ភ្នំពេញ: ក្រុមហ៊ុនម៉ាកយីហោល្បីៗមួយចំនួនរួមមាន H&M, Adidas, Puma និង Gap ព្រមទាំងក្រុមហ៊ុនផលិតកង់ឯកទេសអាមេរិក និងក្រុមហ៊ុនផលិតស៊ីម៉ងត៍ក្នុងស្រុក Chip Mong Insee បានបង្ហាញការព្រួយបារម្ភថា ការទាញថាមពលអគ្គិសនីពីរោងចក្រដើរដោយធ្យូងថ្មរបស់ប្រទេសកម្ពុជា នឹងប៉ះពាល់ដល់ភាពទាក់ទាញការវិនិយោគ។
ក្នុងលិខិតត្រៀមនឹងផ្ញើជូនរដ្ឋាភិបាលត្រូវបានរាយការណ៍ដោយសារព័ត៌មាន Nikkei Asian Review ថា ក្រុមហ៊ុនទាំងនោះបានព្រមានថា ការទាញថាមពលអគ្គិសនីពីរោងចក្រផលិតថាមពលដើរដោយធ្យូងថ្មជំនួសឲ្យថាមពលកកើតឡើងវិញ ដូចជាថាមពលសូឡា និងខ្យល់បានធ្វើឲ្យប៉ះទង្គិចដល់គោលដៅរបស់ពួកគេក្នុងការកាត់បន្ថយការបំភាយកាបូន។
លិខិតបានសរសេរថា៖ «ការសម្រេចចិត្តលើវិស័យអគ្គិសនីធ្វើឡើងនៅថ្ងៃនេះនឹងចាក់សោប្រទេសកម្ពុជា នៅពេលអនាគតដែលមើលទៅផ្ទុយពីនិន្នាការក្នុងតំបន់ និងពិភពលោកដែលនឹងមិនសូវទាក់ទាញឧស្សាហកម្មរបស់ពួកយើង»។
លិខិតបន្តថា៖ «បណ្តាប្រទេសជាច្រើនបានផ្តល់អាទិភាពដល់ថាមពលកកើតឡើងវិញ និងថាមពលបៃតងនៅពេលអនាគត ដើម្បីបញ្ចៀសការខ្ជះខ្ជាយប្រាក់លើបច្ចេកវិទ្យាហួសសម័យដែលនឹងឈប់ប្រើប្រាស់ និងមានតម្លៃថ្លៃ»។
ទោះបីជាបែបនេះក្តី លោក វិចទ័រ ហ្សូនា អគ្គនាយកនៃនាយកដ្ឋានថាមពលនៃក្រសួងរ៉ែ និងថាមពលប្រាប់ភ្នំពេញប៉ុស្តិ៍កាលពីថ្ងៃពុធថា រដ្ឋាភិបាលចាំចាច់ធ្វើពិពិធកម្មថាមពល ដើម្បីរក្សាសន្តិសុខនៃការផ្គត់ផ្គង់ថាមពលអគ្គិសនីនៅក្នុងប្រទេស។
លោកបន្តថា រាល់គម្រោងអភិវឌ្ឍន៍លើវិស័យថាមពលអគ្គិសនីនៅកម្ពុជា រដ្ឋាភិបាលតែងតែគិតពីផលប៉ះពាល់បរិស្ថាន និងសង្គមប្រកបដោយការទទួលខុសត្រូវខ្ពស់។
លោកថ្លែងថា៖ «ជាទូទៅ ដើម្បីឲ្យមានសន្តិសុខក្នុងការផ្គត់ផ្គង់ថាមពលអគ្គិសនីដល់អ្នកប្រើប្រាស់ ប្រជាពលរដ្ឋ បណ្តាឧស្សាហកម្ម សិប្បកម្ម សេវាកម្មនានា យើងទាមទារធ្វើពិពិធកម្មថាមពលពីប្រភពផ្សេងៗដូចជា ទំនប់វារីអគ្គិសនី រោងចក្រថាមពលដើរដោយធ្យូងថ្ម និងពីថាមពលសូឡាជាដើម»។
លោកបានឲ្យដឹងថា រដ្ឋាភិបាលក៏បានអភិវឌ្ឍគម្រោងថាមពលសូឡាដែលមានអានុភាពសរុប ៤៥០ មេហ្គាវ៉ា់ត់ក្នុងនោះ ១៨០ មេហ្គាវ៉ាត់បានតភ្ជាប់មកបណ្តាញជាតិរួចរាល់ហើយ។
ក្រុមហ៊ុន H&M បានប្រាប់សារព័ត៌មាន Nikkei Asian Review ថាសម្រាប់បញ្ហាបរិស្ថាន និងសេដ្ឋកិច្ចបែបនេះ ក្រុមហ៊ុនកំពុងធ្វើការវាយតម្លៃឡើងវិញនៃយុទ្ធសាស្ត្រផលិតកម្មនៅពេលអនាគតរបស់ខ្លួននៅក្នុងប្រទេសកម្ពុជា។
ក្រុមហ៊ុនដែលចង់កាត់បន្ថយការបំភាយឧស្ម័នផ្ទះកញ្ចក់នៅក្នុងផលិតកម្មកាត់ដេររបស់ខ្លួនត្រឹមកម្រិត ៥៩ ភាគរយក្នុងឆ្នាំ ២០១៧ ឲ្យបានមុនឆ្នាំ ២០៣០ បានបន្ថែមថា៖ «ប្រទេសទាំងឡាយដែលមើលឃើញប្រភពធ្យូងថ្មជាប្រភពថាមពលដែលអាចឋិតថេរសម្រាប់ អនាគតនឹងខាតប្រយោជន៍»។
បើយោងតាមលោក ហ្សូនា សព្វថ្ងៃរោងចក្រផលិតថាមពលដើរដោយធ្យូងថ្មបានផ្គត់ផ្គង់ថាមពលប្រមាណ ៣២ ភាគរយ ថាមពលពីវារីអគ្គិសនីមានចន្លោះពី ៣៤ ទៅ ៤០ ភាគរយ ហើយក្រៅពីនេះជាថាមពលកកើតឡើងវិញ និងប្រភពនាំចូលពីប្រទេសជិតខាងកម្ពុជា៕ LA