ក្រុងពូត្រាចាវ៉ាៈ ក្រុមហ៊ុនផលិតរថយន្ត និងក្រុមហ៊ុនលក់រថយន្តក្នុងប្រទេស ម៉ាឡេស៊ី នឹងត្រូវគោរពទៅតាមគោលការណ៍ណែនាំស្តីពីការបិទស្លាករបស់កម្មវិធីវាយតម្លៃរថយន្តថ្មីរបស់អាស៊ាន (ASEAN NCAP) ដែលនឹងត្រូវចាប់ផ្តើមអនុវត្តនៅខែមីនា ឆ្នាំក្រោយ។
ស្លាកនេះដែលចេញដោយវិទ្យាស្ថានស្រាវជ្រាវសុវត្ថិភាពផ្លូវគោករបស់ម៉ាឡេស៊ី (MIROS) នឹងផ្តល់ព័ត៌មានលម្អិតរបស់រថយន្ត លក្ខណៈពិសេសផ្នែកសុវត្ថិភាព និងចំណាត់ថ្នាក់សុវត្ថិភាពរបស់រថយន្ត និងកូដ QR។
លោក Saifuddin Nasution Ismail រដ្ឋមន្រ្តីក្រសួងកិច្ចការពាណិជ្ជកម្មក្នុងស្រុក និងអ្នកប្រើប្រាស់ បានថ្លែងថា ការអនុវត្តគោលការណ៍ស្តីពីការបិទស្លាក នឹងផ្តល់អត្ថប្រយោជន៍ដល់ក្រុមហ៊ុនផលិតរថយន្ត និងអ្នកប្រើប្រាស់ដូចគ្នា ជាពិសេសក្នុងការកែលម្អលក្ខណៈពិសេសផ្នែកសុវត្ថិភាពរថយន្ត។
ASEAN NCAP ជាកម្មវិធីដាក់ពិន្ទុសុវត្ថិភាពរថយន្តដែលត្រូវបានបង្កើតរួមគ្នាដោយវិទ្យាស្ថានស្រាវជ្រាវសុវត្ថិភាពផ្លូវគោករបស់ម៉ាឡេស៊ី (MIROS) និងកម្មវិធីវាយតម្លៃរថយន្តថ្មីសកល (Global NCAP) ដែលត្រូវបានរំពឹងថានឹងបង្កើនស្តង់ដាសុវត្ថិភាពរថយន្ត លើកកម្ពស់ការយល់ដឹងរបស់អ្នកប្រើប្រាស់ ព្រមទាំងលើកទឹកចិត្តទីផ្សារឲ្យប្រើប្រាស់រថយន្តដែលមានសុវត្ថិភាពជាងមុនក្នុងតំបន់។
ASEAN NCAP ដែលនឹងចាប់ផ្តើមនៅថ្ងៃទី ១ ខែមីនា ឆ្នាំនេះ នឹងត្រូវបានអនុវត្តដោយផ្អែកលើគោលការណ៍ស្ម័គ្រចិត្ត។ ទោះយ៉ាងណាក្តី វានឹងធ្វើឲ្យក្លាយជាលក្ខណៈកាតព្វកិច្ចសម្រាប់ក្រុមហ៊ុនផលិតរថយន្តចាប់ពីថ្ងៃទី ១ ខែមីនា ឆ្នំា ២០២០។
នៅពេលគោលការណ៍នេះត្រូវបានធ្វើឲ្យក្លាយជាលក្ខណៈកាតព្វកិច្ច ក្រុមហ៊ុននានាដែលប្រើប្រាស់ស្លាកក្លែងក្លាយនឹងត្រូវទទួលខុសត្រូវតាមច្បាប់ពាណិជ្ជកម្មឆ្នាំ ២០១១។
លោកបន្តថា៖ «មុនចាប់ផ្តើមអនុវត្ត ក្រសួងនឹងរៀបចំយុទ្ធនាការលើកកម្ពស់ការយល់ដឹង ដើម្បីអប់រំសាធារណជនអំពីវិធីត្រឹមត្រូវនៃការប្រើប្រព័ន្ធស្លាក និងការដាក់ចំណាត់ថ្នាក់សុវត្ថិភាព»។
ក្រសួងនឹងចាប់ផ្តើមជំរុញក្រុមហ៊ុនរថយន្តឲ្យបង្ហាញចំណាត់ថ្នាក់សុវត្ថិភាពតាមគោលការណ៍ស្ម័គ្រចិត្ត ខណៈដែលរថយន្តរបស់ក្រុមហ៊ុនទាំងនោះនឹងត្រូវផ្តល់ចំណាត់ថ្នាក់ដោយ MIROS ដោយផ្អែកលើការធ្វើតេស្ត។
លោកថ្លែងថា៖ «ក្រុមហ៊ុនរថយន្ត និងភ្នាក់ងារលក់រថយន្តត្រូវទទួលខុសត្រូវ បើពួកគេមិនបានបង្ហាញបិទស្លាក នៅពេលគោលការណ៍ណែនាំនេះត្រូវបានអនុវត្ត។ ក្រុមហ៊ុនដែលប្រើស្លាកដែលមិនទទួលបានការអនុម័ត ក៏នឹងប្រឈមចំណាត់ការផងដែរពីបទធ្វើឲ្យអ្នកប្រើប្រាស់ភាន់ច្រឡំ»៕ ANN/PS