.jpg)
បុគ្គលិកក្រុមហ៊ុនអាកាសចរណ៍ MJ Airlines កំពុងប្រឈមនឹងការផ្អាកការងារ និងមិនទាន់ទទួលបានប្រាក់ខែទាន់ពេល។ MJ Airlines
ភ្នំពេញៈ បុគ្គលិកក្រុមហ៊ុនអាកាសចរណ៍ MJ Airlines កំពុងប្រឈមនឹងការផ្អាកការងារ និងមិនទាន់ទទួលបានប្រាក់ខែទាន់ពេលដោយសារក្រុមហ៊ុនអាកាសចរណ៍ដែលវិនិយោគដោយពាណិជ្ជករចិនមួយនេះប្រឈមនឹងការពន្យារគម្រោងដំណើរការជើងហោះហើររបស់ខ្លួន។ នេះបើតាមអ្នកនាំពាក្យពីខាងអាកាសចរស៊ីវិល។
ក្រុមហ៊ុន MJ Airlines បានបង្ហាញគម្រោងប្រតិបត្តិការនៅកម្ពុជាដំបូងកាលពីអំឡុងខែសីហា ឆ្នាំមុន ដោយបានបញ្ជាក់ថា ក្រុមហ៊ុនកំពុងឆ្ពោះទៅរកការទទួលបានលិខិតអនុញ្ញាតហោះហើរ (AOC) ពីខាងអគ្គលេខាធិការដ្ឋានអាកាសចរស៊ីវិលឆាប់ៗ ហើយអាចចាប់ផ្តើមដំណើរការជើងហោះហើរដំបូងនៅចុងឆ្នាំ ២០១៨ ឬ ដើមឆ្នាំ ២០១៩។
លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល (SSCA) បានឲ្យដឹងថា ការរំពឹងទុករបស់ក្រុមហ៊ុនតាំងពីដំបូងថានឹងអាចពន្លឿនគម្រោងហោះហើរត្រូវបានជួបឧបសគ្គ ដោយសារសម្ពាធនៃការប្រកួតប្រជែងខ្លាំងពេកក្នុងទីផ្សារនេះ។ កត្តានេះបានធ្វើឲ្យក្រុមហ៊ុនពន្យារពេលប្រតិបត្តការ ដែលធ្វើឲ្យបុគ្គលិកមួយចំនួនត្រូវកាត់ចេញដោយសារមិនមានការងារឲ្យធ្វើ។
លោកថ្លែងថា៖ «ទីផ្សារនេះមានការប្រកួតប្រជែងខ្លាំងមែនទែន ដែលក្រុមហ៊ុនគិតថាវាមិនមែនជាពេលល្អទេ ក្នុងការពន្លឿនគម្រោងរបស់ខ្លួន។ អ៊ីចឹង គេក៏បន្ថយល្បឿនសិន ហើយអត់មានការងារឲ្យបុគ្គលិកធ្វើ អ៊ីចឹងក៏ត្រូវកាត់បុគ្គលិក»។
ប្រភពមួយដែលអះអាងថាជាបុគ្គលិកក្រុមហ៊ុន MJ បានផ្ញើមកភ្នំពេញប៉ុស្ដិ៍កាលពីសប្ដាហ៍មុនថា បុគ្គលិកទាំងអស់មិនបានទទួលប្រាក់ខែ ២ ខែហើយ ខណៈលោក Brian Bai អគ្គនាយករបស់ក្រុមហ៊ុនបានជូនដំណឹងដល់បុគ្គលិកថា ក្រុមហ៊ុននេះមិនមានប្រាក់ «ហើយបើមិនមានការវិនិយោគនៅក្រៅ» នឹងត្រូវដួលឆាប់ៗ។
លោក ចាន់សិរីវុត្ថា ឲ្យដឹងថា បច្ចុប្បន្នមានក្រុមហ៊ុនអាកាសចរណ៍ ៩ ដែលចុះបញ្ជីនៅប្រទេស កម្ពុជា ហើយ ២ ក្នុងចំណោមក្រុមហ៊ុនទាំងនោះ គឺជាឧទ្ធម្ភាគចក្រ។ លោក ចាន់សិរីវុត្ថា ឲ្យដឹងថា ទីផ្សារកម្ពុជាគួរមានតែក្រុមហ៊ុនអាកាសចរណ៍ ៤ ប៉ុណ្ណោះ។
លោកបន្តថាការដែលមានក្រុមហ៊ុនរហូតដល់ទៅ ៩ ការក្រកួតប្រជែងក្នុងទីផ្សារសេរី និងនាំឲ្យការផ្គត់ផ្គង់ និងតម្រូវការទីផ្សារមានសមាមាត្រ។
លោកថ្លែងថា៖ «វាច្រើនជាងតម្រូវការបន្តិច ប៉ុន្តែទុកឲ្យប្រតិបត្តិករប្រកួតប្រជែងដោយសេរីនៅក្នុងទីផ្សារនេះ។ វានឹងមានក្រុមហ៊ុនខ្លះទៅលឿន ក្រុមហ៊ុនខ្លះយឺត ហើយចុងក្រោយនឹងមានក្រុមហ៊ុនមួយចំនួនចាកចេញ និងខ្លះនៅបន្ត»៕AFP/LA
