.jpg)
ភ្នំពេញៈ ក្រុមហ៊ុនផ្តល់សេវាហិរញ្ញវត្ថុសម្រាប់ទិញសម្ភារប្រើប្រាស់ដោយបង់រំលស់ថ្មីមួយរបស់ជប៉ុន JACCS Finance (Cambodia) Plc ដែលជាបុត្រសម្ព័ន្ធរបស់ក្រុមហ៊ុន JACCS Group មានមូលដ្ឋាននៅជប៉ុនបានចាប់ផ្តើមដំណើរការផ្តល់សេវាកម្ចីសម្រាប់ទិញម៉ូតូ និងសម្ភារប្រើប្រាស់ក្នុងផ្ទះនៅកម្ពុជា កាលពីថ្ងៃម្សិលមិញ។
ក្រុមហ៊ុននេះចូលក្នុងទីផ្សារដ៏ចង្អៀត និងក្លាយជាក្រុមហ៊ុនភតិសន្សាទី ១២ នៅក្នុងប្រទេសកម្ពុជា។ មន្ដ្រីក្រុមហ៊ុនមានសុទិដ្ឋិនិយមថា សាខា JACCS Finance ចុងក្រោយនឹងទាក់ទាញអាជីវកម្មធំៗ។
លោក Masahiro Arayama នាយកគ្រប់គ្រងរបស់ក្រុមហ៊ុននេះបានថ្លែងថា៖ «នៅតែមានកន្លែងក្នុងការរីកចម្រើន សេដ្ឋកិច្ចរបស់កម្ពុជាកំពុងរីកចម្រើនជារៀងរាល់ឆ្នាំដែលធ្វើឲ្យមានប្រាក់ចំណូលប្រជាជនកាន់តែខ្ពស់ដែលទាមទារផលិតផលប្រើប្រាស់ជាច្រើន»។ លោកបន្តថា៖ «ទំហំទីផ្សារនេះកំពុងកើនឡើង ហើយសម្រាប់ពួកយើង វាល្អក្នុងការចូលក្នុងទីផ្សារនៅពេលនេះ»។
ជាមួយនឹងដំណើរការដំបូងដោយវិនិយោគ ២,៥ លានដុល្លារក្រុមហ៊ុន JACCS បានបើកសាខាមួយនៅអគារកាណាឌីយ៉ា និងមានបំណងពង្រីកចំនួនការិយាល័យកម្ពុជាស្របតាមតម្រូវការទីផ្សារ។
លោកស្រី អ៊ុក ម៉ាលី ទេសាភិបាលរងធនាគារជាតិនៃកម្ពុជា (NBC) បានលើកឡើងកាលពីម្សិលមិញថា ការបើកដំណើរការ JACCS Finance Cambodia នេះឆ្លុះបញ្ចាំងពីកំណើនទំនុកចិត្តរបស់ពាណិជ្ជករជប៉ុនមកលើសេវាហិរញ្ញវត្ថុកម្ពុជាដែលវត្តមានក្រុមហ៊ុនថ្មីនេះក៏នឹងជំរុញកំណើនវិស័យហិរញ្ញវត្ថុនៅកម្ពុជាផងដែរ។
លោកស្រីឲ្យដឹងថា៖ «វត្តមានក្រុមហ៊ុនថ្មីនេះនឹងធ្វើឲ្យវិស័យភតិសន្យាហិរញ្ញវត្ថុកម្ពុជារីកចម្រើនជាងឆ្នាំមុនៗ ហើយក្រុមហ៊ុនថ្មីនេះនឹងរួមចំណែកជំរុញកំណើនវិស័យហិរញ្ញវត្ថុ និងបរិយាប័ន្នហិរញ្ញវត្ថុនៅកម្ពុជា»៕LA
