ភ្នំពេញៈ ក្រុមហ៊ុនវៀតណាម Hoang AnhGia Lai (HAGL) ដែលទទួលបានសិទ្ធិវិនិយោគលើដីសម្បទានរាប់ពាន់ហិកតាសម្រាប់ដំណាំកៅស៊ូនៅខេត្តរតនគិរីបានប្រកាសពីការពង្រីកការវិនិយោគលើការដាំចេកបន្ថែមទៀតចំនួន ៥ ០០០ ហិកតាដើម្បីនាំចេញទៅទីផ្សារចិន។ នេះបើយោងតាមសេចក្តីប្រកាសរបស់ក្រុមហ៊ុន។
ការប្រកាសនេះធ្វើឡើងតែ ២ សប្តាហ៍ បន្ទាប់ពីរដ្ឋាភិបាលកម្ពុជាបានចុះកិច្ចព្រមព្រៀងលើពិធីសារនាំចេញចេកទៅទីផ្សារចិនជាមួយរដ្ឋាភិបាលចិនកាលពីដើមខែសីហា។
ការបង្កើនការវិនិយោគរបស់ក្រុមហ៊ុនពហុវិនិយោគរបស់វៀតណាមនៅកម្ពុជាមួយនេះត្រូវបានគេមើលឃើញថានឹងទទួលបានអត្ថប្រយោជន៍កិច្ចព្រមព្រៀងរវាងកម្ពុជា និងចិន។
យោងតាមសេចក្តីប្រកាសព័ត៌មានក្រុមហ៊ុន HAGL នឹងវិនិយោគ ៤២ លានដុល្លារលើការវិនិយោគបន្ថែមនេះ។
លោក Doan Nguyen Duc អគ្គនាយកក្រុមហ៊ុន HAGL បាននិយាយថា ជារៀងរាល់ឆ្នាំប្រទេសចិនត្រូវការចេកប្រហែល ១៥ លានតោន ខណៈក្រុមហ៊ុនលោកអាចផ្គត់ផ្គង់បានប្រមាណ ២៤០ ០០០ តោន។
លោកសង្ឃឹមថាក្រុមហ៊ុននឹងអាចនាំចេញចេកទៅកាន់ទីផ្សារប្រទេសកូរ៉េខាងត្បូង និងជប៉ុនឲ្យបាន ២០ ភាគរយផងដែរ។ សម្រាប់រដូវប្រមូលផលឆ្នាំនេះក្រុមហ៊ុនរំពឹងថានឹងប្រមូលផលចេកបានចំនួន ១០៦ ០០ តោនស្មើនឹងទឹកប្រាក់ ៧៣ លាន។
លោក ហ៊ុន ឡាក់ នាយកក្រុមហ៊ុន Longmate Agriculture Co.,Ltd ដែលជាការវិនិយោគរួមជាមួយវិនិយោគិនចិន និងហុងកុងបានវិនិយោគលើការដាំចេកលើផ្ទៃដី ១ ០០០ ហិកតានៅខេត្តកំពតតាំងពីចុងឆ្នាំ ២០១៧ បានឲ្យដឹងថា ការវិនិយោគបន្ថែមនេះនឹងជួយធ្វើឲ្យការនាំចេញក្រោមរូបភាពរបស់កម្ពុជាទៅកាន់បរទេសមានកាន់តែច្រើន។ លោកអះអាងថា៖ «ការវិនិយោគថ្មីនេះនឹងជួយឲ្យកម្ពុជាទទួលបានអត្ថប្រយោជន៍ទាំងផ្នែកសង្គម និងសេដ្ឋកិច្ច ដែលមានដូចជាការបង្កើតការងារ ចំណូលជាតិ និងមិនទុកឲ្យដីនៅទំនេរចោល»។
បច្ចុប្បន្ន Longmate Agriculture Co.,Ltd កំពុងរៀបចំដាក់ឯកសារទៅអាជ្ញាធរដើម្បីអាចនាំចេញផ្លែចេកនាដើមឆ្នាំ ២០១៩ ខាងមុខ។
បច្ចុប្បន្ន HAGL កំពុងមានប្រតិបត្តិការដាំចេកនៅវៀតណាម ឡាវ និងកម្ពុជាលើផ្ទៃដីសរុប ១៣ ៥០០ ហិកតា។ ជាមួយគ្នានេះក្រុមហ៊ុនក៏បានដាំផ្លែស្រកានាគ និងម្ទេសសម្រាប់នាំចេញផងដែរ។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មបានប្រាប់ថា លោកមិនទាន់ទទួលបានព័ត៌មានស្តីពីផែនការបង្កើនផ្ទៃដីដាំដុះចេករបស់ក្រុមហ៊ុន HAGL ទេ ប៉ុន្តែលោកលើកឡើងថាការពង្រីកការវិនិយោគនេះនឹងជួយធ្វើឲ្យផលិតផលកសិកម្មរបស់កម្ពុជាមានវត្តមានកាន់តែច្រើននៅលើទីផ្សារអន្តរជាតិ។
លោកថ្លែងថា៖ «ផែនការបន្ថែមការវិនិយោគនៅកម្ពុជារបស់ HAGL អាចដោយសារគេមើលឃើញពីសក្តានុពលរបស់កម្ពុជាដែលទើបបានបើកច្រកទ្វារសម្រាប់ការនាំចេកចេញទៅចិន។ យ៉ាងណាក៏ដោយផលិតផលដែលនាំចេញទៅចិន គឺត្រូវតែគោរពតាមលក្ខខណ្ឌតម្រូវភូតគាមអនាម័យរបស់ចិន»។
ក្រុមហ៊ុន HAGL បាននាំចេញចេកដែលដាំនៅក្នុងទឹកដីកម្ពុជាទៅចិនចំនួន ២ លើកមកហើយ។
ទិន្នន័យអគ្គនាយកដ្ឋានកសិកម្មបានឲ្យដឹងថា បច្ចុប្បន្ននៅកម្ពុជាមានកសិដ្ឋានធំៗចំនួន ៣ កំពុងដាំចេកសម្រាប់នាំចេញមានក្នុងខេត្តរតនគិរី ក្រចេះ និងខេត្តកំពតដែលមានផ្ទៃដីសរុប ៤៩៩៦ ហិកតា៕ LA