យន្តហោះក្រុមហ៊ុន ANA របស់ជប៉ុន ចតនៅព្រលានយន្តហោះ Haneda ទីក្រុងតូក្យូ។
ទីក្រុងតូក្យូ៖ ក្រុមហ៊ុនអាកាសចរណ៍ធំបំផុតរបស់ជប៉ុន ANA បាននិយាយកាលពីថ្ងៃចន្ទថា ខ្លួនមានគោលបំណង ដើម្បីក្លាយជាអព្យាក្រឹតកាបូននៅឆ្នាំ ២០៥០ តាមរយៈបច្ចេកវិទ្យាថ្មី ការជួញដូរការបំភាយឧស្ម័ន និងកិច្ចខិតខំប្រឹងប្រែងដទៃទៀត។
វាកើតមានឡើងបន្ទាប់ពីលោកនាយករដ្ឋមន្រ្តី Yoshihide Suga បានប្រកាសកាលពីសប្តាហ៍មុនថា ប្រទេសជប៉ុន នឹងកំណត់គោលដៅកាត់បន្ថយ ៤៦ ភាគរយ នៃការបំភាយឧស្ម័នផ្ទះកញ្ចក់នៅឆ្នាំ ២០៣០ ពោល គឺច្រើនជាងការសន្យាពីមុន។
ក្រុមហ៊ុន ANA Holdings បាននិយាយថា ខ្លួនគ្រោងនឹងកាត់បន្ថយកម្រិតនៃការបំភាយកាបូនពីប្រតិបត្តិការរបស់យន្តហោះមកត្រឹមសូន្យត្រឹមឆ្នាំ ២០៥០ ដោយប្រើប្រាស់ប្រេងឥន្ធនៈប្រកបដោយនិរន្តរភាព ការអភិវឌ្ឍយន្តហោះ និងម៉ាស៊ីនដែលមានប្រសិទ្ធភាពជាងមុន និងតាមរយៈការជួញដូរកាបូន។
កាលពីឆ្នាំមុន ក្រុមហ៊ុនបានកំណត់គោលដៅកាត់បន្ថយការបំភាយកាបូនត្រឹមពាក់កណ្តាលឆ្នាំ ២០៥០ បើប្រៀបធៀបនឹងឆ្នាំ ២០០៥។
គំនិតផ្តួចផ្តើមបែបនេះ មិនមែនជារឿងថ្មីទេក្នុងចំណោមក្រុមហ៊ុនអាកាសចរណ៍ដោយស្ថាប័នឧស្សាហកម្មសម្រាប់ក្រុមហ៊ុនអាកាសចរណ៍ឈានមុខរបស់អាមេរិកសន្យាថា នឹងធ្វើការឆ្ពោះទៅរកការបំភាយសូន្យនៅឆ្នាំ ២០៥០ ហើយក្រុមហ៊ុនអាកាសចរណ៍អង់គ្លេសកំពុងសម្លឹងប្រេងឥន្ធនៈបៃតង។
ក្រុមហ៊ុនផលិតរថយន្តជប៉ុនហុងដាក៏បាននិយាយកាលពីសប្តាហ៍មុនថា ខ្លួននឹងមានគោលបំណងឱ្យមានរថយន្តដើរដោយអគ្គិសនី និងប្រេងឥន្ធនៈសម្រាប់ការលក់ទាំងអស់នៅឆ្នាំ ២០៤០ ដើម្បីលើកកម្ពស់គោលដៅអាកាសធាតុ៕ AFP/RR
