ក្រុងស៊ាងហៃៈ វិនិយោគិនបរទេសបានបង្កើនការវិនិយោគរបស់ពួកគេនៅទីក្រុងស៊ាងហៃ ដោយបន្តផ្ដល់ទំនុកចិត្តលើសក្ដានុពលទីផ្សារ និងការបើកចំហបន្ថែមទៀតរបស់ប្រទេសចិនក្នុងគ្រាមានភាពមិនច្បាស់លាស់ពិភពលោក។
ទីក្រុងស៊ាងហៃដែលជាមជ្ឈមណ្ឌលហិរញ្ញវត្ថុ និងពាណិជ្ជកម្មរបស់ចិនបានរាយការណ៍ពីការប្រើប្រាស់ពិតនៃការវិនិយោគបរទេសចំនួន ១១,៤៥ ពាន់លានដុល្លារ ក្នុងអំឡុងពីខែមករាដល់ខែ កក្កដា ឆ្នាំ ២០១៩ កើនឡើង ១៣,៨ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមគណៈកម្មាធិការពាណិជ្ជកម្មក្រុងស៊ាងហៃ (SMCC)។
ក្នុងអំឡុងពេលនេះគម្រោងដែលផ្ដល់មូលនិធិដោយបរទេសចំនួន ៤ ១០៥ ត្រូវបានបង្កើតឡើងកើន ៥៨,៣ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៨។
ក្រុមហ៊ុនគីមី Covestro ដែលជាក្រុមហ៊ុនឈានមុខគេលើពិភពលោក ដែលមានវត្តមានក្នុងប្រទេសចិនអស់រយៈពេលជិត ២០ ឆ្នាំមកហើយនោះមានផែនការដំឡើងឋានៈការិយាល័យកណ្ដាលនៅប្រទេសចិនរបស់ខ្លួននៅទីក្រុងស៊ាងហៃទៅជាការិយាល័យកណ្ដាលអាស៊ីប៉ាស៊ីហ្វិក។
លោកស្រី Holly Lei ប្រធានក្រុមហ៊ុន Covestro China ឲ្យដឹងថា បន្ទាប់ពីដំឡើងឋានៈការិយាល័យនេះក្រុមហ៊ុនអាចសម្របសម្រួលធនធានពិភពលោកកាន់តែប្រសើរ ដើម្បីលូតលាស់រួមគ្នាជាមួយប្រទេស ចិន។
លោកស្រី Lei បានឲ្យដឹងថាចិនគឺជាទីផ្សារតែមួយគត់ធំជាងគេរបស់ក្រុមហ៊ុន Covestro ហើយទីក្រុងស៊ាងហៃជាទីតាំងរបស់រោងចក្រធំជាងគេរបស់ក្រុមហ៊ុន និងជាមជ្ឈមណ្ឌលនវានុវត្តន៍អាស៊ីប៉ាស៊ីហ្វិក។
ការពង្រីកមហិច្ឆតាអាជីកម្មក្នុងប្រទេសដែលមានសេដ្ឋកិច្ចឈានមុខគេទី ២ របស់ពិភពលោកនេះមិនមែនមានតែក្រុមហ៊ុន Covestro ទេ។
ក្រុមហ៊ុនផលិតរថយន្ត PSA Peugeot Citroen របស់ប្រទេសបារាំងគ្រោងបង្កើតមជ្ឈមណ្ឌលលទ្ធកម្មប្រចាំតំបន់មួយនៅទីក្រុងស៊ាងហៃ។ ក្រុមហ៊ុនគីមី BASF ដ៏ធំរបស់អាល្លឺម៉ង់បានបង្កើនការវិនិយោគដើម្បីដំឡើងមជ្ឈមណ្ឌលនវានុវត្តន៍របស់ខ្លួននៅទីក្រុងស៊ាងហៃ បន្ទាប់ពីបានវិនិយោគលើរោងចក្រផលិតកម្ម ១០ ពាន់លានដុល្លារនៅទីក្រុង Zhanjiang។ ទីក្រុងនេះគឺជាទីតាំងរោងចក្រធំជាងគេរបស់ក្រុមហ៊ុន Tesla ដែលកំពុងសាងសង់ជាមួយការវិនិយោគជាង ៥០ ពាន់លានយន់ (៧,១ ពាន់លានដុល្លារអាមេរិក)។
លោក Hua Yuan ប្រធានគណៈកម្មការពាណិជ្ជកម្មក្រុងស៊ាងហៃបានឲ្យដឹងថា ការវិនិយោគមកពីសហភាពអឺរ៉ុប សិង្ហបុរី ជប៉ុន និងបណ្ដាប្រទេសស្ថិតនៅតាមគំនិតផ្តួចផ្តើមខ្សែក្រវាត់ និងផ្លូវទាំងអស់បានកើនឡើងក្នុងអត្រា ២ ខ្ទង់នៅឆមាសទី ១ ឆ្នាំនេះ ហើយទន្ទឹមនឹងនេះរចនាសម្ព័ន្ធវិនិយោគត្រូវបានធ្វើឲ្យប្រសើរឡើងបន្ថែមទៀត។
លោក Hua បន្តថា ឧស្សាហកម្មសេវាបច្ចេកវិទ្យាខ្ពស់បានរាយការណ៍ពីការប្រើប្រាស់ពិតនៃការវិនិយោគបរទេសចំនួន ១,៧ ពាន់លានដុល្លារក្នុងពេល ៦ ខែដំបូងក្នុងឆ្នាំនេះដែលមានកំណើនប្រចាំឆ្នាំ ២៩,៦ ភាគរយ។
វិធានការបើកចំហជាបន្តបន្ទាប់នៅក្នុងវិស័យ និងឧស្សាហកម្មជាច្រើន និងការកែលម្អបរិយាកាសពាណិជ្ជកម្មបានបង្កើនចំណាប់អារម្មណ៍ការវិនិយោគបរទេសក្នុងប្រទេសចិន។
កាលពីខែមិថុនាចិនបានបង្ហាញបញ្ជីអវិជ្ជមានដែលកែតម្រូវឡើងវិញសម្រាប់លទ្ធភាពចូលទៅកាន់ទីផ្សារការវិនិយោគបរទេស ដោយអនុញ្ញាតឲ្យក្រុមវិនិយោគិនបរទេស គ្រប់គ្រងភាគហ៊ុនភាគច្រើន ឬក្រុមហ៊ុនទាំងស្រុងក្នុងវិស័យកាន់តែច្រើន។
នៅដើមខែនេះចិនបានពង្រីកតំបន់ពាណិជ្ជកម្មសេរីក្រុងស៊ាងហៃ (FT-Z) ដើម្បីសាងសង់តំបន់ Lingang ថ្មីទៅជាតំបន់មុខងារសេដ្ឋកិច្ចពិសេសដែលមានឥទ្ធិពល និងសមត្ថភាពប្រកួតប្រជែងលំដាប់ពិភពលោក។
ទីក្រុងស៊ាងហៃក៏បានដាក់បង្ហាញគោលនយោបាយជាបន្តបន្ទាប់ផងដែរ ដើម្បីបើកចំហឧស្សាហកម្មសេវាបន្ថែមទៀតដល់ក្រុមវិនិយោគិនបរទេស៕ People''s Daily/LA