ភ្នំពេញ: ក្រុមហ៊ុន Muba-dala Petroleum ដែលជាក្រុមហ៊ុនប្រេង និងឧស្ម័នដ៏ធំមួយរបស់ប្រទេស អេមីរ៉ាតអារ៉ាប់រួម បានមកស្វែងរកឱកាសវិនិយោគលើវិស័យប្រេងនៅកម្ពុជា។ នេះបើតាមមន្ត្រីជាន់ខ្ពស់ក្រសួងរ៉ែ និងថាមពល។
លោក ជៀប សួរ អ្នកនាំពាក្យ និងជាអគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលបានប្រាប់ភ្នំពេញ-ប៉ុស្តិ៍កាលពីថ្ងៃព្រហស្បតិ៍ថា ការបង្ហាញចំណាប់អារម្មណ៍នេះកើតមានឡើងបន្ទាប់ពីលោក Mazin Al Lamki នាយកប្រតិបត្តិក្រុមហ៊ុន Mubadala Petroleum បានជួបជាមួយនឹងលោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពលកាលពីថ្ងៃពុធ។
លោកថ្លែងថា៖ «ពួកគាត់បានចាប់អារម្មណ៍ឱកាសវិនិយោគនៅប្រទេសយើង រួមមានការស្វែងរុករក ផលិតកម្ម រួមទាំងការបង្កើតរោងចក្រចម្រាញ់ក្នុងឧស្សាហកម្មប្រេងនៅស្រុកយើង»។
លោកបន្តថា ដោយមើលឃើញពីសមត្ថភាព និងបទពិសោធគ្រប់គ្រាន់របស់ក្រុមហ៊ុន ក្រសួងបានជំរុញឲ្យក្រុមហ៊ុនធ្វើការវិនិយោគលើវិស័យប្រេងនៅក្នុងប្លុកមួយចំនួននៅដែនសមុទ្រ និងគោករបស់កម្ពុជា។
លោកបន្ថែមថា៖ «យើងបានជម្រាបជូនគាត់ពីឱកាសការវិនិយោគនៅស្រុកយើង។ យើងនៅសល់ ៤ ប្លុកក្នុងដែនសមុទ្រកម្ពុជា និងដែនគោកយើងមាន ១៨ ប្លុកទៀតនៅទំនេរ ដើម្បីធ្វើការសិក្សារុករកប្រេងកាត យើងនឹងបង្កើតក្រុមការងារមួយសម្រាប់ទំនាក់ទំនងបន្តពិភាក្សាឱកាសវិនិយោគ ដើម្បីឈានទៅរកការវិនិយោគនៅពេលអនាគត»។
បើតាមលោក ជៀប សួរ កម្ពុជាបានបែងចែកតំបន់សម្រាប់រុករករ៉ែប្រេងកាតនៅដែនសមុទ្រចំនួន ៦ ប្លុក និងដែនគោក ១៩ ប្លុក។ បច្ចុប្បន្នក្រុមហ៊ុនប្រេង KrisEnergy របស់សិង្ហបុរីកំពុងធ្វើការអភិវឌ្ឍនៅអណ្តូងប្រេងអប្សរាប្លុក A ក្នុងដែនសមុទ្រកម្ពុជា។
លោកអះអាងថាតំបន់ប្រេងប្លុក D ក្រសួងគ្រោងនឹងចុះហត្ថលេខាលើកិច្ចព្រមព្រៀងប្រេងកាតជាមួយក្រុមហ៊ុន Cambodian Resources Energy Development Co., ហើយក្រសួងកំពុងធ្វើការចរចាស្តីពីកិច្ចព្រមព្រៀងប្រេងកាតជាមួយក្រុមហ៊ុនរបស់កាណាដា EnerCam Co ដើម្បីសិក្សា និងរុករកក្នុងប្លុក VIII។
លោកថ្លែងថា៖ «នៅដែនសមុទ្រយើងមានប្លុក A កំពុងអភិវឌ្ឍន៍ឈានទៅធ្វើផលិតកម្ម ហើយមានប្លុក D មួយទៀត យើងគ្រោងនឹងចុះហត្ថលេខាកិច្ចព្រមព្រៀងប្រេងកាត ដើម្បីឲ្យគាត់រុករក ហើយ ៤ ប្លុកទៀតនៅទំនេរសម្រាប់អ្នកវិនិយោគថ្មីៗដូចជាក្រុមហ៊ុន Muba-dala Petroleum»។
លោក Mazin Al Lamki នាយកប្រតិបត្តិក្រុមហ៊ុន Mubadala Petroleum បានឲ្យដឹងថា ដោយមើលឃើញពីតម្រូវការប្រើប្រាស់ប្រេងឥន្ធនៈ និងសក្តានុពលធនធានរ៉ែគួរឲ្យកត់សម្គាល់ ក្រុមហ៊ុនបានចាប់អារម្មណ៍ធ្វើការវិនិយោគវិស័យនេះនៅកម្ពុជា។
លោក Mazin ត្រូវបានដកស្រង់សម្តីដោយភ្នាក់ងារសារព័ត៌មាន AKP ខណៈលោកថ្លែងថា៖ «យើងនឹងចុះមកសិក្សាឲ្យបានឆាប់តាមលទ្ធភាពដែលអាចធ្វើបាន ព្រោះការវិនិយោគលើវិស័យប្រេងនៅកម្ពុជាកំពុងត្រូវការជាចម្បង»។
ក្រុមហ៊ុន Mubadala Petroleum គឺជាក្រុមហ៊ុនប្រេង និងឧស្ម័នដែលគ្រប់គ្រងដោយរដ្ឋាភិបាលរដ្ឋ (Emirate) អាប៊ុយដាប៊ី និងត្រូវបានបង្កើតឡើងនៅឆ្នាំ ២០១២។ បច្ចុប្បន្នក្រុមហ៊ុននេះកំពុងមានប្រតិបត្តិការនៅប្រទេសចំនួន ១០ រួមទាំងនៅមជ្ឈិមបូព៌ា អាហ្វ្រិកខាងជើង និងអាស៊ីអាគេ្នយ៍។
លោកនាយករដ្ឋមន្ត្រី ហ៊ុន សែន កាលពីខែវិច្ឆិកាបានប្រកាសជាថ្មីថា កម្ពុជានឹងទាញបានតំណក់ប្រេងលើកដំបូងពីគម្រោងអភិវឌ្ឍអណ្តូងប្រេងអប្សរានៅត្រឹមពាក់កណ្តាលឆ្នាំ ២០២០។
ក្រុមហ៊ុនប្រេង KrisEnergy កាលពីថ្ងៃចន្ទបានចាប់ផ្តើមសាងសង់ផ្លាតហ្វមក្បាលអណ្តូងផលិតកម្មខ្នាតតូចនៅតំបន់ប្រេងអប្សរាក្នុងប្លុក A ក្នុងដែនសមុទ្រកម្ពុជាដែលបង្ហាញពីជំហានវិជ្ជមានឆ្ពោះទៅរកទិសដៅរបស់ក្រុមហ៊ុន ដើម្បីទាញយកប្រេងដំបូងនៅពាក់កណ្តាលឆ្នាំ ២០២០។
ក្រុមហ៊ុន KrisEnergy បានឲ្យដឹងថា ប្រេងតំបន់អប្សរាគ្រោងនឹងផលិតនៅឆមាសទី ១ ឆ្នាំ ២០២០ ហើយតំបន់នេះត្រូវបានរំពឹងថា នឹងឈានដល់អត្រាផលិតកម្មខ្ពស់បំផុត ៧ ៥០០ បារ៉ែលក្នុង ១ ថ្ងៃ៕ LA