.jpg)
ក្រុមហ៊ុនរុករករ៉ែ ២ ទទួលការអនុញ្ញាតឱ្យបន្តនីតិវិធី ដើម្បីទទួលបានអាជ្ញាប័ណ្ណរុករករ៉ែនៅលើផ្ទៃដីសរុបជាង ២០០ គីឡូម៉ែត្រក្រឡា។ រូបថត ភ្នំពេញ ប៉ុស្តិ៍
ភ្នំពេញៈ ក្រសួងរ៉ែ និងថាមពលបានជ្រើសរើសក្រុមហ៊ុនចំនួន ២ ឱ្យបន្តអនុវត្តនីតិវិធីក្នុងការផ្ដល់អាជ្ញាប័ណ្ណរុករករ៉ែនៅលើផ្ទៃដីសរុបជាង ២០០ គីឡូម៉ែត្រក្រឡា នៅក្នុងខេត្តចំនួន ២ របស់កម្ពុជា។ នេះបើតាមលិខិតរបស់ក្រសួងរ៉ែ និងថាមពល។
យោងតាមលិខិតក្រសួងរ៉ែ និងថាមពលដែលចុះហត្ថលេខាដោយលោក ស៊ុយ សែម រដ្ឋមន្ត្រីក្រសួងរ៉ែ និងថាមពលកាលពីថ្ងៃទី ២១ ខែធ្នូ ផ្ញើទៅឱ្យក្រុមហ៊ុនទាំង ២ ឱ្យដឹងថា ក្រសួងរ៉ែ និងថាមពលសម្រេចជ្រើសរើសក្រុមហ៊ុន រ៉ឺនេសង់ មីនើរ៉ល ( ខេមបូឌៀ) លីមីធីត (Renaissance Minerals (Cambodia) Limited) ជាក្រុមហ៊ុនមានលក្ខណសម្បត្តិគ្រប់គ្រាន់ និងមានសិទ្ធិអាទិភាពដើម្បីបន្តអនុវត្តនីតិវិធីក្នុងការផ្ដល់អាជ្ញាប័ណ្ណស្វែងរុករកធនធានរ៉ែស្ថិតនៅតំបន់មេមត់ ក្នុងស្រុកមេមត់ ខេត្តត្បូងឃ្មុំ លើដីទំហំ ១០៧,១០ គីឡូម៉ែត្រក្រឡា និងក្រុមហ៊ុន អូរៀនថល វីសដឹម ខនសាល់ធីង សឺវីស (ខេមបូឌៀ) អ៊ិនវេសមិន ឯ.ក (Original Wisdom Consulting Services (Cambodia) Investment Co, Ltd.) ជាក្រុមហ៊ុនមានលក្ខណសម្បត្តិគ្រប់គ្រាន់ និងមានសិទ្ធិអាទិភាពបន្តអនុវត្តនីតិវិធីក្នុងការផ្ដល់អាជ្ញាប័ណ្ណស្វែងរុករកធនធានរ៉ែ ស្ថិតនៅតំបន់ភ្នំប៉ាង ស្រុកអូរយ៉ាដាវ ខេត្តរតនគិរី លើទំហំដី ១០០ គីឡូម៉ែត្រក្រឡា។
លិខិតខាងលើក៏បានតម្រូវឱ្យក្រុមហ៊ុនទាំង ២ ត្រូវយកលិខិតអនុញ្ញាតទៅបិទផ្សាយនៅទីស្នាក់ការរដ្ឋបាលឃុំដែលតំបន់សម្បទាននេះស្ថិតនៅព្រមទាំងតម្រូវឱ្យតំណាងក្រុមហ៊ុនមកធ្វើទំនាក់ទំនងជាមួយក្រសួងរ៉ែ និងថាមពលក្នុងរយៈពេលយ៉ាងយូរត្រឹម ១៥ ថ្ងៃ។
ជាមួយគ្នានេះក្រសួងរ៉ែ និងថាមពលក៏បានបដិសេធចំពោះក្រុមហ៊ុន Xinruichang Mining Co., Ltd និងក្រុមហ៊ុន Asian Comfort Investment Co., Ltd ដែលក្រុមហ៊ុនទាំង ២ បានស្នើសុំអាជ្ញាប័ណ្ណស្វែងរុករករ៉ែនៅតំបន់មេមត់ខាងលើផងដែរ ដោយលើកហេតុផលថា ក្រុមហ៊ុនទាំង ២ មិនមានលក្ខណសម្បត្តិគ្រប់គ្រាន់។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែបានប្រាប់ ភ្នំពេញ ប៉ុស្តិ៍ កាលពីថ្ងៃទី ២៤ ខែធ្នូ ថា លទ្ធផលការជ្រើសរើសនាពេលនេះ គឺកើតឡើងបន្ទាប់ពីក្រសួងរ៉ែបានប្រកាសឱ្យក្រុមហ៊ុនដែលមានចំណាប់អារម្មណ៍មកដាក់ពាក្យស្នើសុំការវិនិយោគក្នុងតំបន់ទាំង ២ ដោយមានបញ្ជាក់ពីជំនាញ បទពិសោធ និងបច្ចេកទេសស្រាវជ្រាវ ដើម្បីឱ្យគណៈកម្មការរបស់ក្រសួងពិនិត្យ និងវាយតម្លៃ។ លោកបន្តថា តំបន់ទាំង ២ គឺជាកន្លែងមានសក្តានុពលខ្ពស់សម្រាប់ការរុករករ៉ែលោហៈ (មាស)។
លោកថ្លែងថា៖ «មានក្រុមហ៊ុនចំនួន ៤ បានជាប់ Short List ប៉ុន្តែបន្ទាប់ពីយើងត្រួតពិនិត្យនីតិវិធីរួចមក ក្រសួងបានជ្រើសរើសក្រុមហ៊ុន ២ ឱ្យជាប់ជយលាភី ដែលអាចបន្តនីតិវិធីដើម្បីទទួលបានអាជ្ញាប័ណ្ណស្វែងរុករករ៉ែតំបន់ខាងលើ»។
ទោះយ៉ាងណាលោក មុនីរ៉ាត់ បញ្ជាក់ថា ការទទួលបានសិទ្ធិអាទិភាពពីក្រសួងនៅពេលនេះមិនមែនមានន័យថា ក្រុមហ៊ុនទាំង ២ អាចចាប់ផ្តើមធ្វើសកម្មភាពរុករករ៉ែនៅលើទីតាំងបានភ្លាមៗទេ ដោយនៅមាននីតិវិធីជាច្រើនទៀតដែលក្រុមហ៊ុនទាំង ២ ត្រូវធ្វើ ដូចជាការសិក្សាពីផលប៉ះពាល់បរិស្ថាន (EIA) និងផលប៉ះពាល់ផ្សេងៗទៀតមុននឹងក្រសួងចេញអាជ្ញាប័ណ្ណឱ្យវិនិយោគនៅទីតាំងផ្ទាល់។
លោកក៏បានកត់សម្គាល់ថា បើទោះបីក្នុងអំឡុងពេលនៃការរីករាលដាលនៃជំងឺកូវីដ១៩ ក៏ការស្នើសុំអាជ្ញាប័ណ្ណវិនិយោគលើការរុករករ៉ែនៅកម្ពុជាមិនបានធ្លាក់ចុះនោះទេដែលវានឹងរួមចំណែកក្នុងការជំរុញកំណើនសេដ្ឋកិច្ចកម្ពុជា។
បើតាមលោក មុនីរ៉ាត់ មកដល់ពេលនេះមានក្រុមហ៊ុនប្រហែល ៥០ ដែលទទួលបានអាជ្ញាប័ណ្ណរុករករ៉ែនៅកម្ពុជា។
Renaissance Minerals (Cambodia) Ltd គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources NL ដែលជាក្រុមហ៊ុនចុះបញ្ជីនៅផ្សារហ៊ុនអូស្ដ្រាលី។ បច្ចុប្បន្នក្រុមហ៊ុននេះកំពុងសាងសង់រោងចក្រកែច្នៃគម្រោងរ៉ែមាសអូរខ្វាវ នៅក្នុងខេត្តមណ្ឌលគិរីដោយរំពឹងថា នឹងអាចទាញយករ៉ែមាសបាននៅឆមាសទី ១ ឆ្នាំ ២០២១។ ចំណែក Original Wisdom Consulting Services (Cambodia) Investment Co., Ltd) គឺជាក្រុមហ៊ុនវិនិយោគរួមគ្នារវាងវិនិយោគិនចិនជាមួយកម្ពុជា។ នេះបើតាមលោក មុនីរ៉ាត់។
កាលពីឆ្នាំ ២០១៩ កម្ពុជាទទួលបានចំណូលមិនមែនសារពើពន្ធពីវិស័យរ៉ែ (ប្រាក់កម្រៃអាជ្ញាប័ណ្ឌ និងពីសួយសារធនធានរ៉ែ) ប្រមាណ ២១ លានដុល្លារ ខណៈឆ្នាំ ២០១៨ មានប្រមាណ ២០ លានដុល្លារ។ នេះបើតាមរបាយការណ៍ក្រសួងរ៉ែ និងថាមពល៕
