.jpg)
ក្រុមហ៊ុន BHP បានថ្លែងនៅក្នុងសន្និសីទខ្លីមួយថា៖ «ធ្យូងគួរតែរក្សាបាននូវទីផ្សារដ៏ធំមួយ ប៉ុន្តែនៅពេលណាមួយ យើងរំពឹងថា វានឹងកើនឡើង និងបន្ទាប់មកធ្លាក់ចុះដោយសារតែឧបសគ្គធំៗ»។ AFP
ស៊ីដនីៈ BHP ជាក្រុមហ៊ុនរ៉ែធំជាងគេរបស់ពិភពលោកបានឲ្យដឹងកាលពីថ្ងៃពុធថា ចក្ខុវិស័យសម្រាប់ផលិតកម្មធ្យូងថ្ម «នឹងប្រឈមបញ្ហា» និងមិន «មានកំណើនតម្រូវការ» នោះទេ ដោយសារក្រុមហ៊ុននេះបានស្វែងរកការទាញយកប្រយោជន៍ពីឱកាសនៅក្នុងវិស័យអគ្គិសនី និងថាមពលកកើតឡើងវិញ។
ក្រុមហ៊ុនរ៉ែមួយនេះបានបញ្ជាក់ពីយុទ្ធសាស្ដ្ររយៈពេលវែងរបស់ខ្លួន ជាច្រើនខែបន្ទាប់ពីក្រុមហ៊ុនរ៉ែសំខាន់ៗផ្សេងទៀតលើពិភពលោកដែលរួមមានក្រុមហ៊ុន Glencore និង Rio Tinto ឲ្យដឹងថា ពួកគេកំពុងកម្រិត ឬការងាកចេញពីការផលិតធ្យូងថ្ម។
លោក Peter Beaven ប្រធានផ្នែកហិរញ្ញវត្ថុនៅក្រុមហ៊ុន BHP បានថ្លែងនៅក្នុងសន្និសីទខ្លីមួយថា៖ «ធ្យូងគួរតែរក្សាបាននូវទីផ្សារដ៏ធំមួយ ប៉ុន្តែនៅពេលណាមួយ យើងរំពឹងថា វានឹងកើនឡើង និងបន្ទាប់មកធ្លាក់ចុះដោយសារតែឧបសគ្គធំៗ»។
នៅក្នុងការធ្វើបទបង្ហាញមួយ លោក Beaven បានបង្ហាញពីចក្ខុវិស័យរបស់ក្រុមហ៊ុន BHP ថា ទ្រព្យសកម្មធ្យូងថ្ម ត្រូវបានប្រឈមបញ្ហា និងអាចបញ្ឈប់ការប្រើប្រាស់ ប្រហែលជាលឿនជាងការរំពឹងទុក ដោយសារតែ «មិនមានកំណើនតម្រូវការ»។
ក្រុមហ៊ុនអង់គ្លេស និងអូស្ដ្រាលីមួយនេះបានឲ្យដឹងថា និន្នាការដ៏សំខាន់ ២ ការចាប់យកអគ្គិសនី និងការងាកចេញពីរោងចក្រថាមពលដំណើរការដោយឥន្ធនៈហ្វូស៊ីលមានន័យថា នឹងមានតម្រូវការលើរ៉ែនីកែល រ៉ែស្ពាន់ និងទ្រព្យសកម្មប្រេងរបស់ខ្លួន។
លោកបន្ថែមថា៖ «យើងមានជម្រើសលើរ៉ែស្ពាន់ និងប្រេង ប៉ុន្តែយើងត្រូវការច្រើនទៀត ហើយយើងមានចំណាប់អារម្មណ៍ក្នុងបន្ថែមធនធានរ៉ែនីកែល ស្ពាន់ធ័រដល់ផលបត្រវិនិយោគរបស់យើង។ ដូច្នេះយើងគួរបន្តក្នុងការបន្ថែមជម្រើសការរុករកក្នុងវិស័យទាំងនេះ»។ BHP បានបន្ថែមថា សារធាតុប៉ូតាស្យូមកាបូណាត ដែលប្រើប្រាស់សម្រាប់ការធ្វើជី ជាជម្រើសកំណើនដ៏មានតម្លៃ» ព្រោះវាបានរួមចំណែកដល់ការប្រើប្រាស់ដីប្រកបដោយស្ថិរភាព និងសន្ដិសុខស្បៀង៕AFP/LA
