ភ្នំពេញ: ចំនួនក្រុមហ៊ុន និងរោងម៉ាស៊ីនកែច្នៃអង្ករកម្ពុជានាំចេញទៅកាន់ប្រទេស ចិន បានកើនដល់ ៤៤ បន្ទាប់ពីអាជ្ញាធរចិនទទួលស្គាល់ក្រុមហ៊ុន និងរោងម៉ាស៊ីនចំនួន ១៨ បន្ថែមទៀតកាលពីដើមខែធ្នូនេះ។
វិស័យឯកជនបានឲ្យដឹងថា កំណើននេះនឹងជួយឲ្យកម្ពុជាសម្រេចបានកូតានាំចេញអង្ករ ៤០ ម៉ឺនតោនទៅកាន់ប្រទេស ចិន ដែលនឹងចាប់ផ្តើមនៅឆ្នាំ ២០២០ ខាងមុខ។
ស្ថានទូតប្រទេសចិនប្រចាំនៅកម្ពុជាកាលពីថ្ងៃសុក្របានឲ្យដឹងថា ចិនបានសម្រេចអនុញ្ញាតឲ្យរោងម៉ាស៊ីនកិនស្រូវកម្ពុជាចំនួន ១៨ បន្ថែមទៀតមានសិទ្ធិនាំចេញអង្ករនៅទីផ្សារប្រទេស ចិន ដែលធ្វើឲ្យចំនួននេះកើនដល់ ៤៤។
សេចក្តីប្រកាសព័ត៌មានបានឲ្យដឹងថា៖ «សហគ្រាសទាំង ១៨ ក្រុមហ៊ុន ដែលទើបចូលរួមនេះនឹងជួយសម្រេចបាននូវគោលដៅនៃការនាំចេញអង្ករទៅកាន់ប្រទេស ចិន ៤០ ម៉ឺនតោន ជារៀងរាល់ឆ្នាំកាន់តែល្អប្រសើរ»។
លោក ចាន់ សុឃាំង អនុប្រធានសហព័ន្ធស្រូវអង្ករកម្ពុជាបានឲ្យដឹងថា ការសម្រេចបន្ថែមចំនួនរោងម៉ាស៊ីនកិនស្រូវកែច្នៃនាំចេញនេះធ្វើឡើងតាមសំណើរបស់សហព័ន្ធស្រូវកម្ពុជា ដើម្បីបង្កើនសមត្ថភាពផ្គត់ផ្គង់ទៅកាន់ទីផ្សារចិន។ លោកបន្ថែមថាក្នុងខែមករា ឆ្នាំ ២០២០ កម្ពុជានឹងចាប់ផ្តើមអនុវត្តការផ្គត់ផ្គង់កូតានាំចេញអង្ករទៅចិន ៤០ ម៉ឺនតោន។
លោកបានថ្លែងថា៖ «វាជាសញ្ញាវិជ្ជមាន ដែលនឹងធ្វើឲ្យលទ្ធភាពប្រកួតប្រជែងរបស់អង្ករកម្ពុជាមានឱកាសធំជាងមុន ហើយការផលិតក៏រីកធំជាងមុនផងដែរ»។
លោក ហេង ផេង នាយកប្រតិបត្តិក្រុមហ៊ុន Thmor Korl Rice Import Export Co., Ltd ជាក្រុមហ៊ុននាំចេញអង្ករនៅខេត្តបាត់ដំបងបានប្រាប់ភ្នំពេញប៉ុស្តិ៍កាលពីថ្ងៃចន្ទថា ចិនគឺជាទីផ្សារធំសម្រាប់ការនាំអង្ករចេញរបស់កម្ពុជា។ លោកបានបន្ថែមថាក្នុងរយៈពេល ១១ ខែ ឆ្នាំ ២០១៩ នេះក្រុមហ៊ុនរបស់លោកបាននាំចេញអង្ករទៅកាន់ប្រទេសចិនសម្រេចបានប្រមាណ ២ ០០០ តោន។
លោកថ្លែងថា៖ «ការកើនឡើងចំនួនរោងម៉ាស៊ីននេះនឹងជួយជំរុញកំណើនបរិមាណការនាំចេញអង្ករទៅចិនច្រើនជាងមុន ហើយវានឹងអាចជួយបំពេញកូតានាំចេញ ៤០ ម៉ឺនតោនរបស់ចិនផងដែរ»។
កាលពីថ្ងៃពុធ ក្រុមហ៊ុននាំចេញអង្ករ Mekong Oryza Trading បានចុះហត្ថលេខាលើអនុស្សរណៈយោគយល់គ្នា (MoU) ជាមួយក្រុមហ៊ុនមកពីទីក្រុងហុងកុង និងអាហ្វ្រិកដែលមានរយៈពេល ៣ ឆ្នាំ ដើម្បីពង្រីកការនាំចេញអង្ករពីកម្ពុជាទៅចិន អឺរ៉ុប និង អាហ្វ្រិកខាងត្បូងដែលជាទីផ្សារថ្មីរបស់កម្ពុជា។
លោក ហ៊ុន ឡាក់ ប្រធានក្រុមហ៊ុននាំចេញអង្ករ Mekong Oryaza Trade បានប្រាប់ភ្នំពេញប៉ុស្តិ៍កាលពីសប្តាហ៍មុន ក្រុមហ៊ុនរបស់លោកគ្រោងនឹងនាំចេញអង្ករសរុប ១០ ម៉ឺនតោនទៅប្រទេស ចិន អាហ្វ្រិកខាងត្បូង និងអឺរ៉ុប។ លោកថ្លែងថា៖ «យើងនឹងស្វែងរកទីផ្សារថ្មីៗបន្ថែមទៀតក្រៅពីប្រទេសចិន ដើម្បីរក្សាភាពប្រកួតប្រជែងរបស់យើង»។
របាយការណ៍ក្រសួងកសិកម្មបានឲ្យដឹងថា ការនាំចេញអង្ករកម្ពុជាទៅកាន់ទីផ្សារអន្តរជាតិក្នុងរយៈពេល ១១ ខែឆ្នាំនេះសម្រេចបាន ៥១៤ ១៤៩ តោន កើនឡើង ៣,៤ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ចិនជាទីផ្សារនាំមុខគេដែលមានចំនួន ១៩៥ ២៤២ តោន សហភាពអឺរ៉ុប ១៧៤ ៣៩៧ តោន និងតំបន់អាស៊ាន ៦៩ ២៣៩ តោន ក្រៅពីនេះនាំចេញទៅអាហ្វ្រិក និងទិសដៅមួយចំនួនទៀត៕ LA