.jpg)
អ្នកប្រើប្រាស់ទូរស័ព្ទទំនើបតាមដានកម្មវិធីផ្សេងៗដោយភ្ជាប់អ៊ីនធឺណិត។ ហុង មិនា
ភ្នំពេញៈ ក្រុមហ៊ុន PLDT Global ជាប្រតិបត្តិករក្នុងវិស័យបច្ចេកវិទ្យារបស់ប្រទេសហ្វីលីពីនបានប្រកាសភាពជាដៃគូថ្មីជាមួយក្រុមហ៊ុន SINET ដែលបានបង្កើតឡើងកាលឆ្នាំ ២០០៩ និងមានមូលដ្ឋាននៅកម្ពុជាដើម្បីពង្រីកទីតាំងឈរជើងក្នុងតំបន់ ដោយផ្ដល់ដំណោះស្រាយបច្ចេកវិទ្យាដល់ក្រុមហ៊ុននេះជួយដល់អតិថិជនកាន់តែរលូន។ នេះបើយោងតាមក្រុមហ៊ុនបានឱ្យដឹងកាលពីថ្ងៃទី ១៩ ខែមីនា។
SINET ដែលជាក្រុមហ៊ុនផ្ដល់សេវាបណ្ដាញអ៊ីនធឺណិត និងទូរគមនាគមន៍នៅកម្ពុជាបានក្លាយជាក្រុមហ៊ុនដៃគូថ្មីអន្តរជាតិមួយរបស់ក្រុមហ៊ុន PLDT Global Corporation ដែលមានទីតាំងឈរជើងនៅ ១០០ ប្រទេសនៅទូទាំងតំបន់អាស៊ី អឺរ៉ុប និងអាមេរិក។
ការសិក្សាកាលពីឆ្នាំ ២០២០ ដែលបានចេញផ្សាយដោយប្រព័ន្ធព័ត៌មាន Media Partners Asia បានឱ្យដឹងថា ការចាក់ផ្សាយវីដេអូអនឡាញជាច្រើននាទីនៅក្នុងតំបន់បានកើនឡើង ៦០ ភាគរយ។ ការណ៍នេះបញ្ជាក់ពីតម្រូវការកាន់តែច្រើនសម្រាប់ក្រុមហ៊ុនផ្ដល់សេវាបណ្ដាញ ដើម្បីបង្កើនការប្រកួតប្រជែងកាន់តែខ្ពស់ក្នុងការរក្សាការតភ្ជាប់ប្រជាជន និងអាជីវកម្ម និងដឹកនាំពិភពលោកឆ្ពោះទៅកាន់ភាពកាន់តែសាមញ្ញ។
លោក Albert V. Villa-Real ប្រធានផ្នែកពាណិជ្ជកម្មនៅក្រុមហ៊ុន PLDT Global បានថ្លែងថា៖ «សម្រាប់ក្រុមហ៊ុន PLDT Global បានប្ដេជ្ញាចិត្តថា នឹងវិនិយោគលើដំណោះស្រាយនវានុវត្តន៍ ដើម្បីសម្រេចបានបេសកកម្មមួយនេះ។ យើងមានសេចក្ដីរីករាយបំផុតក្នុងការធ្វើដៃគូជាមួយក្រុមហ៊ុន SINET ដើម្បីពង្រឹងទីតាំងឈរជើងរបស់យើងនៅអាស៊ី ខណៈដែលវត្តមាន បណ្តាញចែកចាយមាតិកា (CDN) របស់យើងនៅក្នុងប្រទេសកម្ពុជាមានការរីកចម្រើន»។
លោកបន្ត៖ «ភាពជាដៃគូនេះនឹងធ្វើឱ្យយើងជាក្រុមហ៊ុនឈានមុខគេលើការផ្តល់នវានុវត្តន៍ និងជាក្រុមហ៊ុនផ្ដល់សេវាបច្ចេកវិទ្យាពិភពលោក ដែលបំពេញតម្រូវការមិនគ្រាន់តែចំពោះក្រុមហ៊ុនហ្វីលីពីនប៉ុណ្ណោះទេ ប៉ុន្តែថែមទាំងដល់សហគ្រាសអន្តរជាតិនានា ដែលត្រូវការសេវាកម្មបច្ចេកវិទ្យាកាន់តែទូលំទូលាយបន្ថែមទៀត»។
ក្រសួងប្រៃសណីយ៍ និងទូរគមនាគមន៍កាលពីថ្ងៃទី ២៣ ខែមីនា ឆ្នាំ ២០២១ បានអំពាវនាវឱ្យប្រតិបត្តិករទូរគមនាគមន៍នៅកម្ពុជាត្រូវពង្រឹងគុណភាពសេវាទូរស័ព្ទចល័ត និងអ៊ីនធឺណិតឆ្លើយតបនឹងចំនួនអ្នកប្រើប្រាស់ដែលកើនឡើងខ្លាំងចំពេលការរីករាលដាលជំងឺកូវីដ១៩។
ក្រសួងបានកត់សម្គាល់នៅក្នុងសេចក្ដីប្រកាសព័ត៌មានមួយថា ទំហំនៃលទ្ធភាពការប្រើប្រាស់អ៊ីនធឺណិតមានការកើនឡើងគួរឱ្យកត់សម្គាល់ ចាប់តាំងពីការផ្ទុះឡើងក្នុងសហគមន៍ ២០ កុម្ភៈដោយការផ្លាស់ប្តូរអ៊ីនធឺណិតក្នុងចំណោមគ្រឹះស្ថានរដ្ឋ និងឯកជន។
ក្រុមហ៊ុន PLDT បានកត់សម្គាល់ថា បណ្ដាញ Content Delivery Networks ធានាថា ការប្រើប្រាស់មាតិកាឌីជីថលកាន់តែលឿនជាងមុន ឬប្រព័ន្ធព័ត៌មានតាមរយៈកុំព្យូទ័រមេរបស់គេហទំព័រដែលនាំយកមាតិកាជាច្រើនទៅកាន់តែជិតអ្នកប្រើប្រាស់ជាក់ស្ដែង។
គំនិតផ្តួចផ្ដើមនេះគឺជាផ្នែកមួយនៃយុទ្ធនាការដ៏ទូលំទូលាយរបស់ក្រុមហ៊ុន PLDT ដែលជាទូរគមនាគមន៍រួមបញ្ចូលគ្នាឈានមុខគេរបស់ប្រទេសហ្វីលីពីន ដើម្បីអាចឱ្យក្រុមហ៊ុននានាផ្លាស់ប្តូរ និងប្រតិបត្តិការឌីជីថល ទោះបីជាមានបញ្ហាប្រឈមដែលបង្កឡើងដោយវិបត្តិសុខភាពពិភពលោកក៏ដោយ។
លោក គង់ ដៀប ប្រធានផ្នែកបច្ចេកទេសនៅក្រុមហ៊ុន SINET បានមើលឃើញពីការប្រែប្រួលចុងក្រោយនេះ។
លោកថ្លែងថា៖ «ក្នុងរយៈពេល ២-៣ សប្ដាហ៍ប៉ុណ្ណោះ យើងបានកត់សម្គាល់ឃើញមានការរីកចម្រើនគួរឱ្យកត់សម្គាល់ក្នុងការចរាចរដោយសារតែការចរាចររបស់ PLDT CDN ដែលបន្តកើនឡើង។ សង្ឃឹមថា យើងនឹងអាចសហការកាន់តែច្រើន និងធ្វើដំណើរជាមួយគ្នាលើផ្លូវមួយនេះ»។
ទិន្នន័យបានពីនិយតករទូរគមនាគមន៍កម្ពុជា (TRC) បង្ហាញថាចំនួនអ្នកប្រើអ៊ីនធឺណិតចល័តនៅកម្ពុជាមានចំនួន ១៤ ៨៦៣ ៤៣៥ គិតត្រឹមខែឧសភាឆ្នាំ ២០២០ ចំណែកអ្នកប្រើអ៊ីនធឺណិតមានខ្សែនៅក្នុងក្រុមហ៊ុនផ្ដល់សេវាទាំង ៣៧ កើនឡើង ៣៣,០៧ ភាគរយ ដល់ ២៤៩ ១៣២៕ LA
