ភ្នំពេញៈ ក្រុមហ៊ុនអាមេរិកជាង ១០ ក្រុមហ៊ុនដែលបានប្រមូលផ្ដុំគ្នានៅរាជធានីភ្នំពេញ កាលពីថ្ងៃម្សិលមិញ កំពុងសម្លឹងមើលឱកាសវិនិយោគនៅក្នុងវិស័យកសិកម្មរបស់ប្រទេស កម្ពុជា។
ព្រឹត្តិការណ៍រយៈពេល ២ ថ្ងៃត្រូវបានរៀបចំឡើងដោយ សភាពាណិជ្ជកម្មអាមេរិកនៅកម្ពុជាក្នុងទីក្រុងភ្នំពេញចាប់ពីថ្ងៃទី ២៦ ដល់ថ្ងៃទី ២៧ ខែកញ្ញា ឆ្នាំ ២០១៨ ដោយមានការសម្របសម្រួលជាមួយនឹងស្ថានទូតអាមេរិក។
លោក William Heidt ឯកអគ្គរដ្ឋទូតអាមេរិកប្រចាំនៅកម្ពុជា បានឲ្យដឹងនៅក្នុងអំឡុងសន្និសីទនេះថា វាជាឱកាសដ៏ល្អមួយ និងជាពេលវេលាត្រឹមត្រូវសម្រាប់ការជួបជុំគ្នាជាមួយគណៈប្រតិភូពាណិជ្ជកម្ម ដើម្បីជួបជាមួយក្រុមហ៊ុនកសិកម្មក្នុងស្រុកដែលល្បីឈ្មោះនៅក្នុងវិស័យនេះអស់រយៈពេលជាង ១០ ឆ្នាំមកហើយ។
លោកបានថ្លែងថា៖ «វាជាលើកដំបូងដែលយើងរៀបចំព្រឹត្តិការណ៍ពាណិជ្ជកម្មមួយ នៅក្នុងវិស័យកសិកម្ម»។
លោកបន្តថា៖ «ការងាររបស់យើង រវាងពេលនេះ និងបន្ទាប់ គឺជីកកកាយរកសក្ដានុពលកំណើនរបស់វិស័យកសិកម្មកម្ពុជា»។
ដោយមានបទពិសោធការងារជាមួយដៃគូនៅតាមបណ្ដាប្រទេសជាង ១៣០ ជុំវិញពិភពលោករយៈពេលជាង ១សតវត្សរ៍ ក្រុមហ៊ុនជាច្រើននឹងសម្លឹងមើលទៅក្នុងការវិនិយោគនៅក្នុងវិស័យបច្ចេកវិទ្យាកសិកម្ម ឧបករណ៍ និងអ្នកជំនាញ ជីវបច្ចេកទេស និងជី ការវេចខ្ចប់ ផលិតផលកសិកម្ម និងស្វ័យប្រវត្តិកម្ម កសិគីមី ការវិភាគទិន្នន័យ ឱសថសត្វ និងឧបករណ៍ប្រមូលផល។
ក្រុមហ៊ុនទាំងនោះរួមមាន ក្រុមហ៊ុន Absolute Packaging ក្រុមហ៊ុន Archer Daniels Midland ក្រុមហ៊ុន Cargill ក្រុមហ៊ុន Humate USA ក្រុមហ៊ុន Hydro Thermal ក្រុមហ៊ុន John Deere ក្រុមហ៊ុន Sripipat Engineering ក្រុមហ៊ុន Syngenta និងក្រុមហ៊ុន Walmart។
លោកបន្តថា ទោះបីជាកសិកម្មកម្ពុជាមានសក្ដានុពលធំក៏ដោយ ប៉ុន្តែវានៅតែប្រឈមឧបសគ្គស្មុគស្មាញ ដូចជាស្ដង់ដារអនាម័យ និងភូតគាមអនាម័យ ដែលជាបញ្ហាប្រឈមក្នុងការធ្វើពិពិធកម្មនាំចេញ។
លោកថ្លែងថា៖ «បញ្ហាស្មុគស្មាញទាំងនោះ ក្រុមហ៊ុនរបស់យើង នឹងជួយយ៉ាងខ្លាំងលើបញ្ហានោះ ហើយនឹងជួយបញ្ជាក់ផលិតផលកសិកម្មណាមួយមានសមត្ថភាពប្រកួតប្រជែងខ្លាំងបំផុត ដែលអាចនាំចេញទៅទីផ្សារអន្តរជាតិ»។ លោកបន្ថែមថា ឧទាហរណ៍ អាចជាម្រេច ឬផ្លែស្វាយ។
លោកស្រី ចាម និមល រដ្ឋលេខាធិការក្រសួងពាណិជ្ជកម្ម ស្វាគមន៍ក្រុមហ៊ុនអាមេរិក ដែលនឹងចូលរួមធ្វើឲ្យ គមា្លតបញ្ហាប្រឈមនៅក្នុងវិស័យកសិកម្មកម្ពុជារួមតូច។
លោកស្រីបន្តថា វិស័យកសិកម្មកម្ពុជាកំពុងប្រឈម ផលិតភាពនៅមានកម្រិត គុណភាពទាប និងការពង្រីកសេវាកសិកម្មនៅមានកម្រិត ដែលលក្ខខណ្ឌអភិវឌ្ឍន៍ចង្វាក់ផ្គត់ផ្គង់ មិនទាន់ត្រូវនឹងតម្រូវការទីផ្សារ។
លោកស្រីថ្លែងថា៖ «ផលិតផលបសុសត្វ និងវារីវប្បកម្មរបស់យើង នៅតែមិនមានស្ថិរភាព យន្តការជួយសម្រួលការនាំចេញមិនទាន់ត្រូវបានរួមបញ្ចូលពេញលេញ ហើយសមត្ថភាពរបស់យើង ក្នុងការឆ្លើយតបការនាំចូលជាមួយស្ដង់ដារអនាម័យ និងភូតគាមអនាម័យរបស់ទីផ្សារ នៅតែជាកត្តាដ៏សំខាន់ ដែលរារាំងសមត្ថភាពរបស់យើងក្នុងការលើកកម្ពស់ការនាំចេញ»។
យោងតាមលោកស្រី និមល ទាក់ទងនឹងការអភិវឌ្ឍពាណិជ្ជកម្ម កម្ពុជាបានចូលរួមយ៉ាងសកម្មលើពិភពលោក និងការធ្វើសមាហរណកម្មក្នុងតំបន់ ដែលកំពុងនាំចេញទៅប្រទេស ១៤៧ លើពិភពលោកដែលមានចំនួន ៦០ ភាគរយនៃផលិតផលក្នុងស្រុកសរុបរបស់កម្ពុជា។
លំហូរចូលពាណិជ្ជកម្មរវាង កម្ពុជា និងអាមេរិក ត្រឹមខែមិថុនា ឆ្នាំនេះមានចំនួន ១,៩ ពាន់លានដុល្លារ កើនឡើង ២៣ ភាគរយក្នុងរយៈពេលដូចគ្នាកាលពីឆ្នាំ ២០១៧។
លោក ហ៊ុន ឡាក់ នាយកគ្រប់គ្រងនៅក្រុមហ៊ុន Mekong Oryza trading Co.,ltd ដែលចូលរួមក្នុងព្រឹតិ្តការណ៍នេះបានឲ្យដឹងថា រយៈពេល ២-៣ ឆ្នាំនេះ ផលិតផលកសិកម្មមានកំណើនយ៉ាងខ្លាំង ហើយផលិតផលកសិកម្មកម្ពុជានឹងកើនឡើងដល់ស្ដង់ដារសម្រាប់ការនាំចេញ។
លោកថ្លែងថា៖ «យើងនឹងពិភាក្សាបន្ថែមទៀត នៅក្នុងជំនួបនៅថ្ងៃនេះ អំពីផលិតកម្ម និងតម្រូវការទីផ្សារ ដូច្នេះចាប់ពីពេលនេះតទៅ ខ្ញុំជឿជាក់ថា ខ្សែចង្វាក់ផលិតកម្មរបស់យើងនឹងសម្រេចបានតាមស្ដង់ដារផ្អែកលើតម្រូវការទីផ្សារ»៕LA