.jpg)
ក្រុមហ៊ុនរ៉ែ Rio Tinto បានឲ្យដឹងកាលពីថ្ងៃពុធថា ខ្លួននឹងវិនិយោគ ៧៤៩ លានដុល្លារ ដើម្បីពង្រីកផលិតកម្មនៅអណ្តូងរ៉ែដែកមួយនៅតំបន់ដាច់ស្រយាល Pilbara នៅអូស្ត្រាលី។ AFP
ក្រុងស៊ីដនីៈ ក្រុមហ៊ុនរ៉ែ Rio Tinto របស់ប្រទេសអង់គ្លេស និងអូស្ត្រាលីបានឲ្យដឹងកាលពីថ្ងៃពុធថា ខ្លួននឹងវិនិយោគ ៧៤៩ លានដុល្លារ ដើម្បីពង្រីកផលិតកម្មនៅអណ្តូងរ៉ែដែកមួយនៅតំបន់ដាច់ស្រយាល Pilbara នៅអូស្ត្រាលី។
ក្រុមហ៊ុន Rio Tinto បានឲ្យដឹងថា សាច់ប្រាក់នេះនឹងត្រូវចំណាយលើម៉ាស៊ីនកម្ទេច និងកិនបំបែកថ្មរ៉ែថ្មីមួយ និងប្រព័ន្ធខ្សែពានដឹកជញ្ជូនរ៉ែ (conveyor) ប្រវែង ១៣ គីឡូម៉ែត្រ នៅអណ្តូងរ៉ែ Western Turner Syncline ដំណាក់កាលទី ២ ដែលជាផ្នែកមួយនៃប្រតិបត្តិការ Greater Tom Price របស់ខ្លួនក្នុងរដ្ឋ Western Australia។
ក្រុមហ៊ុនរ៉ែនេះបានអះអាងថា ប្រព័ន្ធខ្សែពានដឹកជញ្ជូនរ៉ែនេះនឹងជួយកាត់បន្ថយការបញ្ចេញឧស្ម័នផ្ទះកញ្ចក់ចំនួន ៣,៥ ភាគរយ ធៀបនឹងការដឹកជញ្ជូនរ៉ែដែរតាមផ្លូវគោក។
ក្រុមហ៊ុន Rio បានប្តេជ្ញាចិត្តកាត់បន្ថយការបញ្ចេញឧស្ម័នកាបូន និងបង្កើតគោលនយោបាយនានាដែលមានបំណងដើម្បីដាក់កម្រិតការប្រែប្រួលអាកាសធាតុ។
ក្រុមហ៊ុននេះបានឲ្យដឹងក្នុងសេចក្តីថ្លែងការណ៍មួយថា ក្រុមហ៊ុនរបស់ខ្លួនក៏កំពុង «បន្តវាយតម្លៃលើជម្រើសបន្ថែមនានា ដើម្បីកាត់បន្ថយការបញ្ចេញឧស្ម័នផងដែរ រួមទាំងដំណោះស្រាយថាមពលកកើតឡើងវិញ»។
ការសាងសង់រចនាសម្ព័ន្ធវិនិយោគថ្មីនេះគ្រោងនឹងធ្វើឡើងនៅដើមឆ្នាំក្រោយ ដោយរង់ចាំការអនុម័តជាចុងក្រោយពីរដ្ឋាភិបាល ហើយរ៉ែដែកដំបូងត្រូវបានរំពឹងថានឹងត្រូវបានកិនបំបែកនៅឆ្នាំ ២០២១។
រថយន្តដឹករ៉ែទាំងអស់ក៏នឹងត្រូវបានបំពាក់ដោយបច្ចេកវិទ្យាស្វ័យបើកបរផងដែរនៅត្រឹមឆ្នាំ ២០២១ ជាផ្នែកមួយនៃគម្រោងនេះ៕ KC
