៧ តោន។
សេចក្តីថ្លែងការណ៍របស់ក្រសួងពាណិជ្ជកម្មចេញផ្សាយកាលពីថ្ងៃសុក្រ បានលើកឡើងថា ការសម្រេចរបស់ EU ដែលដាក់ពន្ធលើអង្ករនាំចូលពីកម្ពុជាមិនបានឆ្លុះបញ្ចាំងទាំងស្រុងលើទិដ្ឋភាពច្បាប់ពាណិជ្ជកម្មអន្តរជាតិ បទដ្ឋានបច្ចេកទេស និងសច្ចភាព និងកិច្ចសហការល្អកន្លងមករវាងកម្ពុជា និងសហភាពអឺរ៉ុប។ សេចក្តីថ្លែងការណ៍បន្តថា ក្រសួងពាណិជ្ជកម្មកំពុងផ្ទៀងផ្ទាត់សេចក្តីសម្រេចរបស់ EU ដោយផ្អែកលើទិដ្ឋភាពច្បាប់ និងវិធានពាណិជ្ជកម្មអន្តរជាតិដើម្បីបន្តធ្វើការតវ៉ាទល់នឹងសេចក្តីសម្រេចនេះ។
លោកនាយករដ្ឋមន្រ្តី ហ៊ុន សែន កាលពីថ្ងៃទី ២០ ខែមករា បានលើកឡើងនៅក្នុងពិធីសំណេះសំណាលជាមួយនិស្សិតកម្ពុជាដែលកំពុងសិក្សានៅទីក្រុងប៉េកាំង ប្រទេស ចិន ថា ប្រទេស កម្ពុជា នឹងបន្តរក្សាកិច្ចសហការលើគ្រប់វិស័យជាមួយប្រទេស ចិន ដែលរួមទាំងវិស័យសេដ្ឋកិច្ច ពាណិជ្ជកម្ម និងទេសចរណ៍។
លោកនាយករដ្ឋមន្ត្រីបានបន្តថា កម្ពុជានឹងត្រូវខិតខំពង្រីកទីផ្សារផលិតផលខ្លួនបន្ថែមទៀតក្រៅតែពីទីផ្សារអាមេរិក និងអឺរ៉ុប៕
