.jpg)
ភ្នំពេញៈ ក្រុមហ៊ុនផលិតរ៉ូបអាពាហ៍ពិពាហ៍ និងរ៉ូបរាត្រីសមោសរបស់អាមេរិក Azazie បានផ្លាស់ប្តូរផលិតកម្មរបស់ខ្លួនចេញពីប្រទេសចិនមកប្រទេសកម្ពុជា ដើម្បីគេចពីការបិទដំណើរការ ដោយសារតែខូវិដ-១៩។ នេះបើតាមសេចក្ដីរាយការណ៍របស់កាសែត Washington Post។
សភាពាណិជ្ជកម្មកម្ពុជា (CCC) ស្វាគមន៍ការផ្លាស់ប្តូរនេះដោយលើកឡើងថា វាកើតឡើងចំពេលនៃការប្ដេជ្ញាចិត្តរបស់រដ្ឋាភិបាលកម្ពុជាក្នុងការទាក់ទាញក្រុមវិនិយោគិនបរទេសកាន់តែច្រើន។
ប្រទេសកម្ពុជា និងបណ្ដាប្រទេសអាស៊ានមួយចំនួនបច្ចុប្បន្នកំពុងក្លាយជាទិសដៅនៃការផ្លាស់ប្តូរការផលិត ឬប្តូរទីតាំងរោងចក្រថ្មីចេញពីប្រទេសចិន ចាប់តាំងពីសង្គ្រាមពាណិជ្ជកម្មរវាងប្រទេសចិន និង អាមេរិក។
លោកស្រី Ranu Coleman ប្រធានទីផ្សាររបស់ក្រុមហ៊ុន Azazie បានប្រាប់កាសែត Washington Post កាលពីថ្ងៃព្រហស្បតិ៍ថា ក្រុមហ៊ុន Azazie ដែលមានទីស្នាក់ការកណ្ដាលលក់រាយសម្លៀកបំពាក់អាពាហ៍ពិពាហ៍អនឡាញនៅទីក្រុង San Jose មានរោងចក្រផលិតរ៉ូបចំនួន ៥០ នៅក្នុងប្រទេស ចិន ប៉ុន្តែបានផ្លាស់ប្តូរការផលិតមួយចំនួនរបស់ខ្លួនមកប្រទេសកម្ពុជា និងវៀតណាមក្នុងរយៈពេលប៉ុន្មានសប្ដាហ៍ថ្មីៗនេះ។
លោកស្រីថ្លែងថា៖ «ខ្ញុំនិយាយតាមត្រង់ វាកំពុងប៉ះពាល់ដល់ពួកយើង ដូច្នេះទីផ្សារសម្លៀកបំពាក់អាពាហ៍ពិពាហ៍តម្រូវឲ្យមានការធ្វើឡើងដោយដៃប្រកបដោយជំនាញហើយវាពិតជាពិបាកក្នុងការស្វែងរកជំនាញនោះនៅក្រៅប្រទេសចិន។
លោកស្រីបញ្ជាក់ថា កម្មករជនជាតិចិនមួយចំនួនបានបន្តការចាប់ផ្ដើមធ្វើ ទោះបីជាការបិទរោងចក្រ ដោយពួកគេធ្វើការងារដោយដៃពីផ្ទះ»។
ការរីករាលដាលវីរុសខូវិដ-១៩ ដែលបណ្ដាលឲ្យមនុស្សស្លាប់ដែលទីក្រុងវូហាន គឺជាចំណុចកណ្ដាល នៅពេលនេះកំពុងគំរាមដល់កំណើនសេដ្ឋកិច្ចពិភពលោក។ ក្រុមហ៊ុននៅក្នុងប្រទេសចិនកំពុងកាត់បន្ថយការផលិត ឬបិទទ្វារជាបណ្ដោះអាសន្ន ដើម្បីទប់ស្កាត់ការរីករាលដាលវីរុសនេះ។
សេចក្ដីរាយការណ៍បានឲ្យដឹងថា ក្រុមហ៊ុន Apple កាលពីសប្ដាហ៍មុនបានព្រមានថាខ្លួនរំពឹងថានឹងមិនសម្រេចបានតាមទិសដៅកំណត់ប្រាក់ចំណូលនោះទេនៅក្នុងត្រីមាសបច្ចុប្បន្ននេះ ដោយសារតែការជាប់គាំងការផលិតទូរស័ព្ទ iPhone នៅក្នុងប្រទេសចិន និងតម្រូវការកាន់តែទាបពីអតិថិជនជនជាតិចិន។
លោក លឹម ហេង អនុប្រធានសភាពាណិជ្ជកម្មកម្ពុជា ( CCC) បានឲ្យដឹងថាចរន្តនេះស្របជាមួយនឹងការប្ដេជ្ញាចិត្តរបស់រដ្ឋាភិបាលក្នុងការទាក់ទាញក្រុមវិនិយោគិនបរទេសកាន់តែច្រើន ខណៈប្រទេសនេះបានបាត់បង់មួយផ្នែកនៃការអនុគ្រោះពន្ធពាណិជ្ជកម្ម EBA របស់សហភាពអឺរ៉ុប។
លោកថ្លែងថា៖ «វាជាព័ត៌មានល្អ។ ខ្ញុំគិតថា វាកំពុងឆ្ពោះទៅរកកន្លែងត្រឹមត្រូវ ដោយសារផលិតផលកម្ពុជាមួយចំនួនទទួលបានការនាំចេញរួចពន្ធទៅអាមេរិកស្ថិតក្រោមប្រព័ន្ធអនុគ្រោះពន្ធទូទៅ (GSP)»។
ទិន្នន័យចុងក្រោយបានពីការិយាល័យពាណិជ្ជកម្មអាមេរិកបានបង្ហាញថា ការនាំចេញរបស់កម្ពុជាទៅអាមេរិកបានកើនឡើងខ្លាំងមានតម្លៃប្រហែល ជា ៥ ៣៦២ លានដុល្លារ បើធៀបនឹង ៣ ៨១៨ លានដុល្លារ កាលពីឆ្នាំ ២០១៨ ខណៈការនាំចូលសរុបមកពីអាមេរិកបានកើនឡើងដល់ប្រហែល ៥១៣,៤ លានដុល្លារធៀបនឹង ៤៤៥,៨ លានដុល្លារ កាលពីឆ្នាំ ២០១៨។
ទោះយ៉ាងណាការរីករាលដាលនៃ វីរុស ខូវិដ-១៩ ក៏ជាបញ្ហាប្រឈមសម្រាប់កំណើនសេដ្ឋកិច្ចរបស់ប្រទេសកម្ពុជានៅឆ្នាំនេះផងដែរ ដែលរោងចក្រកាត់ដេរមួយចំនួនត្រូវបានរំពឹងថា នឹងបិទទ្វារនៅខែមីនា ដោយសារតែកង្វះការផ្គត់ផ្គង់វត្ថុធាតុដើមពីប្រទេស ចិន ដែលជាអ្នកផ្គត់ផ្គង់ដ៏ធំដល់រោងចក្រនៅកម្ពុជា៕ LA
