.jpg)
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងពិធីចុះកិច្ចព្រមព្រៀងអភិវឌ្ឍមជ្ឈមណ្ឌលភ័ស្តុភារកម្ម កាលពីម្សិលមិញ។ រូបថត MPWT
ភ្នំពេញៈ ក្រសួងសាធារណការ និងដឹកជញ្ជូន (MPWT) និងក្រុមហ៊ុន YCH មានមូលដ្ឋាននៅប្រទេសសិង្ហបុរីកាលពីថ្ងៃព្រហស្បតិ៍ បានចុះហត្ថលេខាលើកិច្ចព្រមព្រៀងក្របខ័ណ្ឌ (AF) សម្រាប់ការបង្កើតគម្រោងមជ្ឈមណ្ឌលភ័ស្តុភារកម្មភ្នំពេញ (PPLC) ដែលជាការរួមចំណែកមួយក្នុងការជំរុញការធ្វើសមាហរណកម្មភ័ស្តុភាររបស់កម្ពុជាទៅក្នុងខ្សែចង្វាក់ផ្គត់ផ្គង់តំបន់ និងពិភពលោក។
ការសម្រេចបានកិច្ចព្រមព្រៀងក្របខ័ណ្ឌនេះកើតមានបន្ទាប់ពីដើមខែមករាឆ្នាំ ២០២០ រដ្ឋាភិបាលបានសម្រេចអនុម័តលើសេចក្តីព្រាងផែនការមេអន្តរកាលស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្មដែលជាផែនទីបង្ហាញផ្លូវសម្រាប់ការអភិវឌ្ឍវិស័យនេះ និងជួយកាត់បន្ថយតម្លៃសេវាក្នុងវិស័យដឹកជញ្ជូន និងឡូជីស្ទិក។ សេចក្តីព្រាងផែនការមេអន្តរកាលស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្មត្រូវបានរៀបចំដោយក្រសួងសាធារណការ និងដឹកជញ្ជូនសហការជាមួយអង្គការ JICA ចាប់តាំងពីខែកញ្ញា ឆ្នាំ ២០១៨។
នៅថ្ងៃទី ១០ ខែ កញ្ញា ឆ្នាំ ២០២០ ទាំង MPWT និង YCH បានចាប់ផ្តើមការពិភាក្សាលើគម្រោង PPLC នេះដែលមានទីតាំងនៅលើដី ៩៨ ហិកតា ក្នុងឃុំសំរោងក្រោម ខណ្ឌដង្កោ នៅប៉ែកខាងលិចព្រលានយន្តហោះអន្តរជាតិភ្នំពេញ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និង លោក Robert Yap នាយកប្រតិបត្តិក្រុមហ៊ុន YCH Group នៅព្រឹកថ្ងៃព្រហស្បតិ៍បានចុះហត្ថលេខាតាមអនឡាញលើ FA បានមានប្រសាសន៍ថាសម្រាប់ការអនុវត្តនៃកិច្ចព្រមព្រៀងនេះគឺ រួមមាន៖ ទី១ គឺត្រូវយល់ព្រមទៅលើទីតាំងសក្តានុពលដែលបានកំណត់គឺមានរយៈពេល ២ ខែ បន្ទាប់ពីការចុះហត្ថលេខាលើ FA នេះ ទី២ គឺ ការសិក្សាលទ្ធភាពអំពីអាជីវកម្មមានរយៈពេល ៩ ខែនិង ទី៣ គឺមានរយៈពេល ៣ ខែសម្រាប់ទុកឱ្យរដ្ឋាភិបាលអនុម័ត។
លោកបានថ្លែងថា៖ «ការរីករាលដាលនៃជំងឺកូវីដ ១៩ គឺបានបន្ថយល្បឿនយើងបន្តិចមែន ប៉ុន្តែវាមិនអាចបញ្ឈប់យើងពីការសម្រេចគោលដៅរបស់យើងបានទេ»។
លោកបន្ត៖ «PPLC គឺជាគម្រោងដឹកជញ្ជូនយុទ្ធសាស្ត្រ ព្រោះវាមានទីតាំងស្ថិតនៅចំកណ្តាលផ្ទៃប្រទេសដែលគាំទ្របណ្តាញចែកចាយ និងបណ្តាញតភ្ជាប់បណ្តាញអន្តរ គ្រប់មធ្យោបាយដឹកជញ្ជូនដូចជាផ្លូវថ្នល់ ផ្លូវដែក ផ្លូវទឹក និងផ្លូវអាកាសដែលមានចម្ងាយតែ ១០ គីឡូម៉ែត្រពីកណ្តាលទីក្រុងភ្នំពេញ»។
លោកស្រី Indranee Rajah រដ្ឋមន្ត្រីប្រចាំទីស្តីការនាយករដ្ឋមន្ត្រី និងជាអនុរដ្ឋមន្ត្រីក្រសួងហិរញ្ញវត្ថុ និងអភិវឌ្ឍន៍ជាតិសិង្ហបុរីបានថ្លែងក្នុងពិធីចុះហត្ថលេខាលើការអភិវឌ្ឍ PPLC នេះគឺជាការសម្រេចដ៏ទាន់ពេលវេលា។ វានឹងផ្តល់នូវហេដ្ឋារចនាសម្ព័ន្ធសំខាន់ៗដើម្បីពង្រឹងចង្វាក់ផ្គត់ផ្គង់របស់ប្រទេសកម្ពុជា និងបង្កើនការនាំចេញ។
លោកស្រីបញ្ជាក់ថា៖ «នៅក្នុងពេលដ៏លំបាកនេះ ការជំរុញភាពជាដៃគូក្នុងតំបន់ដូចជាគម្រោង PPLC នេះពិតជាមានសារៈសំខាន់ណាស់ ដោយមិនត្រឹមតែចូលរួមចំណែកក្នុងការអភិវឌ្ឍវិស័យដឹកជញ្ចូនរបស់កម្ពុជា ប៉ុណ្ណោះទេ ប៉ុន្តែវាក៏ដើរតួជាទីតាំងសម្រាប់កម្ពុជា និងសិង្ហបុរីក្នុងការផ្លាស់ប្តូរចំណេះដឹង និងចែករំលែកការអនុវត្តល្អៗ និងសហការ និងលើកកម្ពស់វិស័យដឹកជញ្ចូននានា។ ខ្ញុំសូមអបអរសាទរដល់រាជរដ្ឋាភិបាលកម្ពុជា និង ក្រុមហ៊ុន YCH ដែលបានបង្កើតឱ្យមាននូវព្រឹត្តិការណ៍ដ៏អស្ចារ្យនេះ»។
លោក Robert Yap បានថ្លែងថា ចាប់តាំងពីគម្រោងនេះត្រូវបានចាប់ផ្តើមពិភាក្សានៅថ្ងៃទី ១០ ខែកញ្ញា ឆ្នាំមុនមក PPLC បានក្លាយជាព្រឹត្តិការណ៍ដ៏សំខាន់សម្រាប់ឧស្សាហកម្មផ្គត់ផ្គង់ និងឧស្សាហកម្មដឹកទំនិញរបស់ប្រទេសកម្ពុជា ព្រោះវាបង្ហាញពីគុណសម្បត្តិនៃការដឹកជញ្ជូនបែបចម្រុះ។
នាយកប្រតិបត្តិរូបនេះបន្តថា៖ «ខ្ញុំសូមថ្លែងអំណរគុណដល់រាជរដ្ឋាភិបាលកម្ពុជាដែលបានផ្តល់នូវការជឿទុកចិត្ត និងការទទួលខុសត្រូវបែបនេះដើម្បីធ្វើឱ្យប្រាកដថា យើងផ្តល់នូវហេដ្ឋារចនាសម្ព័ន្ធដ៏មានសារៈសំខាន់នេះដែលពិតជាអាចជួយដល់ការរីកចម្រើនរបស់ប្រទេសកម្ពុជា និងឈានចូលទៅក្នុងខ្សែច្រវ៉ាក់តម្លៃពិភពលោក»។
លោកទេសរដ្ឋមន្ត្រី ស៊ុន ចាន់ថុល បានលើកឡើងបន្តថា ភាពជាដៃគូដែលបានធ្វើឡើងនាពេលនេះនឹងជួយដល់ប្រទេសកម្ពុជាឱ្យសម្រេចបាននូវចក្ខុវិស័យដើម្បីក្លាយជាមជ្ឈមណ្ឌលដឹកជញ្ជូនក្នុងតំបន់ដែលបានគូសបញ្ជាក់នៅក្នុងសេចក្តីព្រាងផែនការមេអន្តរកាលស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្ម។
លោក ស៊ុន ចាន់ថុល បានបន្តថា៖ «បញ្ហាភ័ស្តុភារកម្មគឺជាសមាសធាតុដ៏សំខាន់សម្រាប់ប្រទេសកម្ពុជាដើម្បីសម្រេចគោលដៅរបស់យើងក្នុងការប្រែក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ និងមានប្រាក់ចំណូលកម្រិតខ្ពស់នៅឆ្នាំ ២០៥០។ យើងទន្ទឹងរង់ចាំធ្វើការសហការជាមួយក្រុមហ៊ុន YCH ដើម្បីបញ្ចូលការអនុវត្តជាលក្ខណៈអន្តរជាតិនេះទៅក្នុងគម្រោង PPLC របស់យើង»៕
