.jpg)
កម្មករកំពុងឈរលើអង្ករដែលតម្រៀបគរលើគ្នាក្នុងរោងម៉ាស៊ីនកិនស្រូវរបស់ក្រុមហ៊ុនខ្មែរហ្វូដកន្លងមក។ រូបថត ហេង ជីវ័ន
ភ្នំពេញៈ អ្នកធ្វើការពាក់ព័ន្ធវិស័យកសិកម្ម បានសាទរសេចក្តីសម្រេចរបស់រាជរដ្ឋាភិបាលក្នុងការព្យួរប្រាក់រំដោះពន្ធលើប្រាក់ចំណូលដល់ក្រុមហ៊ុនដែលធ្វើការពាក់ព័ន្ធនឹងផលិតផលកសិកម្មថានឹងធ្វើឲ្យការនាំចេញផលិតផលកសិកម្មកម្ពុជាកាន់តែមានភាពប្រកួតប្រជែង។
ប្រាក់រំដោះពន្ធលើប្រាក់ចំណូល គឺជាប្រាក់ពន្ធលើប្រាក់ចំណូលតាមរបបពិត ដែលសហគ្រាស និងក្រុមហ៊ុនមានកាតព្វកិច្ចបង់ប្រាក់រំដោះប្រចាំខែ សម្រាប់ពន្ធលើប្រាក់ចំណូលតាមអត្រា ១ភាគរយនៃផលរបរ (ចំណូល) គិតរួមបញ្ចូលទាំងពន្ធអាករទាំងអស់វៀរលែងតែអាករលើតម្លៃបន្ថែម ដែលសម្រេចបានក្នុងខែមុន។ ប្រាក់រំដោះពន្ធនេះនឹងត្រូវបានយកមកកាត់កងពីពន្ធលើប្រាក់ចំណូលនៅពេលធ្វើ ការទូទាត់ប្រចាំឆ្នាំ។
លោក លឹម ហេង អនុប្រធានសភាពាណិជ្ជកម្មកម្ពុជាបានពន្យល់ថា កន្លងមករាល់ការនាំចេញផលិតផលកសិកម្មទាំងអស់ រដ្ឋាភិបាលតម្រូវក្រុមហ៊ុន បង់ពន្ធរំដោះប្រចាំខែលើប្រាក់ចំណេញចំនួន ១ ភាគរយជាមុន ប៉ុន្តែពេលនេះក្រុមហ៊ុនទាំងអស់មិនតម្រូវឲ្យកាត់ពន្ធទុកមុនទៀតទេសម្រាប់រយៈពេល ៥ ឆ្នាំ។ លោកបន្តថា វិធានការនេះនឹងជួយដោះបន្ទុកក្រុមហ៊ុនមួយកម្រិត។
លោកថ្លែងថា៖ «ការព្យួរទុកការបង់ប្រាក់រំដោះពន្ធលើប្រាក់ចំណូលនេះនឹងជួយធ្វើឲ្យសហគ្រាសដែលមិនទទួលបានប្រាក់ចំណេញ រួចផុតពីការបង់ប្រាក់នៅដើមគ្រាចំនួន ១ ភាគរយ តែសម្រាប់ក្រុមហ៊ុនដែលទទួលបានប្រាក់ចំណេញគឺបង់ពន្ធធម្មតា»។
បើតាមលោក លឹម ហេង ច្បាប់កាត់ទុកប្រាក់រំដោះពន្ធលើប្រាក់ចំណូលនេះ គឺដើម្បីបង្ការកុំឲ្យក្រុមហ៊ុន ដែលគ្មានមូលដ្ឋានច្បាស់លាស់រត់គេចពីការបង់ពន្ធលើប្រាក់ចំណូលនៅពេលទទួលបានប្រាក់ចំណេញ។
លោកថ្លែងថា៖ «សេចក្តីប្រកាសថ្មីនេះមានន័យថា នៅចុងឆ្នាំក្រុមហ៊ុននីមួយៗត្រូវទៅធ្វើការទូទាត់ [ពន្ធ]។ បើចំណេញ ក្រុមហ៊ុនត្រូវបង់ពន្ធ ២០ ភាគរយលើប្រាក់ចំណេញ ចំណែកក្រុមហ៊ុនដែលខាតនឹងរួចខ្លួន»។
លោកលើកឧទាហរណ៍ថា ជាក់ស្តែងការវិនិយោគលើការនាំចេញកៅស៊ូក្នុងរយៈពេលប៉ុន្មានឆ្នាំចុងក្រោយនេះ គឺខាតរហូត តែបែរជាក្រុមហ៊ុនត្រូវបង់ប្រាក់រំដោះពន្ធលើប្រាក់ចំណូល ១ ភាគរយទៅវិញ។
ទោះបីយ៉ាងនេះក្តី លោកបញ្ជាក់ថា៖ «វាគ្រាន់តែជាការជួយសម្រួលតិចតួចប៉ុណ្ណោះ ព្រោះបើយើងរកស៊ីចំណេញ គឺនៅតែត្រូវបង់ពន្ធលើប្រាក់ចំណេញ ២០ ភាគរយដដែល»។
សេចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុ ដែលចុះថ្ងៃទី ២៩ ខែមករា ឆ្នាំ ២០១៩ បានឲ្យដឹងថា ការព្យួរទុកការបង់ប្រាក់រំដោះពន្ធលើប្រាក់ចំណូលនេះនឹងផ្តល់ជូនដល់សហគ្រាស ដែលប្រកបអាជីវកម្មផលិត និងផ្គត់ផ្គង់ក្នុងស្រុក ឬនាំចេញផលិតផលកសិកម្មមួយចំនួន រួមមានស្រូវ អង្ករ ពោត សណ្តែក ម្រេច គ្រាប់ស្វាយចន្ទី ដំឡូងមី និងកៅស៊ូ ក្នុងបំណងជំរុញ និងគាំទ្រដល់ផលិតកម្ម និងការនាំចេញផលិតផលកសិកម្ម។
សេចក្តីប្រកាសនេះបានឲ្យដឹងថា សហគ្រាសដាំដុះផលិត និងផ្គត់ផ្គង់ក្នុងស្រុក ឬនាំចេញផលិតផលកសិកម្ម ទាំងនេះនឹងទទួលបានការ អនុគ្រោះនេះរយៈពេល ៥ ឆ្នាំគិតចាប់ពីខែមករា ឆ្នាំ ២០១៩»។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា បាននិយាយថា សេចក្តីប្រកាសថ្មីនេះគឺរឿងល្អព្រោះវានឹងជួយធ្វើឲ្យការចំណាយក្នុងខ្សែចង្វាក់ផលិតកម្មនៅកម្ពុជាកាន់តែមានតម្លៃទាប និងសមត្ថភាពប្រកួតប្រជែងកាន់តែខ្ពស់។
លោកបានបញ្ជាក់ថា៖ «វាជាការរួមចំណែកមួយក្នុងការលើកទឹកចិត្តដល់អ្នកវិនិយោគក្នុងវិស័យកសិកម្មបន្ថែមពីលើអ្វី ដែលរដ្ឋាភិបាលទើបប្រកាសកាលពីពេលថ្មីៗនេះ ក្នុងន័យជួយធ្វើឲ្យតម្លៃផលិតកាន់តែទាប»៕
