.jpg)
ក្រុមហ៊ុនអាកាសចរណ៍របស់អាល្លឺម៉ង់ Condor ស្វែងរកកម្ចីដើម្បីរស់បន្ត។ សហការី
ក្រុងហ្វ្រេងហ្វឺតៈ ក្រុមហ៊ុនអាកាសចរណ៍របស់អាល្លឺម៉ង់ Condor ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនទេសចរណ៍ Thomas Cook បានឲ្យដឹងម្សិលមិញថា ក្រុមហ៊ុនកំពុងស្នើសុំជំនួយហិរញ្ញវត្ថុពីទីក្រុងប៊ែរឡាំង ដើម្បីជួយរក្សាក្រុមហ៊ុនឲ្យរក្សាដំណើរការទៅមុខ ទោះបីជាក្រុមហ៊ុនមេរបស់ខ្លួនបានប្រកាសក្ស័យធនក្តី។
ដោយបញ្ជាក់ថា ក្រុមហ៊ុនទទួលបាន «ប្រាក់ចំណេញរយៈពេលជាច្រើនឆ្នាំ» ក្រុមហ៊ុន Condor បានបន្ថែមថា៖ «ដើម្បីបង្កាបញ្ហាសាច់ប្រាក់នៅក្នុងក្រុមហ៊ុន ក្រុមហ៊ុនបានដាក់ពាក្យសុំកម្ចីរយៈពេលខ្លីដែលធានាដោយរដ្ឋ» ដែលកម្ចីនេះកំពុងត្រូវបានពិនិត្យមើលក្នុងទីក្រុងប៊ែរឡាំង។
លោក Ralf Teckentrup នាយកគ្រប់គ្រងក្រុមហ៊ុន Condor បានថ្លែងថា៖ «យើងកំពុងបន្តការផ្ដោតការយកចិត្តទុកដាក់លើអ្វីដែលយើងធ្វើបានល្អបំផុត គឺការដឹកជញ្ជូនភ្ញៀវរបស់យើងដោយសុវត្ថិភាព និងទៀងទាត់ដើម្បីថ្ងៃឈប់សម្រាករបស់ពួកគេ»។
សាខារបស់ក្រុមហ៊ុន Thomas Cook នៅប្រទេសអាល្លឺម៉ង់បានប្រាប់ទីភ្នាក់ងារព័ត៌មាន DPA ថា ភ្ញៀវទេសចរជនជាតិអាល្លឺម៉ង់ប្រហែល ១៤០ ០០០ នាក់ បច្ចុប្បន្នកំពុងធ្វើដំណើរកម្សាន្តដោយប្រើប្រាស់សេវារបស់ក្រុមហ៊ុនទេសចរណ៍មួយនេះ និងក្រុមហ៊ុនបុត្រសម្ព័ន្ធរបស់ខ្លួន។
ក្រុមហ៊ុន Thomas Cook បានប្រកាសក្ស័យធនកាលពីថ្ងៃចន្ទ បន្ទាប់ពីបរាជ័យក្នុងការទទួលបានកិច្ចព្រមព្រៀងសង្គ្រោះចុងក្រោយដើម្បីស្វែងរកទឹកប្រាក់ ២០០ លានផោន (២៥០ លានដុល្លារ ២២៧ លានអឺរ៉ូ) ពីក្រុមវិនិយោគិនឯកជន ដើម្បីបញ្ចៀសការក្ស័យធន។
ភ្ញៀវទេសចរប្រហែល ៦០០ ០០០ នាក់ បានជាប់គាំងនៅទូទាំងពិភពលោក ហើយអង់គ្លេសបានជួលយន្តហោះជាច្រើនគ្រឿងដើម្បីដឹកជញ្ជូនភ្ញៀវទេសចរដែលជាពលរដ្ឋខ្លួនមកផ្ទះវិញ៕ LA
