ភ្នំពេញ: អ្នកក្នុងវិស័យដឹកជញ្ជូនអ្នកដំណើររថយន្តក្រុងបានបង្ហាញការព្រួយបារម្ភពីការធ្លាក់ចុះភ្ញៀវដែលប្រើប្រាស់សេវាកម្មរបស់ខ្លួនដោយសារសេវារថយន្តក្រុងដឹកអ្នកដំណើរមួយចំនួនមិនបានចុះបញ្ជីធ្វើអាជីវកម្មត្រឹមត្រូវ។
លោក ឆឹម ចំណាន ប្រធានសមាគមដឹកជញ្ជូនអ្នកដំណើរផ្លូវគោកកម្ពុជា (Camba) បានឲ្យដឹងថាក្នុងរយៈពេល ២ ឆ្នាំចុងក្រោយនេះចំនួនភ្ញៀវធ្វើដំណើរតាមក្រុមហ៊ុនដឹកជញ្ជូនផ្លូវគោកដែលចុះបញ្ជីត្រឹមត្រូវបានធ្លាក់ចុះចន្លោះពី ៣ ទៅ ៤ ភាគរយពីមួយឆ្នាំទៅមួយឆ្នាំ។
លោកបន្ថែមថា ក្រុមហ៊ុនដឹកជញ្ជូនអ្នកដំណើរ (រថយន្តក្រុង) ដែលបានចុះបញ្ជីត្រឹមត្រូវសព្វថ្ងៃនេះមានបញ្ហាប្រឈមក្នុងការប្រកួតប្រជែងទីផ្សារជាមួយអ្នកប្រកបអាជីវកម្មដឹកជញ្ជូនរថយន្តក្រុងជាលក្ខណៈគ្រួសារដែលមានរថយន្តប្រភេទ ៤៥ កៅអី។ លោកសង្កេតឃើញថា រថយន្តទាំងនោះមានប្រហែល ១០០ គ្រឿង នៅក្នុងទីផ្សារដោយមិនរាប់បញ្ចូលប្រភេទរថយន្ត ១៥ កៅអី។
លោកថ្លែងថា៖ «បញ្ហាប្រឈមរបស់យើងគឺថា [ពីមុនម្ចាស់ម្នាក់] មានរថយន្តក្រុងពី ១-២ គ្រឿង ជាលក្ខណៈគ្រួសារ តែឥឡូវអ្នកខ្លះមានរថយន្តក្រុងរហូតដល់ ៥ ទៅ ១០ គ្រឿង។ ពួកគេគ្មានចំណតត្រឹមត្រូវ ចតតាមចិញ្ចើមផ្លូវចាប់ម៉ូយ គ្មានឈ្មោះក្រុមហ៊ុន គ្មានបុគ្គលិក វាច្រើនណាស់។ យើងអាចប្រឈមមុខនឹងបិទទ្វារទៅមុខទៀត»។
លោកបន្ថែមថាអ្នកប្រកបអាជីវកម្មដឹកជញ្ជូនរថយន្តក្រុងមិនចុះបញ្ជីអាជីវកម្មត្រឹមត្រូវទាំងនោះបានលក់សំបុត្រទាបជាងតម្លៃទីផ្សារថែមទៀតផង ដែលធ្វើឲ្យក្រុមហ៊ុនដឹកជញ្ជូនអ្នកដំណើរចុះបញ្ជីត្រឹមត្រូវមិនអាចប្រកួតប្រជែងបាន។
លោកថ្លែងថា៖ «បញ្ហាតម្លៃសំបុត្រ ឧទាហរណ៍ថាក្រុមហ៊ុនលក់សំបុត្រពីភ្នំពេញទៅសៀមរាប ២៥ ០០០ រៀល ក្នុងម្នាក់ តែពួកគេលក់ត្រឹម ១០ ០០០ ឬ ១៥ ០០០ រៀលប៉ុណ្ណោះ។ ដូច្នេះការប្រកួតប្រជែងយើងមានបញ្ហា»។
លោក សុខ ចាន់មុនី ម្ចាស់ក្រុមហ៊ុនដឹកអ្នកដំណើរ Paramount Angkor Express (PAE) ប្រាប់ភ្នំពេញប៉ុស្តិ៍ ថា ក្រុមហ៊ុនលោកក៏កំពុងប្រឈមនឹងការធ្លាក់ចុះចំនួនភ្ញៀវប្រើប្រាស់សេវាកម្មរបស់ក្រុមហ៊ុនលោកដែរ។
លោកថ្លែងថា៖ «[សេវាលក្ខណៈគ្រួសារ] គេជាតៃកុងខ្លួនគេ ឡានខ្លួនគេ គេមិនមែនជាក្រុមហ៊ុនអ្វីទេ ដូច្នេះគេអត់មានអស់ពន្ធអ្វីឡើយ គេទិញឡានក្រុងមួយគ្រឿង បើកដាក់ម៉ូយតាមផ្លូវ តាមសណ្ឋាគារ គេយកថ្លៃពីភ្ញៀវសណ្ឋាគារ ៨ ០០០ រៀល»។
លោកបន្តថា៖ «បើឡានយើងចេញដំណើរមានអ្នកជិះពេញ យើងអាចសល់ប្រហែលពី ២០ ទៅ ៣០ ដុល្លារ ក្នុងមួយជើង តែបើមានភ្ញៀវតែជាង ២០ នាក់ យើងនឹងខាត មិនរួចថ្លៃប្រេងផង។ សម្រាប់ក្រុមហ៊ុនខ្ញុំក្នុងរដូវមានភ្ញៀវទាប (Low Season) ពីខែ ៦ ដល់ខែ ៩ នេះក្នុងមួយខែខាតប្រហែល ៤០ ០០០ ទៅ ៥០ ០០០ ដុល្លារ តែយើងសង្ឃឹមថានៅរដូវមានភ្ញៀវច្រើន (High season) អាចទទួលបានប្រាក់ចំណេញមកវិញ»។
លោក ចាន់មុនី បានឲ្យដឹងទៀតថា ក្រុមហ៊ុន PAE មានរថយន្តក្រុងសរុបជាង ១០០ គ្រឿង ដែលផ្តល់សេវាដឹកជញ្ជូនទៅកាន់ខេត្តសំខាន់ៗ ដូចជាពីភ្នំពេញទៅខេត្តព្រះសីហនុ កោះកុង សៀមរាប បាត់ដំបង។
លោកបន្ថែមទៀតថា ក្រុមហ៊ុន PAE បានបញ្ចេញរថយន្តក្រុងដឹកអ្នកដំណើរចេញពីភ្នំពេញទៅតាមបណ្តាខេត្តចំនួន ៦៥ គ្រឿងក្នុងមួយថ្ងៃ ដោយក្នុងមួយគ្រឿងមានភ្ញៀវជិះចន្លោះពី ២២ នាក់ ទៅ ២៨ នាក់។
លោកបានថ្លែងថា៖ «តម្លៃ [សំបុត្ររថយន្ត] ទាបមិនអាចទូទាត់នឹងការចំណាយទៅលើបុគ្គលិក ប្រេងសាំង ខណៈអ្នកមានឡាន ១-២ គ្រឿងបានចេញមកដឹកភ្ញៀវមកហៅម៉ូយតាមផ្លូវដូចតាក់ស៊ី ហើយយកតម្លៃទាបជាងក្រុមហ៊ុនធ្វើឲ្យយើងបាត់បង់ភ្ញៀវ»។
បញ្ហានេះក៏កើតមានផងដែរចំពោះក្រុមហ៊ុន រិទ្ធិមុនី ដឹកអ្នកដំណើរ និងក្រុមហ៊ុន វីរៈ ប៊ុនថាំ អេចប្រេស ដឹកអ្នកដំណើរ និងទេសចរណ៍។
លោក មាស ស៊ីម៉ូធី ជំនួយការទូទៅរបស់ក្រុមហ៊ុន រិទ្ធិមុនី បានឲ្យដឹងថា បញ្ហារថយន្តក្រុងមិនបានចុះបញ្ជីអាជីវកម្មត្រឹមត្រូវក៏បានធ្វើឲ្យអតិថិជនរបស់ក្រុមហ៊ុនលោកធ្លាក់ចុះដែរ ក្នុងរយៈពេល ២ ឆ្នាំចុងក្រោយនេះ។ លោកបន្ថែមថាក្នុងមួយថ្ងៃក្រុមហ៊ុន រិទិ្ធមុនី ចេញឡានទៅតាមបណ្តាខេត្តចំនួន ៦០ គ្រឿង ក្នុងចំណោមរថយន្តក្រុងសរុប ១៥០ គ្រឿង។
លោកបានថ្លែងថា៖ «កាលពីមុនជាមធ្យមក្នុងមួយថ្ងៃមានភ្ញៀវជិះសរុប ១ ០០០ នាក់ ប៉ុន្តែឥឡូវ ៥០០ នាក់ចង់យ៉ាប់ ចំណូលយើងបានត្រឹមទប់ទល់ មានខែខ្លះចំណេញ ខែខ្លះក៏ខាត»។
ក្រុមហ៊ុន វីរៈ ប៊ុនថាំ ដែលមានរថយន្តក្រុងចំនួន ៥៦ គ្រឿង ក៏មើលឃើញពីបញ្ហាទីផ្សារតូចចង្អៀតផងដែរ ស្របពេលតម្លៃប្រេងមានការឡើងថ្លៃជាលំដាប់។
លោក ឡុង ណាផល ប្រធានប្រតិបត្តិរដ្ឋបាលរបស់ក្រុមហ៊ុន វីរៈ ប៊ុនថាំ បានថ្លែងថា៖ «យើងមើលឃើញទីផ្សារក្នុងវិស័យនេះបច្ចុប្បន្នមានការប្រកួតប្រជែងខ្លាំង ក្រុមហ៊ុនចុះឈ្មោះក៏មានច្រើន ហើយមិនបានចុះឈ្មោះក៏ច្រើន ដូច្នេះយើងមើលទៅទីផ្សារចង្អៀត។ [ចំណូល] បានត្រឹមតែទប់ទល់ មិនចំណេញទេ»។
លោក ចំណាន ប្រធានសមាគម Camba បានអំពាវនាវឲ្យក្រសួងធ្វើការរឹតបន្តឹង និងស្នើឲ្យមានការចុះបញ្ជីអាជីវកម្មឲ្យបានត្រឹមត្រូវចំពោះអ្នកប្រកបរថយន្តដឹកជញ្ជូនប្រភេទរថយន្តក្រុងដែលមិនចុះបញ្ជីអាជីវកម្មទាំងនោះ។ លោកនិយាយថា៖ «សូមអំពាវនាវដល់រដ្ឋាភិបាលឲ្យគិតគូរឡើងវិញក្នុងវិស័យដឹកជញ្ជូននៅស្រុកខ្មែរយើង ត្រូវចុះបញ្ជីពួកគាត់ឲ្យបានត្រឹមត្រូវ ដើម្បីធ្វើយ៉ាងណាឲ្យមានការប្រកួតប្រជែងស្មើភាពគ្នា»។
បច្ចុប្បន្នក្រុមហ៊ុនដឹកជញ្ជូនអ្នកដំណើរ (រថយន្តក្រុង) ដែលចុះបញ្ជីអាជីវកម្មត្រឹមត្រូវមានចំនួន ៣១ ដោយក្នុងនោះក្រុមហ៊ុនចំនួន ១២ គឺជាសមាជិករបស់សមាគម Camba។ នេះបើតាមលោក ចំណាន។
ឆ្លើយតបទៅនឹងការលើកឡើងពីក្តីបារម្ភនេះលោក វ៉ាស៊ីម សុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ថា ក្រសួងមិនទាន់អាចមានចំណាត់ការយ៉ាងណានោះទេ តែលោកបានស្នើឲ្យក្រុមហ៊ុនដឹកអ្នកដំណើរចងក្រងគ្នាស្នើសុំមកក្រសួងដើម្បីរកដំណោះស្រាយ។
លោកថ្លែងថា៖ «យើងសុំឲ្យគាត់ [មូលមតិគ្នា] ដើម្បីតវ៉ាជាផ្លូវការ។ បើគាត់តវ៉ាម្តងមួយៗ យើងក៏អត់មានពេលគ្រប់គ្រាន់ធ្វើការអង្កេតនោះទេ។ សំខាន់ពួកគាត់ត្រូវសិក្សាឲ្យបានច្បាស់ ហើយរាយការណ៍មកក្រសួង ទើបយើងអាចចុះសិក្សាបាន»៕ LA