ភ្នំពេញៈ ក្រុមហ៊ុនមានមូលដ្ឋាននៅប្រទេសម៉ាឡេស៊ី ដែលគ្រប់គ្រងភាគហ៊ុន ២១ ភាគរយ នៅក្រុមហ៊ុន Cambodia Airports គឺ MUHIBBAH Engineering Bhd រំពឹងថាខ្លួននឹងទទួលបានកំណើនកាន់តែខ្ពស់ពីអាជីវកម្មរបស់ខ្លួននៅក្នុងប្រទេសកម្ពុជា ក្នុងរយៈពេល ២ ឆ្នាំក្រោយនេះ ខណៈដែលការចាក់វ៉ាក់សាំងប្រឆាំងនឹងជំងឺកូវីដ១៩បានធ្វើឡើងនៅទូទាំងពិភពលោក។
យោងតាមប្រព័ន្ធព័ត៌មានអនឡាញ Malaysia Reserve ចេញផ្សាយកាលពីថ្ងៃទី ១ ខែមេសាថា កម្មវិធីចាក់វ៉ាក់សាំងប្រឆាំងនឹងវីរុសកូរ៉ូណាទូទាំងពិភពលោកប្រកបដោយជោគជ័យនឹងជួយកំណត់អត្រាការស្ទុះងើបឡើងទំហំការធ្វើចរាចរណ៍តាមផ្លូវអាកាស ដែលអាចបង្កើនប្រាក់ចំណូលរបស់ក្រុមហ៊ុនមួយនេះពីអាជីវកម្មសម្បទានរបស់ខ្លួននៅប្រទេសកម្ពុជា។
ប្រព័ន្ធព័ត៌មាននេះលើកឡើងថា៖ «យើងមានទស្សនៈថា ចក្ខុវិស័យកាន់កាប់ ២១ ភាគរយនៃព្រលានយន្តហោះរបស់កម្ពុជា ដែលមានចំនួនលើសលប់រហូតដល់ ៧០ ភាគរយនៃប្រាក់ចំណូលរបស់ក្រុមហ៊ុននឹងស្ទុះងើបឡើងវិញជាបណ្ដើរៗក្នុងរយៈពេល ២ ឆ្នាំក្រោយ ដោយសារតែការបង្កើនល្បឿនការចាក់វ៉ាក់សាំងប្រឆាំងនឹងជំងឺកូវីដ១៩ ជំរុញឱ្យមានការធ្វើដំណើរឆ្លងកាត់ពិភពលោក ជាពិសេសប្រទេសចិន អាមេរិក និងអាស៊ីអាគ្នេយ៍»។
ក្រុមហ៊ុនមួយនេះសង្ឃឹមថា នៅពេលព្រំដែនទាំងអស់បើកចំហឡើងវិញ នឹងមានការកើនឡើងការធ្វើដំណើរតាមផ្លូវអាកាសជាអន្តរជាតិ ជាពិសេសអ្នកដំណើរជាជនជាតិចិន។
ក្រុមហ៊ុននេះបន្តថា៖ «យើងសន្និដ្ឋានថា បាតុភូតនេះទំនងជានឹងធ្វើឱ្យប្រសើរឡើងនូវទំហំការធ្វើចរាចរណ៍តាមផ្លូវអាកាសសម្រាប់ក្រុមហ៊ុន Cambodia Airports របស់ប្រទេសកម្ពុជា។ យើងកត់សម្គាល់ថា ប្រហែលជា ១ ភាគ ៣ នៃអ្នកដំណើរទៅព្រលានយន្តហោះ គឺជាជនជាតិចិន។ អាស្រ័យហេតុនេះ សម្ទុះនៃការស្ទុះងើបឡើងវិញនៃប្រាក់ចំណូល សម្រាប់ក្រុមហ៊ុនត្រូវបានមើលឃើញនឹងមានភាពវិជ្ជមានឆ្ពោះទៅមុខ ដោយពឹងផ្អែកលើការស្ទុះងើបឡើងវិញក្នុងកំណើនតម្លៃសំបុត្រយន្តហោះនៅក្នុងតំបន់ និងទំហំការធ្វើចរាចរណ៍នៅក្នុងព្រលានយន្តហោះរបស់កម្ពុជា»។
លោក ខែក នរិន្ទដា នាយកផ្នែកទូរគមនាគមន៍ និងទំនាក់ទំនងសាធារណៈនៅក្នុងក្រុមហ៊ុន Cambodia Airports បានឱ្យដឹងថា វាជាការឆាប់ពេកក្នុងការវាយតម្លៃអំពីការធ្វើចរាចរណ៍តាមផ្លូវអាកាសនាពេលនេះ ដោយសារតែការរីករាលដាលជំងឺកូវីដ១៩ មិនទាន់គ្រប់គ្រងបាន ខណៈដែលករណីឆ្លងនៅក្នុងប្រទេសកម្ពុជា នៅពេលនេះកំពុងកើនឡើង។
លោកបញ្ជាក់៖ «វាឆាប់ពេកមិនអាចមានការវាយតម្លៃច្បាស់លាស់មួយអំពីការធ្វើចរាចរណ៍តាមផ្លូវអាកាស នៅក្នុងព្រលានយន្តហោះអន្តរជាតិទាំង ៣ បានទេ ក្នុងរយៈពេលជាច្រើនខែខាងមុខនេះ។ ស្ថានការជំងឺកូវីដ ១៩ មានភាពប្រែប្រួលរហ័សបំផុតលើពិភពលោក ជាពិសេសនៅក្នុងប្រទេសកម្ពុជា ដែលមានការកើតឡើងថ្មីៗ និងការចាប់ផ្ដើមការចាក់វ៉ាក់សាំងគឺស្ថិតក្នុងដំណាក់កាលដំបូងប៉ុណ្ណោះ។ នៅពេលនេះការរឹតបន្តឹងតាមព្រំដែន និងការតម្រូវឱ្យធ្វើចត្តាឡីស័កបានរារាំងការធ្វើដំណើរតាមផ្លូវអាកាស»។
លោកបន្ថែម៖ «ជារួមក្នុងនាមជាក្រុមហ៊ុនមួយមានចក្ខុវិស័យរយៈពេលវែង យើងនៅតែជឿជាក់លើឱកាសអាជីវកម្ម និងទេសចរណ៍ដែលបានផ្ដល់ដោយប្រទេសកម្ពុជា ហើយនោះជាមូលហេតុដែលយើងបានធានាថា ការវិនិយោគរបស់យើង គឺស្របទៅតាមសក្ដានុពលអភិវឌ្ឍរបស់ប្រទេសកម្ពុជា»។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល (SSCA) បានប្រាប់ ភ្នំពេញ ប៉ុស្តិ៍ កាលពីខែមុនថា ទោះបីជាមានយុទ្ធនាការចាក់វ៉ាក់សាំងប្រឆាំងជំងឺកូវីដ ១៩ ក៏ដោយ ក៏អ្នកដំណើរនៅលើពិភពលោកនៅតែមានភាពប្រុងប្រយ័ត្ន និងស្ទាក់ស្ទើរក្នុងការធ្វើដំណើរតាមយន្តហោះ។
លោកថ្លែង៖ «វិស័យអាកាសចរណ៍មិនទាន់មានភាពល្អប្រសើរនៅឡើយទេ ដោយសារតែការបារម្ភការឆ្លងជំងឺកូវីដ ១៩។ ដូច្នេះភាពមិនច្បាស់លាស់នៅតែមាន ហើយយើងសង្ឃឹមថា ប្រសិនបើការចាក់វ៉ាក់សាំងប្រឆាំងជំងឺកូវីដ ១៩ បង្ហាញប្រសិទ្ធភាព ឧស្សាហកម្មមួយនេះនឹងបង្ហាញការរីកចម្រើនគួរឱ្យកត់សម្គាល់ជាមិនខាន»។
យោងតាមទិន្នន័យបានពីក្រសួងទេសចរណ៍ចំនួនភ្ញៀវទេសចរបរទេសដែលធ្វើដំណើរតាមផ្លូវអាកាសឆ្លងកាត់ព្រលានយន្តហោះអន្តរជាតិទាំង ៣ របស់ប្រទេសកម្ពុជា រួមមាន ព្រលានយន្តហោះភ្នំពេញអន្តរជាតិ ខេត្តសៀមរាប និងខេត្តព្រះសីហនុបានធ្លាក់ចុះយ៉ាងខ្លាំងចំនួន ៨២,៨ ភាគរយកាលពីឆ្នាំ ២០២០ ដែលមានជាង ៧៥ ម៉ឺននាក់ធៀបនឹងជាង ៤,៤ លាននាក់នៃឆ្នាំ ២០១៩៕LA